Uri kuenda ku ndau yaunoda maningi, zve unoda kuti shamwari jako jizive zvese ngo pamusoro po hwendo hwako! Waizozviitisa kudini?

1.   Waizotumira foto ku imwe nga imwe yo shamwari jako?

2.   Waizotara mesajhi kuno shamwari jako jese?

3.   Waizodira foto jako mu interneti munovoneka ngo vandhu vese?

 Munguva yakapona majicekuru ako aciri no mupira wako, mupinguro wa “A” ndiwona kazinji waishandiswa.

 Munguva yakapona majibaba ako aciri no mupira wako, mupinguro wa “B” ndiwona kazinji waishandiswa.

 Nyamasi uno, vocidoko vazinji vanodira foto mu interneti munovoneka ngo vandhu vese, vanozvivona zviri nane kushandisa mupinguro wa “C.” Iwewe keni, unoitavo zvondhozvo? Kudari wecizviita, musoro uno unozokubesera kuti ucawira mu murau jimweni jingawanika ngokudaro.

•  Muviyo japi jakanaka jiripo?

•  Ingozi yapi iripo?

•  Zvaunodikana kuita

•  Zvinonangwa ngo vadoni vako

 Zvinokasika. “Pandinoita hwendo hunodakajisa kana kuva no nguva inodakajisa no shamwari, ndingatotumira foto panguva yondicadakajihwaro ndizvona kamare.”​—Melanie.

 Zvakareruka. “Kudari ndecida kuziva kuti shamwari yangu yakadini, zviri nane maningi kushandisa foto kunja ko kuita kutumira mesajhi kuti ndizwe kuti wakadini.”​—Jordan.

 Zvinokubesera kuti urambe weciziva zviri kuitika kuno vamweni. “Shamwari jangu no hama jangu jimweni vanogara ndhambo neni. Kudari vakadira foto mu interneti nguva jese zve ininivo ndikaramba ndecienda koovona fotojo nguva jese, zvinoita inga kuti ndiri kuvavona nguva jese!”​—Karen.

 Ungadira kujiviririka kwako pangozi. Kudari kamera yako icikhombija kwaunogara no ndau yowabvisira fotoyo, kudira foto mu interneti munovoneka ngo vandhu vese kungabara zvimweni zvinodarika zvowairangarira. Saiti inozwi Digital Trends yakati: “Kudira foto kana ciri cese cinokhombija kwaunogara kamare mu interneti, zvingapa mukana vano murangariro wakashata kuti vawane kunogara mundhu wadiraro.”

 Ngozvokadi kuti vandhu vamweni vakashatihwa mwoyo vanonyanya kupsaka zviciripi izvona kwauri. Inga zvakanangwa ngo Digital Trends, pano mukuvo umweni wokuti mbavha ndhatu jakaba muzi jinokwana 18 panguva yo kuti jainga jicina vandhu. Jakazvizivisa kudini mbavha iji kuti jaizoguma muzi iji jicina vandhu? Ngokushandisa mapsakiro unozwi cybercasing, mbavha iji jakapsakisira jecishandisa interneti kuitira kuvona kuti muzijo jainga jino vandhu kana kuti haiwa. Jakaba zviro zvinoguma ku mutengo unokwana kuita 100,000 zvo madhora.

 Ungawanana no zvakashata. Vandhu vamweni avapseruki kudira ciri cese kuti mundhu wese acivone. Musikane anozwi Sarah anoti: “Pozvingashatira ngo pokunghwira mu konta yo mundhu waucikazivi. Zvakagara inga kufamba mu dhorobha maucikazivi ucina anokukhombija gwanja kana ucina mapa. Kazinji unoenda ku ndau yowainga ucikadi kwenda.”

 Nguva yako ingapera. Musikane anozwi Yolanda anoti: “Zvakareruka kukwevejehwa ngo kuda kuvona zvapejisira kudihwa mu interneti no kuverenga zvananga vamweni. “Ungazoguma pa kugara uno foni munyara nguva jese kuti uvone kuti izviro zvapi zvipsa zvadihwa.”

 Musikane anozwi Samantha wakazvitenderavo. Iyena wakati: “Ndinodikana kupungura nguva yandinopeja ndiri mu saiti iji.” “Unodikana kujingwarira kamare kudari wecida kuva no konta yo kudira foto mu interneti.”

•   Ucatendera kuvona zviro zvakashata. Bhaibheri rinoti: “Andizodiri ciro cakaxata pambeji po majiso angu.”​—Nduyo 101:3.

   “Nguva jese ndinopopora zvinodihwa ngo vaya vandinotevera, ndikandovona kuti vodira zviro zvicizivi kunaka ndinoregera kuvatevera.”​—Steven.

•   Gura ushamwari no vandhu vano mugariro jakasiana no jako, ngo kuti vangapeja mugariro jako jakanaka. Bhaibheri rinoti: “Mucadocengejwa: Vadoni vakaxata vanovoja maitiro akanaka.”​—1 VaKorinte 15:33.

   “Ucatendera mukhuva wokudira kana kuvona foto mu interneti ngo kuti zvinoizwa ngo vandhu vazinji. Ngokuti kazinji ndipona pounosongana no magama okutuka, zvoumitu-mitu, no mugariro jimweni jakashata.”​—Jessica.

•   Gaja nguva yaunozoda kupeja wecivona no kudira foto. Bhaibheri rinoti: “Ngokudaro, vonesesanyi kufamba kwenyu: Mucaita inga mapenji. Itanyi inga vazivi, mecingwarira nguva.”​—VaEfeso 5:​15, 16.

   “Ndinoregera kutevera vandhu ‘vanowanja zvokudira.’ Inga muezaniso, mundhu anoenda ku praia perapo odira 20 o foto panguva imwe. Zvokadi kamare zvinopeja nguva yakareba kuti uvone fotojo jese!”​—Rebekah.

•   Iva no cokwadi cokuti foto jaunodira ajina mugariro wokuda kuvonesa zvese ngo pamusoro pako. Mutari wo Bhaibheri Pauro anoti: “Ndinobvunja mundhu no mundhu, kuti acajivona kupinda zvokudikana.” (VaRoma 12:3) Ucarangarira kuti shamwari jako jinozokahamara ngo foto no mabasa ako.

   “Vandhu vamweni vanodira foto jakawandisa jovanojibvisa vega. Kudari tiri shamwari, ndinoziva mugariro wako, ngokudaro andidi kuramba ndeciceukijwa kana kuyeujirihwa!”​—Allison.