Bhaibheri rinosanangura zviitiko no mugariro jinotatija “kupera ko mugariro” uu kana “kupera ko nyika.” (Mateu 24:3; Versão Rei Jaimes) Bhaibheri rinodanija mukuvo uu kuti “njiku jokupejisira” zve “kupejwa ko nyika,” kana “mukuvo . . . wokugumisira.”—2 Timoti 3:1; Dhanyeri 8:19; Baiberi Mazwi Akacena aMwari.

 Bhaibheri rinobhuya ngo zviro zvakawanda zvaizoitika pamwepo zvaizova “citatijo” caizovonesa njiku jo kupejisira. (Ruka 21:7) Vonanyi muezaniso munganani:

 Hondo pa nyika yese. Jesu wakati: “majinja no majinja anozomukirana, umambo no umambo hunozomukirana.” (Mateu 24:7) Cimwenizve, Apokaripsi 6:4 inobhuyavo ngo mupakiri wo haci wo kuezanisira anoimirira hondo “yaizovhisa runyararo pa nyika.”

 Njara. Jesu wakati: “kunozova no njara.” (Mateu 24:7) Bhuku ra Apokaripsi rinobhuya ngo mupakiri umweni wo haci waimirira njara yaizoitika mu ndau jakawanda.—Apokaripsi 6:5, 6.

 Kuzungunyika kukuru ko nyika. Jesu wakananga kuti kwaizova no “kuzungunyika ko nyika mu ndau jakawanda.” (Mateu 24:7; Ruka 21:11) Kuzungunyika kukuru ko nyika kwaizotika pasi pese kwaizovisa zvineso zvakawanda no kuuraya vandhu kupinda kare.

 Ndhwaji no mutungu jinothyisa. Jesu wakananga kuti kwaizova no ndhwaji kana mutungu no zviri ‘zviro zvinothysa.’—Ruka 21:11.

 Kuengejereka ko uphanga. Pikija uphanga uriyo ko makore akawanda, Jesu wakananga kuti mu njiku jo kupejisira kwaizova no “kuwanda ko ushaishi.”—Mateu 24:12.

 Kuphwanywa-phwanywa ko nyika ngo vandhu. Apokaripsi 11:18 yakananga kuti vandhu ‘vaizophwanya-phwanya nyika.’ Vandhu vaizoita izvi ngo njira jakawanda, haiwa basi ngo uphanga kana ngo kuita zviro zvakashata, asi vaizophwanya-phwanya nyika kamare.

 Kuengejereka ko kushata ko mugariro jo vandhu. Pa 2 Timoti 3:1-4, Bhaibheri rinonanga kuti vandhu vaizova “vacikabongi, vacikagondeki, . . . vacikadi kuzwirana no vamweni, vashori, vacikajibati, vanothyisa, vacingadi zvakanaka, vacikathembeki ku vamweni, vano ndhija, vakazara ngo kujikuja.”mugariro Izvo zvaizoitika kakawanda zvoita kuti mukuwo uu udanijwe kuti “mukuvo unonesa kucungirira.”

 Kutama kubatana ko mbhuri. Pana 2 Timoti 3:2, 3, Bhaibheri rakananga kuti vazinji vaizova vandhu “vacikadi ukama” kana kuti avacaizokhombija rudo wo ukama, bhaibheri rakanangazve kuti vana vaizova “vacikazwiri vabari.”

 Kupera ko rudo hwo vandhu kuna Mwari. Jesu wakati: “rudo hwo vazinji hunozopera.” (Mateu 24:12) Jesu wainga ecinanga kuti vandhu vazinji vaizosiya kuda Mwari. Ngo njira yakaezana, 2 Timoti 3:4 inonanga kuti mu njiku jo kupejisira vazinji vaizodisisa “zvinodakajisa muviri kupinda kuda Mwari.”

 Kucengeja pa shwiro jo kunamata. Pana 2 Timoti 3:5, Bhaibheri rainga rakananga kare kuti vandhu vaizovoneka inga vanoshandira Mwari ngo mavonero avo o kunja, asi avacaizoita zvinonangwa mu Bhaibheri kuti zvakanaka.

 Kunasa kuzwisisika ko zviporofita zvo Bhaibheri. Bhuku ra Dhanyeri rakananga kuti “mu mukuwo wokupejisira,” vandhu vazinji vaizonasa kuzwisisa zvokadi zviri mu Bhabheri. Izvi zvinobatanijavo zwisiso yokadi yo zviporofita.—Dhanyeri 12:4, masoko o pasi.

 Kucumaehwa ko masoko akanaka mu nyika yese. Jesu wakati: “Masoko akanaka o Umambo aya, anozocumaehwa pasi pese.”—Mateu 24:14.

 Kutama kutenda ko vandhu no kuseka ngo ndava yo zvitatijo zvokuti mugumo waaphedo. Jesu wakananga kuti vazinji avacaizoneseka ngo kuvona zvitatijo zvokuti mugumo waaphedo. (Mateu 24:37-39) Asipi izvi basi, pana 2 Pedhru 3:3, 4 pakanangavo kuti vandhu vamweni vaizoseka zvitatijo izvi vecinanga kuti apana zvazvinoreva.

 Kukwanirisika ko zviporofita zvese. Jesu wakananga kuti zviporofita zvese izvi zvaizokwanirisika pa mukuwo wondhowo pa njiku jo kupejisira. Bhaibheri arizivi kunanga kuti zvinozokwanirisika zvizinji zvakona kana zvishoma basi.—Mateu 24:33.

 Hina. Zviri kuitika mu nyika yese zviri kuvonesa kamare Zviporofita zvo Bhaibheri kuti njiku jo kupejisira jakatanga mu gore ro 1914, gore iro ndirona rakatanga hondo yokutanga. Vonanyi vhidhiyo inotevera kuti mukhohwe kuti zviri kuitika mu nyika yese zvinovonesa kudini kuti tiri mu njiku jo kupejisira:

 Mu gore ro 1914, Umambo wakatanga kutonga kudenga. Ciro cokutanga cakaithwa ngo umambo uhu, cakava co kugogomera Sathana pamwepo no madhimoni ake vomatendera kuti agare pa pasi pano. (Apokaripsi 12:7-12) Tingavona kushanda kuri kuita Sathana ngo murangariro jakashata jino vandhu pamwepo no kuda kwavo kuita zvakashata. Izvi zvese zviri kuita kuti njiku jo kupejisira jive “mukuvo unonesa kucungirira.”—2 Timoti 3:1.

 Vandhu vazinji vakanyangajwa maningi ngo ndava yo mukuwo uu unonesa. Ivona vari kuneseka ngokuti zviri kuita inga kuti vandhu avacakwanisizve kugara mu runyararo. Vamweni vari kuthya kuti vandhu vanozopejisira ngo kuurayana.

 Ngo divi rimweni, kuno vandhu vokuti vari kunesekavo ngo zviri kuitika um nyika iyi, asi ivona vano vetero kuti zviro zvinozocinja. Ivona vari kuthemba kuti Umambo hwa Mwari unozoita zviri zvese kuti upeje zvineso zvo nyika iyi. (Dhanyeri 2:44; Apokaripsi 21:3, 4) Vandhu ava vari kuvetera ngo cido cese mukuwo wokuti Mwari anozokwanirisa zvese zvaakananga. Ivona vanowana nyarajo kuvha pa masoko a Jesu paakati: “Asi wiya anocungirira mbhera ku magumo, anozoponeswa.”—Mateu 24:13; Mikeya 7:7.