Mazwiro
Bhaibheri rinotingwaja ngo pamusoro po kuva no mazwiro akashata, asi rinotivangisa kuti tisakurire mugariro jaushoni.
USHUNGU
CIAMBI CO MU BHAIBHERI: “Ari nani mundhu anononoka kuceneka kupinda murhwi wakavanga.”—Mazwi 16:32.
ZVINODA KUREVENYI: Tinobesereka maningi patinojijira kungwarira mazwiro edu. Nguva jimweni tese tinonyangajwa ngo ciri cese, asi kudari tikatama kungwarira, kunyangajwa kwedu kungatiita kuti tiite zvakashata maningi. Vapsakisisi vo mazuva ano vakanga kuti, vandhu pavanonga vakanyangajwa zve no ushungu, vanovereketa kana kuita ciro cokuti vanozozvidemba nguva jimweni.
NGOZVAPI ZVAMUGAITA: Jijiranyi kungwarira ushungu mucito maita ciri cese. Vandhu vamweni vanorangarira kuti kuputika ngo ushungu, manera o kukhombija kuti vakavanga maningi, asi cokwadi ngo cokuti i manera o kutatija kuti vakaremba. Bhaibheri rinoti: “Mundhu acikajibati ega, wakadari inga guta rakaxama ricikazivi kubiiwa.” (Mazwi 25:28) Manera akanaka o kungwarira ushungu kunasa kupsaka kuziva zvokadi zvese. “Mundhu wakangwara anononoka kuceneka; goja rake kukanganwa bzituko.” (Mazwi 19:11) Zvinosisira kuzwa zvinoda kubhuya mundhu umweni, ngokuti zvinotibesera kunasa kuziva ushoni shwiro yondhoyo zve zvinozotibeserazve kuti tirambe takathiva.
KUBONGESERA
CIAMBI CO MU BHAIBHERI: “Itanyi vandhu vanobonga.”—VaKolosi 3:15.
ZVINODA KUREVENYI: Zvinonangwa kuti vandhu vanobongesera ndivona basi vanodakara. Pikija vaya vakasotana no zvineso zvakakura maningi vanozvitenderavo. Ivona vanonanga kuti, khiya rinodikana kuti muve no mazwiro aushoni, kutama kusotesesa zvawaruzaro, asi zvaunodikana kubongesera.
NGOZVAPI ZVAMUGAITA: Njiku jese taranyi mu phepha zviro zvamunobongesera ndizvona. Akuna ndikano yo kuva zviro zvikuro. Rangariranyi ngo zviro zvidoko, inga kubuda ko zuva, mabhuyo anodakajisa no mundhu wamunoda kana kuva no upenyu. Kupsaka nguva yo kubongesera ngo zviro izvi zvinozomuita kuti mudakare.
Zvingabesera, kusotesesa mugariro jaushoni jo hama no shamwari jenyu. Perapo, vavhunjenyi zvamunodakarira maningi kwavari. Mungaita izvi mecishandisa karata, mesajhi, email kana kuenda kovavhunja. Ushamwari hwenyu unozova wakavanga zve munozojizwa makadakara ngo kuita zvaushoni kuno vandhu vamweni.—Maitiro o Vapostori 20:35.
ZVIAMBI ZVIMWENI
Mungabhashari Bhaibheri rakagravhahwi. Irona rinowanika mu ndumi jinokwana kuita 40, mu jw.org
TIZANYI KUTUKANA.
“Kuambira kuvereketesana kwakadari inga kufunungura kumwa; kupejei kucito kukareba.”— MAZWI AKANGWARA 17:14.
MUCANESEKA MANINGI NGO ZVAMANGWANA.
“Macathimwa-thimwa ngo zuva ro mangwana; zuva ro mangwana rinozova no kuthimwa-thimwa kwaro. Zuva no zuva rakakwana ngo matambujiko aro.”— MATEU 6:34.
MUCAITA ZVIRO NGO KUTEVEJA MAZWIRO ASI TEVEJANYI ZVAMUNOZIVA.
“Hwiru hunozokungwarira, bzokadi bzinozokuthavira.”— MAZWI AKANGWARA 2:11.
