Bhaibheri rinonanga kuti ngirozi yakapandukira, yoguma pakudanijwa kuti Sathana Dhiabho, wakananga kuti Mwari aana citendehwa cokutonga vandhu. Sathana wakanangazve kuti vandhu vaizopona ushoni vakatama kutongwa ndi Mwari. Zvinosuruvarisa ngo zvokuti vabari vedu vokutanga, Adhamu na Evha vakatevejera Sathana, vopandukira Mwari.—Genesi 3:1-6; Apokalipsi 12:9.

Adhamu na Evha vakaramba kutongwa ndi Mwari, ngondava yazvo ivona vakaruza mukana wavo wo kurarama mu Paradhiso no kuva no upenyu wakakwana. (Genesi 3:17-19) Cisungo cavo cakapsasavo vana vovakazobara pa kufamba ko nguva. Bhaibheri rinonanga kuti ngondava yo cishaishi ca Adhamu ‘uxaixi hwakanghwina mu nyika yo pasi, ngo uxaixi hwongwinavo rufu.’ (VaRoma 5:12) Cishaishi cakaviisa zvineso zvimweni “Varipo vandhu vanotonga panyezuru po vamweni, kuti vavaxuphe.” (Mucumaeri 8:9) Ngo magama amweni, kudari vandhu vakazvitonga vega, zvineso zvinowanda.

Mutongi wokutanga anonangwa mu Bhaibheri ndi Nimirodhi. Iyena wainga mupanduki, wakakhombija kuti aacaidepi kuti vandhu vatongwe ndi Jehovha. Kutangira mu njiku jake mbhera nyamasi, vandhu vari pa zvigaro zvakakura vanoshandisa simba ravo mu njira yakashata. Zviuru zvitatu zvo makore akapera, Mambo Soromona wakati: “Vonai musoji yo vaxuphwi, apana anovanyaraja; simba riri ku divi ro vaxuphi, apana anovaembejera.”—Mucumaeri 4:1.

Nyamasi uno, zviro azvizivi kucinja. Mu gore ro 2009, bhuku rimweni ro Nações Unidas rakananga kuti zviri kunasa kuvoneka kuti “utongi wakashata ndiwona uri kuviisa zvineso zvizinji zvatiri kuvona mu nyika.”

Nyika inoda vatongi vakanaka no matongero mapsa. Izvi ndizvona zvatakagondeswa ngo Musiki wedu!

Mwari wakagaja Umambo kana utongi unozoparaja utongi hwese hwo vandhu, “ihwona hunozogara mbhera narini.” (Danieli 2:44) Umambo uu ndiwona unokumbihwa ngo zviuru no zviuru zvo vandhu. (Mateu 6:9, 10) Asi Mwari aazotongi ega. Mutongi wo Umambo uu anozova mundhu wakasanwa ndi Mwari zve wakamborarama pasi pano. Ndiyani mutongi uu?