Asipi kushaisa kumwa doro zviri pakati no pakati. Bhaibheri rinovona doro inga cipo cinobva kuna Mwari, zvokuti ringaita kuti upenyu uve unodakajisa. (Nduyo 104:14, 15; Mucumaeri 3:13; 9:7) Bhaibheri rinonangazve ngo kurapa kunoita doro.—1 Timoti 5:23.

 Jesu wakamwa doro paainga ari pasi pano. (Mateu 26:29; Ruka 7:34) Pa umwe wo mushamaiso jake jinonyanya kuzivikanwa maningi, Jesu wakacinja kumwa kuita doro inga cipo cinosisira kuitira mabuso o mucadho.—Johani 2:1-10.

Ngozi ingavepo ngo kumwa kupindirija mudida

 Pikija hazvo Bhaibheri rinosanangura mavara akanaka o doro, irona rinorambisa kumwa kupindirija mudida no kudhakwa. Ngo kudaro, muKristu anosana kumwa doro anodikana kumwa zviri pakati no pakati. (1 Timoti 3:8; Tito 2:2, 3) Bhaibheri rino mathangwe akawanda anovonesa kuti zvinodikanwa kujivirira kumwa kupindirija mudida.

•  ● Kumwa kupindirija mudida kunokhuvaza murangariro no mugariro wakanaka. (Mazwi Akangwara 23:29-35) Mundhu wakadhakwa aakwanisi kuteveja mupango uwu wo Bhaibheri wo ‘kupira muviri inga mupasho unopona, wakacena no unodakajira Mwari, uri mupasho unonuhira. —VaRoma 12:1.

•  ● Anomwa kupindirija mudida aavi wakajiviririka zve ‘anopera hwiru.’​—Hoseya 4:11; VaEfeso 5:18.

•  ● Kumwa kupindirija mudida kunoita kuti mundhu ave murombo zve kunoviisa zvineso zvo uhomi.—Mazwi Akangwara 23:21, 31, 32.

•  ● Kumwa kupindirija mudida no kudhakwa zvinonyangajisa Mwari.​— Mazwi Akangwara 23:20; VaGaratiya 5:19-21.

Kupindirija mudida kudini?

 Mundhu anopindirija mudida kudari akamwa doro zvokuguma pakujikhuvaza ndirona kana kukhuvaza vamweni. Mukuzwirana no Bhaibheri, kudhakwa akuvoneki basi ngo mundhu ari kudarika, asi kudari mundhu anongaro amwa akatanga kuvonesa mugariro jakadari inga kuita zviro zvinovonesa kuti aazivi kupangwa ushoni, kuvereketesana, kukonehwa kuvereketa ushoni no kufamba ecithethereka kana kutowa, zvinoreva kuti anonga adhakwa ngo dororo. (Jobe 12:25; Nduyo 107:27; Mazwi Akangwara 23:29, 30, 33) Pikija vaya vanojibata kuti vacadhakwa kana kurejera ‘vangaremehwa ngo. . . kurejera’ zvoita kuti vakhauye ngo muviyo jakona.—Ruka 21:34, 35.

Ngopapi pazvingafanera kuti titosiya kumwa doro kamare?

 Bhaibheri rinovonesazve kuti ngopapi pangadikana kuti muKristu atosiya kamare kumwa doro:

•  ● Kudari vamweni vecikhugunyika ngo ndava yo kumwa kwaanoita.​—VaRoma 14:21.

•  ● Kudari munyika maanogararo mecirambija kumwa doro.—VaRoma 13:1.

•  ● Kudari acikagarisiki paya paanondorimwa. Vaya vanomwa kupindirija mudida no vanodhakwa kana kurejera vanodikana kuti vateme civaringo cokusiya kamare.—Mateu 5:29, 30.