Mbela opu na ethimbo limwe wa li kuu shi kutya ninga shike sho gumwe ngoka wu shi a silwa? Omathimbo gamwe ohashi vulika tu kale kaatu shi kutya natu tye shike nenge tu ninge shike, onkee ohatu iyadha owala itaatu popi sha nenge itaatu ningi sha. Ihe opu na iinima mbyoka tatu vulu okuninga, mbyoka tayi vulu okukwathela.

Olundji shoka wa pumbwa okuninga, okukala po nokulombwela ngoka e li moluhodhi kutya nangoye owu uvite nayi. Momithigululwakalo odhindji, okupapatela owala omuntu nenge wu mu kwate mokwaako oku li omukalo ngoka tagu ulike kutya owu na ko nasha naye. Ngele nakusilwa okwa hala okupopya sha, pulakena nolukeno. Shoka sha dhenga mbanda, okukwathela uukwanegumbo mboka wa silwa, tashi vulika mokuninga iinima mbyoka itaaya vulu okuninga, ngaashi okuteleka, okutonatela aanona nenge okukwathela mokuninga omalongekidho gefumviko ngele osha pumbiwa. Okuninga ngaaka oku li ekwatho enene.

Pethimbo tuu mpoka, oto vulu wu popye kombinga yanakusa, tashi vulika wu popye kombinga yuukwatya we uuwanawa nenge kiinima iiwanawa mbyoka a ninga. Okupopya kombinga yiinima mbyoka otashi vulu okumbilipaleka nakunika oluhodhi. Pashiholelwa, Pam ngoka a silwa omusamane gwe, omimvo hamano dha ka pita, ota ti: “Aantu omathimbo gamwe ohaya lombwele  ndje iinima iiwanawa mbyoka Ian a ninga kaandi yi shi nando onale, naashika ohashi nyanyudha ndje.”

Aaningi yomapekapeko otaya ti kutya aantu oyendji mboka ya silwa ohaya kwathelwa lela petameko, ihe shoka ya pumbwa ohashi dhimbiwa nziya sho ookuume haya kala ishewe yi ipyakidhila niinima yawo yene. Onkee ano, shi ninga elalakano lyoye wu kale ho ningi oonkambadhala, wu kwatathane aluhe nakuume ngoka a silwa, konima yeso lyomuholike gwe. * Aantu oyendji mboka ya silwa ohaya pandula oompito ndhoka dhokupopya kombinga yoluhodhi lwawo ndoka ya kala ye na ethimbo ele.

Natu tale koshiholelwa shaKaori, omukadhona omugundjuka Omujapani ngoka a li a dhengwa pomutima sho a silwa meme gwe, e ta ku landula ishewe omumwayinakadhona konima yoomwedhi 15. Ihe oshi shi okupandulwa, sho ookahewa ke ya kala noku mu kwathela. Kahewa ke gumwe gwedhina Ritsuko, omukuluntu lela kuye nokwa li a ningi kuume ke kopothingo. Kaori ota ti: “Uushili owo kutya kanda li nde shi nyanyukilwa. Kanda li nda hala nando ogumwe a ninge ishewe meme, nokanda li nda dhiladhila ngele opu na gumwe ta vulu oku shi ninga. Ihe momukalo moka meme Ritsuko u ungaunga nangame, onda ka kala ndi na ekwatathano lyopothingo naye. Oshiwike kehe, otwa li hatu ku uvitha notwa li hatu yi kokugongala kwopaKriste pamwe. Okwa li a hiya ndje tu ka nwe otee, a landele ndje iikulya nokwa li ha nyolele ndje oontumwafo nuukalata iikando oyindji. Etaloko ewanawa lyameme Ritsuko olya nwetha ndje mo nawa.”

Ngashingeyi opwa pita omimvo 12 sho meme gwaKaori a si. Nonena ye nomusamane gwe aauvithi yethimbo alihe. Kaori ota ti: “Meme Ritsuko natango oha kwathele ndje. Uuna nda yi kegumbo, ohandi mu talele po nohandi nyanyukilwa eendathano lyetu naye.”

Oshiholelwa shagumwe ishewe ngoka a mona uuwanawa mekwatho ndyoka a kala ta pewa, oPoli, ngoka naye e li Onzapo yaJehova a kala muCyprus. Poli okwa li e na omusamane omunalukeno, Sozos, ngoka a tula po oshiholelwa oshiwanawa e li omukuluntugongalo. Okwa li ha hiya olundji oothigwa naaselekadhi kegumbo lyawo ye endathane nokulya pamwe. (Jakob 1:27) Shi nikitha oluhodhi, Sozos okwa si mepipi lyomimvo 53 koshitumba shoka sha li kuuluyi. Poli okwa ti: “Onda silwa omusamane gwandje omudhiginini ngoka twa kala naye mondjokana uule womimvo 33.”

Konima yefumviko, Poli okwa tembukile koKanada nokamwanamati kokankelo komimvo 15, Daniel. Sho ya yi hoka, oya tameke okweendathana negongalo lyOonzapo dhaJehova. Poli ota ti: “Ookuume megongalo lyetu epe kaya li ye shi sha kombinga yonakuziwa yetu nokombinga yonkalo yetu ondhigu. Ihe shoka inashi ya imba ye ye kutse ye tu hekeleka noohapu dholukeno noku tu kwathela. Ekwatho ndyoka kalya li tuu lya pumbiwa, unene tuu pethimbo ndyoka okamwandjemati ka li ka pumbwa he! Aakuluntugongalo oya li lela yu ulike kutya oye na ko nasha naDaniel paumwene. Oshinima shimwe shoka ya li haya ningi, okuhiya Daniel e ye a nyanyukilwe eendathano nookuume nokudhana etanga pamwe naye.” Meme Poli nokamwanamati oye li nawa sigo onena.

Odhoshili kutya opu na omikalo odhindji moka tatu vulu okukwathela nokuhekeleka oonakusilwa. Ombiimbeli otayi tu hekeleke wo sho tayi popi kombinga yetegameno tali shambula lyonakuyiwa.