Uhomi
Bhaibheri asipi bhuku ro zvokurapa. Asi pikija zvakadaro, irona rinotibesera kuva no uhomi waushoni. Vonanyi zviambi zvinganani zvo mu Bhaibheri:
NGWARIRANYI USHONI MUVIRI WENYU
CIAMBI CO MU BHAIBHERI: “Apana mundhu anoda kuxata ko muviri wake; kaveta anouhisa no kuukorondha.”—VaEfeso 5:29.
ZVINODA KUREVENYI: Ciambi ici co mu Bhaibheri cinotivangisa kuti tiite zvese zvatinokwanisa kuti tingwarire uhomi wedu. Imwe jijo, inotatija kuti zvineso zvizinji zvo uhomi zvinoitika ngo ndava yo maponero edu. Ngokudaro, kunasa kukheta ushoni zvingamubesera kuva no uhomi waushoni.
NGOZVAPI ZVAMUGAITA:
-
Ihanyi zvinovaka muviri. Psakanyi kuha zviro zvinovaka muviri zve imwanyi maningi kumwa.
-
Damuranyi muviri. Kujidamura-damura, kungaitisa nane uhomi hwenyu, azvinenyi makore amunawo kana ndhendha yamunayo. Mbhuri yenyu, shamwari no vanovonerera zvo uhomi, vangamubesera kuva no cirovejeso co kuzvidamura-damura, asi kuti mubesereke zvinofira kwenyu.
-
Vatanyi zvakakwana. Kupeja njiku zinji mucikavati zvakakwana kungamubarira ndhendha. Vandhu vazinji avavati zvakakwana ngo ndava yo maponero avo. Asi kudari mukakheta kuvata zvakakwana, muri kukheta uhomi waushoni kamare.
SIYANYI ZVIROVEJESO ZVINOKHUVAZA
CIAMBI CO MU BHAIBHERI: “Ngatisuke psina yese yo muviri no yo mujimu.”—2 VaKorinto 7:1.
ZVINODA KUREVENYI: Uhomi wedu unozova waushoni, kudari tikatama kushandisa zviro zvinosvipisa muviri wedu, zvakadari inga sigaro, iyona inozivika maningi ngo ndhendha yainoitisa zve inotora ku rufu.
NGOZVAPI ZVAMUGAITA: Sananyi njiku imwe kuti muime kubhema zve njiku yondhoyo itarenyi mu Karendario. Pecicota njiku imwe kuti rigume zuvero, khandiranyi cikhwama co sigaro no zvese zvinobatanijwa pa cirovejeso ico cinokhuvaza. Mucagara maningi mu ndau inobhemwa sigaro. Vhunjanyi mbhuri yenyu no shamwari kuti masiya kubhema.
ZVIAMBI ZVIMWENI
Mungakumbira Bhaibheri kuno Zvapupu zva Jehovha zviri mundharaundha mwenyu
ITANYI ZVIRO NO MAKANGWARIRIKA.
“Ukavaka nyumba ipsa, unodikana kudira rusosa panyezuru payo, kuti patame anowira pasi, ngokudaro auzovi no ndava yo ngazi.”— DEUTERONÒMIO 22:8.
NGWARIRANYI USHUNGU.
“Mundhu anosengerera ano kungwara kukuru; acikasengereri, anokuja upenji.”— MAZWI AKANGWARA 14:29.
MUCAHISA.
‘Ucabatana na vaya . . . Vanohisa.’— MAZWI AKANGWARA 23:20, Shanduro yeNyika Itsva.
