1-2. Mugariro japi jingatiita kuti ticeme?

 ZVINGAITA kuti pamukuvo uri wese itusu takambocema. Patinonga tiri pa mugariro jinotiita kuti tidakare tingabudisa musoji ngo kudakara. Kangaije imwimwi makambocema ngo ndava yo ciro cinosisira kana caushoni maningi cakaitika na imwimwi. Inga muezaniso, pamakabara mwana wenyu, pamakaceukija zviro zvaushoni, no paya pamakapekeja kwaviya wakanaka ku shamwari yenyu yamakapeja mukuvo wakareba mucizivi kuivona.

² Kazinji musoji jedu jinovonesa kuhwajihwa kwatinonga tecizwa mukati mo mwoyo wedu. Inga muezaniso, itusu tingacema ari wese paanotikhugunya kana patinonga tecihwajihwa maningi ngo ndhendha iri yese inonesa kana patinofihwa ngo ari wese. Pamugariro jakadari, tingajizwa inga muporofita Jeremiya Vabhabhironiya pavakahwisa Jerusarema. Jeremiya wakati: “Majiso angu, ari kupopoma kumwa . . . Majiso angu, anocema acikazorori, nee kuima.”—Ndumbo yo Ciriro 3:​48, 49.

3. Jehovha anozwa kudini paanovona vashandiri vake vecitambujika? (Isaya 63:9)

³ Jehovha anoziva kuti kucema kwakadini kwatinoita patinosongana no mugariro jinonesa. Bhaibheri rinovonesa kuti Jehovha anovona mugariro jakashata jinosongana no vashandiri vake. Cimwenizve, iyena anovapurutana pavanoita mukumbiro vecida besero. (Nduyo 34:15) Asi Jehovha anoita zvizinji kusiyapo basi kutivona no kutizwa, iyena ndi baba wedu cimwenizve anotida maningi. Ngo kudaro, paanotivona tecicema, iyena anosuruvara, ngokukasika anoviya kotibesera.—Verenganyi Isaya 63:9.

4. Tingajijenyi kuvha ku muezaniso jinowanika mu Bhaibheri ngo manera Jehovha anorangarira?

⁴ Mu Soko rake Bhaibheri, Jehovha anovonesa manera aakataja  vashandiri vake pavaicema. Tingakwanisa kuvona zvondhozvo ngo kusotesesa muezaniso wa Ana, Dhavhidhi na Mambo Ezekiya. Ngozvapi zvakaitisa kuti ivona vaceme? Jehovha wakaitenyi pavaimukumbira kuti avabesere? Muezaniso javo jingatitondhojesa kudini paya patinonga tecicema ngo ndava yo cineso ciri cese, patinocengejwa no kutotama vetero?

KUCEMA NGO NDAVA YO KUHWAJIHWA

5. Mugariro wa Ana wakamuita kuti ajizwe kudini?

⁵ Ana wakasongana no mugariro jakasiya-siyana jakamuita kuti aceme ngo kuhwajihwa. Mwamuna wa Ana wainga no mukaji umweni, iyena wainga Penina, cimwenizve waishora Ana. Kuciripi izvi basi, Ana aacaingepi no vana, kuveni Penina wainga no vana vakawanda. (1 Samweri 1:​1, 2) Penina wakashora maningi Ana ngo ndava yo kutama kwake kubara. Maizojizwa kudini kudari no mainga pamugariro uwu? Ana wakanyangajwa maningi zvokuti ‘wakacema acikahi’ cimwenizve, waihwajihwa mu mwoyo.’—1 Samweri 1:​6, 7, 10.

6. Ana wakaitenyi kuti awane tondhojo?

⁶ Ana wakawanisa kudini tondhojo? Cakamubesera i kwenda ku tabhernake kangaije pa ndau po musuvo wokwenda mu ndau yakacena yo mu tabhernake. Iyena wakaima pondhopo eciita mukumbiro kuna Mwari ecicema maningi. Ana wakadeketerera Jehovha eciti: “Vonanyi kudodokeswa ko muranda wenyu.” (1 Samweri 1:10b, 11) Ana wakananga mazwiro ake paaita mukumbiro. Jehovha waida maningi mwanakaji uwu iyena wainga mwana anosisira pameso pake, cimwenizve Jehovha waida kumutondhoja.

7. I tondhojo yapi yakaashira Ana ngokuita mukumbiro kuna Jehovha?

⁷ Ana wakajizwa kudini paakapera kuita mukumbiro kuna Jehovha no kuzwa masoko akanangwa ngo Mupiri Mukuru Eri? Bhaibheri rinoti: “Mwanakaji wiya wakatevera gwanja rake, wakaha, no hope yake aizivi kuzocamwabze.” (1 Samweri 1:​17, 18) Pikija kuti mugariro wake unosuruvarisa wainga ucito wacinja, Ana wakajizwa ushoni. Iyena wainga akhandira mutoro wake kuna Jehovha. Jehovha wakazwa mukumbiro wake, mazwire ake no kumupa vana.—1 Samweri 1:​19, 20; 2:21.

8-9. Mukuzwirana na Vahebheru 10:​24, 25, ngenyi tinodikana kuita zvese zvatinokwanisa kuti tive pa musongano jo Cikristu? (Vonanyi foto.)

⁸ Ngozvapi zvatinojija? Imwimwi muri kusongana no mugariro unonesa unomuitisa kuti muceme ngo kukasika? Kangaije imwimwi muri kuhwajihwa ngo kufihwa ngo ari wese wo pambhuri penyu kana kuti shamwari. Pamugariro jakadari, ngo zvocibarihwe kuda kugara mwega. Kudari inga ndi Ana wakawana tondhojo no vangiso ku tabherinake, imwimwivo mungawana tondhojo ngo kwenda kumusongano jo ungano pikija mucikajizwi ushoni. (Verenganyi Vahebheru 10:​24, 25.) Patinozwa zviitiko zvo mu Bhaibheri zvinotondhoja pamusongano,  Jehovha anonga ecitibesera kuti tive no mazwiro aushoni. Izvi zvinozotibesera kuti tingwarire mazwire edu pikija mugariro wedu auzoiti nane ngokukasika.

⁹ Pamusongano jedu, hama no hambzaji jinotivangisa no kukhombija kuti jinotida maningi. Itusu tinojizwa ushoni patinonga tiri pamwepo navo. (1 Vatesaronika 5:​11, 14) Vonanyi muezaniso wo hama imweni inoshanda inga piyona anosisira yakafihwa ngo mukaji wayo. Iyona yakati: “Mbhera na nyamasi inini ndiciri kucema. Mukuvo umweni ndinogara pa ndau iri yese ndecicema. Musongano jo ungano jinondivangisa maningi. Magama aushoni o hama no hambzaji jangu anondivangisa maningi. Azvinenyi kuti ndinothimwa-thimwa no kuneseka zvakadini ndicito ndaguma kumusongano, asi pandinonga ndiri kondhoyo ndinojizwa ushoni.” Patinonga tiri kumusongano Jehovha anoshandisa hama no hambzaji jedu kuti atibesere.

10. Tingatevejeresa kudini muezaniso wa Ana patinonga takasuruvara?

¹⁰ Ana wakatondhojwa maningi ngokunanga mazwiro ake kuna Jehovha ngokuita mukumbiro. Imwimwivo ‘mungakhandiravo kuthimwa-thimwa kwenyu kwese’ kuna Jehovha no kuthemba kuti iyena anozomuzwa. (1 Pedhru 5:7) Hambzaji imweni ino mwamuna wayo wakafa ngokuurawa ngo mabhandidhu ainga no nvuti, yakati: “Inini ndakasuruvara maningi zvokuti ndakavona inga kuti narini andizovizve ndakadakara. Inini ndakawana tondhojo no nyarajo pandaiita mukumbiro kuna Baba wangu vano rudo Jehovha. Kazinji andicaiwanepi magama aushoni asi iyena waindizwisisa. Pandainga ndakasuruvara maningi ndecithimwa-thimwa, ndaikumbira Jehovha kuti andinyaraje. Ngo kudaro, ndaijizwa ndakagajana no kukwanisa kuita zvandaida kuita pa njiku yondhoyo.” Patinonanga kuneseka kwedu kuna Jehovha, iyena anohwajihwavo ngo zvineso zvedu no kuzwisisa kuhwajihwa kwatinova nako mu mwoyo. Pikija cinesoco aciperi, Jehovha anomutondhoja no kumubesera kuti mujizwe makagajana. (Nduyo 94:19; Vafiripi 4:​6, 7) Iyena anozomukomborera ngo kucungirira kwenyu makagondeka.—Vahebheru 11:6.

JEHOVHA ANOVONA KUCEMA KWEDU PATINOSHAISHWA KUTAJWA

11. Zvineso zvakahwisana na Dhavhidhi zvakamuita kuti ajizwe kudini?

¹¹ Mu upenyu hwake, Dhavhidhi wakacungirira mugariro jakasiyana-siyana jakamuita kuti aceme. Kwainga no vandhu vazinji vaimuzonda. Pikija vamweni vainga shamwari jake, ukama hwake, avacaingepi vakagondeka kwaari. Cimwenizve, vaiita zviro kuitira kumukhuvaza. (1 Samweri 19:​10, 11; 2 Samweri 15:​10-14, 30) Pa vhaza imweni wakatara kudari: “Simba rangu riri kupera ngo ndava yo kugomera kwangu; Usiku hwese ndinobija kama yangu ngo ndava yo musoji; Pandinovata panopera kubira ngo ndava yo kucema.” Ngenyi Dhavhidhi waijizwa kudaro? Iyena wakati: “Ngo ndava ya vese vaya vari kunditambuja.” (Nduyo 6:​6, 7) Zviro zvakashata zvaiitihwa ngo vamweni zvaiita kuti iyena aceme ngokuhwajihwa.

12. Mukuzwirana na Nduyo 56:​8, Dhavhidhi wainga no cokwadi cenyi?

¹² Pikija no zvineso zvaisongana na Dhavhidhi, iyena wainga no cokwadi cokuti Jehovha waimuda. Iyena wakatara kudari: “Jehovha anozozwa kucema kwangu.” (Nduyo 6:8) Pamukuvo umweni Dhavhidhi wakatara magama anosisira atinowana pana Nduyo 56:8. (Verenganyi.) Patinoverenga magama aya tinozwisisa kuti Jehovha anotida maningi, cimwenizve anoneseka ngo mazwiro edu. Dhavhidhi wakazwa inga kuti Jehovha wainga ecitora musoji jake ecijidira mubotiri kana kujitara mu bhuku riri rese. Dhavhidhi wainga no cokwadi cokuti Jehovha waivona no kuceukija kuhwajihwa kwake. Dhavhidhi wainga no cokwadi cokuti Baba wake vano rudo vokudenga vainga vecivona  zvese zvaaingari ecisongana nazvo. Cimwenizve vaizwisisa manera azvaimupsasa.

13. Vamweni pavanotinyangajisa, tinodikana kuceukijenyi? (Vonanyi foto.)

¹³ Ngozvapi zvatinojija? Kureva kuti imwimwi muri kuhwajihwa mu mwoyo ngo ndava yokuti ari wese wamaithemba wamunyangajisa? Kangaije imwimwi muri kuhwajihwa ngokuti namoro yenyu kana kuti mucadho wenyu wapera inga zvamainga mucikaveteri, ngokuti wamaingaro naye wasiya kushandira Jehovha. Hama imweni ino mukaji wakaita uhure no kuisiya, yakati: “Inini andicaitendepi kuti izvi zvandiitikiradi. Inini ndainga ndakasuruvara, ndainga no ushungu, cimwenizve, ndaijizwa ndicina nderemejo.” Kudari ari wese wamusiya kana wamunyangajisa jinyarajenyi ngokuziva kuti Jehovha aazomusiyi. Hama iyi yakati: “Inini ndakazwisisa kuti ushamwari no vandhu ungaguma pakurembejeka asi Jehovha i Buwe redu. Azvinenyi no zvingaitika iyena mukuvo wese aripo. Iyena aazosiyi vaya vakagondeka.” (Nduyo 37:28) Kunja kwa izvi, ceukijanyi kuti mukuvo wese Jehovha anomuda maningi kupinda mundhu ari wese hake. Pamunosiiwa ngo mundhu wamunoda zvinomuhwaja maningi, asi Jehovha aazivi kucinja mazwiro ake kwamuri. Imwimwi munosisira maningi kwaari. (Varoma 8:​38, 39) Zvinosisira nga izvi, azvinenyi no manera amunotajwa ngo ari wese, asi Baba wenyu vokudenga vanomuda.

14. Cigondiso capi catinowana pana Nduyo 34:18?

¹⁴ Kudari ari wese wamusiya, magama a Dhavhidhi anowanika pana Nduyo 34:​18, angamutondhonja. (Verenganyi.) Bhuku rimweni rakananga kuti vaya “vano mwoyo inohwajihwa” vanojizwa inga kuti “avana ciri cese cakanaka cavari kuvetera.” Jehovha anobeseresa kudini vaya vanojizwa kudaro? Kudari inga baba vano rudo vanobata no kutondhoja mwana wavo wakasuruvara, Jehovha “ari phedo” na itusu, mukuvo wese iyena anosengerera na itusu. Cimwenizve, wakanasiririka kuti atibesere paya patinojizwa takasuruvara ngo ndava yokusiiwa ngo ari wese kana kuti kufihwa ngo ari wese. Iyena wakanasiririka kuti atitondhoje no kutinyaraja patinonga tecihwajihwa no paya patinonga takasuruvara. Iyena anotipa zviro zvakawanda kuitira kutibesera kucungirira zvineso zvatinonga tecisongana nazvo pamukuvo wondhowo.—Isaya 65:17.

PAMUNOCEMA NGOKUTAMA KWENYU VETERO JEHOVHA ANOZVIVONA

15. Mugariro wapi wakahwisana na Ezekiya wakamuita kuti aceme?

¹⁵ Paainga no makore anokwana kuita 39, Mambo Ezekiya wo ku Judha wakaziva kuti wainga no ndhendha yaizomuuraya. Muporofita Isaya wakavhunja Mambo Ezekiya masoko  akavha kuna Jehovha okuti ndhendha yaaingari nayo yaizomuuraya. (2 Majimambo 20:1) Zvaivoneka inga kuti Ezekiya aacaingepi no vetero. Ngokuti paakazwa masoko aya Mambo Ezekiya wakasuruvara no kucema maningi. Iyena wakadeketerera Jehovha eciita mukumbiro.—2 Majimambo 20:​2, 3.

16. Jehovha wakaitenyi paakazwa kucema no kudeketera kwa Ezekiya?

¹⁶ Jehovha wakapsaswa ngo kudeketera no kucema kwa Ezekiya, ngokunaka mwoyo o muvhunja kudari: “Ndakazwa munamato wako, ndavona musoji yako. Ndinozokurapa.” Ecishandisa muporofita Isaya, Jehovha wakagondesa ngo unyasha hwese kuti waizoita kuti Mambo Ezekiya ararame makore akawanda no kusujunura Jerusarema mu nyara jo Vaasiriya.—2 Majimambo 20:​4-6.

17. Jehovha anotibeseresa kudini patinonga tecihwisana no ndhendha? (Nduyo 41:3) (Vonanyi foto.)

¹⁷ Ngozvapi zvatinojija? Imwimwi muri kuhwisana no ndhendha iri yese iri kumuita kuti muvone inga mucina vetero? Itanyi mukumbiro kuna Jehovha mecicema. Bhaibheri rinotigondesa kuti: “Baba vakazara ngo usizi na Mwari anotondhoja vandhu vari pa mugariro jiri jese,” vanozotitondhoja pa zvineso zviri zvese. (2 Vakorinte 1:​3, 4) Nyamasi uno, atingaveteri kuti Jehovha avhise zvineso zvese zvatinosongana nazvo, asi tinovetera kuti iyena atibesere kuti ticungirire. (Verenganyi Nduyo 41:3.) Ecishandisa mujimu wake mucena, Jehovha anotipa simba, uzivi no runyararo hwatinoda kuti tihwisane na zvondhozvo. (Mazwi Akangwara 18:14; Vafiripi 4:13) Iyena anotitondhoja ngo kutipekeja vetero yokuti kumbejiyo akuzovizve no mundhu anozohwaja.—Isaya 33:24.

18. I vhesi yapi yamunovona pacenyu kuti ingamutondhoja paya pamunonga mecihwisana no mugariro unonesa? (Vonanyi bhokiso rinoti: “ Magama Anonyaraja Anoita Kuti Musoji Jedu Jiome.”)

¹⁸ Ezekiya wakatondhojwa ngo magama a Jehovha. Mu njira yakaezana, tingawanavo tondhojo mu Soko ra Mwari. Patinonga takasuruvara, masoko a Jehovha anowanika mu Bhaibheri angatitondhoja no kutibesera kuti tive takagajana. (Varoma 15:4) Hambzaji imweni inogara ku Afrika Osidhentari payakabathwa ngo ndhendha yo kanseri, kazinji yaigara yecicema. Iyona inoti: “Vhesi yandinovona pacangu kuti inonditondhoja ngo ya Isaya 26:3. Pikija kuti mukuvo wese tinongwarihwa ndi Jehovha paya patinosongana no zvineso, vhesi iyi yandigondesa kuti Jehovha angandipekeja mushovo umweni wo runyararo unozondibesera kuti ndikwanise kuvona kuti ngozvapi zvandinokwanisa kuita paya pandinosongana no cineso.” Kuno vhesi iri yese yamunovona kuti ingamutondhoja pamunonga muno zvineso zvinovoneka inga zvinonesa maningi, kana kuti zvinomuita kuti mutame vetero?

19. Ngozvapi zvatingavetera?

¹⁹ Tiri kupona kumbhiri ko mazuva okupejisira,  tinovetera kuti zviro zvinotiita kuti ticeme zvinozoenderera mberi zveciengejeka. Inga zvatavona pa muezaniso wa Ana, Dhavhidhi na Mambo Ezekiya, Jehovha anotivona paya patinonga tecicema. Cimwenizve iyena anopsaswa ndizvona. Musoji jedu jinosisira kwaari. Paya patinorembejeka ngo ndava yo mugariro jinonesa jatinonga tecisongana najo, tinovhunja Jehovha zvese zvatinonga tecisongana nazvo ngokuita mukumbiro kwaari. Narini atidikani kugara ndhambo no hama no hambzaji jedu jino rudo jo mu ungano. Cimwenizve, tinodikana kwenderera mberi teciwana tondhojo mu masoko akatahwa mu Bhaibheri. Tingava no cokwadi cokuti kudari tikaenderera mberi tecicungirira takagondeka, Jehovha anozotikomborera. Izvi zvinobatanija cigondiso cinoshamaisa maningi cokuti pakufamba ko nguva, iyena anozopukuta musoji jese mu majiso medu, apanazve anozosuruvara nee akunazve anozotama vetero. (Apokaripsi 21:4) Asi tinozocema basi ngokuti tinonga takadakara.