Bhaibheri arinangi ngo pamusoro po kubhema a kana ngo maitiro amweni okushandisa foha. Ngokudaro, Bhaibheri rina zviyambi zvinotatija kuti Mwari aatenderi zvirovejeso zvakapsipa zvinokhuvaza muviri ngokudaro anovona kubhema inga cishaishi

•   Reremejanyi upenyu. Mwari . . . “anopa vese uhomi, kufema no bziro bzese” (Mabasa o Vapostori 17:24, 25) Upenyu icipo cinobva kuna Mwari, ngokudaro atibviri kuita ciri cese cinogura upenyu wedu, inga kubhema. Kubhema ndi cimwe ciro ciri kuuraya maningi vandhu mu nyika yese, cingakwanisika kuregehwa

•   Idanyi mudoni wenyu. “Unozodisa mudoni wako no madisiro o unojiita iwewe” (Mateu 22:39) Kubhema pabeji po vamweni asipi kutatija rudo. Vandhu vanogara vecipfungujihwa ngo ciusi coari kubhema foha vari mungozi yokuva no ndhendha jinowanika ngo vanobhema

•   Tinodikana kuva vakacena. “Mupire muviri yenyu inga muphaxo unopona, wakacena no unodakajira Mwar” (VaRoma 12:1) “Ngatisuke psina yese yo muviri no yo mujimu yedu, tecipeja basa ro unasi hwedu, tecithya Mwari.” (2 VaKorinte 7:1) Kubhema asipi mugariro o masikihwe otakaitwa zve zvakasiyana maningi no kuva takacena—ngokuti vanoshandisa foha vanokweva zviro zvinokhapija no zviro zvinokhuvaza maningi muviri.

 Bhaibheri arinangi ngo pamusoro po mbhanje kana mutombo jimweni jinodakwisa ja kadari inga mbhanje. Asi kuno zviyambi zvinotatija kuti zvakashata kushandisa mutombo jinodakwisa kuitira mabungaijo. Kunja ko zviyambi zvatatijwa apa, ngativonenyizve zvimweni zvinoshanda:

•   Tinodikana kungwarira murangariro jedu. “Unozodisa Tenji Mwari wako  .  ngo hwiru hwako hwese. (Mateu 22:37, 38) ‘Nasiriranyi murangariro wenyu.’ (1 Pedhru 1:13) Kudari mundhu akashandisa mutombo jinodhakwisa aakwanisi kungwaririra murangariro jake, Kunja kwaizvi, vandhu vazinji avatokwanisi kuita ciri cese vacikana mutombojo. Kunja ko kurangarira zviro zvinovaka, mumusoro mavo munogara mecirangarira kuti vangajiwanisa kudini zve nomashandisire ovanozojiita .—VaFiripi 4:8.

•   Zwiranyi mutemo jo nyika. “Vapurukire vatongi no majimambo.” (Tito 3:1) Munyika zinji, mutemo unorambisa kushandisa mukhaindi jimweni jo mutombo jinodhakwisa. Kudari tinoda kudakajisa Mwari, tinodikana kuzwira vatongi.—VaRoma 13:1.