MU NGUVA jokare, mwanarume paaida kucadha, iyena kana ukama hwake vaidikana kudira mare kuti varovore musikanewo. Kudira mare uku kwaibatanija kudira zviro, zvinyama kana mare kamare. Nguva jimweni mundhu waitorovora ngo kuita mabasa pa muzi wo musikanewo. Inga muezaniso, Jakobe wakatendera kushanda pa muzi pa Rakeri ko makore manomwe kuti acadhe nayena. (Genesi 29:17, 18, 20) Ngocapi cainga cinangwa co cirovejeso ici?

Mujiji umweni wo zvo Bhaibheri anodanwa Karori Mayazi wakati: “Mare yo kurovora kangaije yaidari inga kupagari ukama wo musikane, ngo kuruza kushandihwa ngo musikane wiya, maningi-ningi pa mubhuri jiyane jaipona ngo zvokurima.” Zvinovoneka inga kuti mare yo kurovora yaishandazve kuitira kuvangisa ushamwari waizoumbhwa ngo vandhu vaviri vacadhari. Kubatana uku ko mbhuri kwaisisira maningi pavaisongana no zvineso. Ngo kuti ivona vaizokwanisa kubesana umwe no umweni. Kusiyapo zvondhozvo, mare yo kurovora yainasa kujekesa kuti mwanakaji uwu wainga warovohwa, nokutizve baba wake andivopi waizomutaja no kumungwarira, asi izvi zvaizoitwa ngo mwamunake.

Kudira mare yo kurovora, azvicaireva kuti musikane uwu wainga ecitengeswa inga ciro cinotengwa. Bhuku rinozwi Iziraeri yo Kare, Upenyu no zvirovejeso zvavo, rakati: “Dikano iyi yo kudira mare yo kurovora kana mutengo unodikana ku ukama wo musikane, zvaiita inga kuti Vaiziraeri vaitenga musikane. Asi mare yo kurovora yaidihwa kuitira kudakajisa ukama hwo musikane, kucipiri kutenga musikanewo.”

Nyamasi uno, mu nyika jimweni vandhu vacino cirovejeso co kudira mare yokurovora. Vabari vo Cikristu pavanokumbira mare yo kurovora, ivona vanosiya kuti ‘kuzwisisa kwavo kuzivike ngo vandhu vese’ ngo kutama kukumbira mare yakawanda maningi icikazivi kuezanana. (Vafiripi 4:5; 1 VaKorinte 10:32, 33) Ngo kuita kwavo izvi ivona vanokhombija kuti ‘avadisisi mare’ kana kutodisisa maningi zviro zvakawanda. (2 Timoti 3:2) Kusiyapo zvondhozvo, vabari vo Cikristu pavanotama kukumbira mare yakawanda maningi, mwanarumewo aazojizwi kuvangirijwa maningi kuti acinje njiku yovaizoda kucadha kuti ashande mbhera kuwana mare yokurovora. Kana kuti, iyena aazojizwi kuvangirijwa kuti asiye kushanda inga piyona kuti akwanise kushanda kuitira kuwana mare yakawanda kuti azorovore.

Mu nyika jimweni, mare yo kurovora yakatahwa pa mutemo. Mu nyika iji vabari vo Cikristu vanozwira mutemo iji. Ngenyi? Ngokuti Soko ra Mwari rinonanga kuti Makristu anodikana ‘kuzwira vatongi’ no kuzwira mutemo jese jicikahwisani no mutemo ja Mwari.—Varoma 13:1; Mabasa o Vapostori 5:29.