SARA okwa kala a thikama mondunda ta talatala. Kala ando wa fa wa tala omukiintu gwomUuzilo wopokati, e na omeho omawanawa. Mbela ota monika a yemata? Ngele osho, oshi shi okuuviwa ko kutya omolwashike. Megumbo lyawo omwa li mu na ondjokonona. Ye nomusamane gwe omuholike, Abraham, oya kala taya nyanyukilwa mo ethimbo ele. * Oya li yu uvitile mo uugumbo megumbo lyawo.

Oya li haya kala muUr, oshilando oshiyamba shu udha omangomba, aahambudhi naahalithi. Onkee ano, oya li ye na iiniwe oyindji. Sara ka li owala a tala ko egumbo lyawo li li ehala lyokupungula iinima ye. Uule womimvo, ye nomusame gwe, oya kala mo taya nyanyukilwa iinima iiwanawa nokwiidhidhimikila omashongo. Oya kala mo taya galikana Kalunga kawo, Jehova, lwiikando oyindji. Sara okwa li e na omatompelo ogendji gokukala e hole egumbo lyawo.

Sara okwa li e na ehalo lyokuthiga po iinima ayihe mbyoka i igilila. Nonando otashi vulika a li e na omimvo 60 lwaampono, okwa li ta ka ya komahala hoka kee shi. Onkalamwenyo ye oya li tayi ka kala yu udha omaupyakadhi noya dhigupala, noka li e na etegameno lyokushuna kuUr. Oshike sha lundulula onkalamwenyo ye thiluthilu? Oshike tatu vulu okwiilonga keitaalo lye?

Otashi vulika Sara a putukile muUr. Ngashingeyi oshilando shoka osha yonuka po. Ihe pethimbo lyaSara, aahalithi oya li haya endaenda nuuwato wawo momeya nomuunala womulonga gwaEufrat, taye eta iinima yondilo moshilando shoka oshiyamba, okuza komahala gokokule. Aantu oya li haye ende ya thinana momapandaanda gaUr, ooskepa odha li dha thinana nodha tegamathana petulilo lyooskepa nomahala gasho gomalandithilo oga li gu udha iinima. Dhiladhila kuSara ta putukile moshilando moka mu na omaipyakidhilo, nokwa li e shi aantu oyendji komadhina. Aantu nayo oya li ye mu shi, oshoka okwa li omukiintu a shitika naanegumbo lyawo oya li oyendji.

Sara okwa tseyika mOmbiimbeli, omolweitaalo lye lya kola, ihe ka li i itaala moshikalunga shomwedhi, shoka sha li hashi longelwa apuhe muUr. Oshungo yoshikalunga shoka oya li yi iwetikile moshilando. Sara okwa li ha longele Kalunga kashili, Jehova. Ombiimbeli inayi popya kutya oshe ende ngiini a kale neitaalo lya kola. Opu na ethimbo limwe he a li ha longele iikalunga. Konima yethimbo, Sara okwa hokanwa kuAbraham, ngoka e mu vule nomimvo omulongo. * (Genesis 17:17) Lwanima, Abraham okwa ka tseyika e li “he yopambepo yaayehe mboka yi itaala Kalunga.” (Aaroma 4:11) Ondjokana yawo oya li ya kola notayi ende nawa, oshoka oya li ya simanekathana, haya kundathana nawa nokulongela kumwe ya kandule po omaupyakadhi. Shoka sha dhenga mbanda osho kutya ayehe yaali oya li ye hole Kalunga.

Sara okwa li e hole Abraham noonkondo, noya li ye  na egumbo muUr, moka mwa li aakwawo. Ihe konima yethimbo, oya taalele eshongo limwe. Ombiimbeli otayi ti kutya Sara “okwa li ihaa vala.” (Genesis 11:30) Meputuko lyawo nopethimbo ndyoka, omukiintu shampa ihaa vala, okwa li a dhinika. Nonando ongawo, Sara okwa kala omudhiginini kuKalunga nokuAbraham. Omwanagona gwawo, Lot, ngoka a li othigwa, okwa ka kala a fa omwanamati gwawo. Onkalamwenyo yawo osho ya kala ngaaka sigo oosho ya ka lunduluka.

Esiku limwe Abraham okwe ya kuSara a nyanyukwa noonkondo. Osha li oshidhigu kuye okwiitaala shoka sha ningwa po. Kalunga ngoka haya longele okwa popi naye, sho e mu ihololele okupitila momuyengeli. Kala ando wa fa wu wete Sara ta tala omusamane gwe a kumwa ta pula ta ti: “Okwa ti ngiini? Alikana lombwela ndje!” Otashi vulika Abraham a kuutumba tango, a ngungumaneke omadhiladhilo ge. Opo ihe okwa lombwele Sara shoka Jehova a ti: “Thiga po ezimo lyoye noshilongo sheni, u ye kevi ndyoka tandi li ku ulukile.” (Iilonga 7:2, 3) Konima sho enyanyu lyawo lya loto, oya dhiladhila kombinga yoshinakugwanithwa shoka ya pewa kuJehova. Oya li ye na okuthiga po onkalamwenyo yawo yuuzeko noku ka kala oondjendi. Sara okwa li te ki inyenga ngiini? Abraham okwa li e mu tegelela nolukeno a tye sha. Mbela Sara okwa li ngaa a hala oku mu ambidhidha ya tembuke?

Mbela ando ongoye wa li Sara, ando owa ningi po shike? Otashi vulika wu tye: ‘Ngame Kalunga ina pula ndje nando onale nenge kuume kandje kopandjokana, tu ninge oshinima sha fa mpono!’ Mbela atuheni ihatu pulwa tu ninge oshinima sha faathana? Otu li muuyuni mbuka aantu ye hole eliko, notashi vulika wu tu ningithe tu pitithe komeho iiniwe yetu, uuwanawa wetu negameno lyetu. Ombiimbeli otayi tu ladhipike tu pitithe komeho iinima yopambepo, ano tu nyanyudhe Kalunga pehala lyokwiinyanyudha tse yene. (Mateus 6:33) Sho tatu tedhatedha kwaashoka Sara a ningi, otashi vulika tu ipule ngeyi: ‘Ehogololo lini tandi ka ninga monkalamwenyo?’

Sho Sara ta pakele iinima ye, okwa li e na okuhogolola shoka ta yi nasho naashoka ta thigi po. Ka li ta vulu okupakela iinima iinene mbyoka itaayi vulu okuhumbatwa kuusino nokoongamelo, oshoka oya li tayi ka dhigupaleka onkalamwenyo yawo yokutembukatembuka. Osha yela kutya iiniwe yawo oyindji, oya li taye ke yi landitha po nenge ye yi gandje po. Okwa li wo e na okuthiga po iinima mbyoka ya li ya ningitha onkalamwenyo yomoshilando ompu. Iinima mbyoka ongaashi omahala gokulandithila, hoka ha yi nuupu a ka lande iilya, onyama, iiyimati, iizalomwa niinima yilwe mbyoka a pumbwa nokwa hala.

Otashi vulika sha li wo oshidhigu kuSara a thige po egumbo lyawo. Ngele olya li lya fa omagumbo ogendji gomuUr, ngoka aalafululi ya popi, osha yela kutya  Sara okwa thigi po egumbo lyondilo. Omagumbo gamwe oga li ge na oondunda odhindji, oothithiya dhomeya ga talala nawa nuundjugo. Nokuli nomagumbo omashona otashi vulika ga li ga kola noge na omiyelo hadhi patwa niitenda. Mbela otenda otayi vulu ngaa okugamena omuntu koombudhi? Mbela otayi vulu ngaa okugamena omuntu kiilikama ngaashi oonime, oongwe, omamwanka nomambungu, mbyoka ya li ya ha miilongo yopethimbo lyonale?

Ongiini kombinga yaanegumbo lye? Sara okwa li ta ka thiga po oolye? Elombwelo lyaKalunga ndyoka tali ti “thiga po ezimo lyoye noshilongo sheni,” otashi vulika lya li eshongo kuye okuvulika kulyo. E li omukiintu omunahole nomunalukeno, Sara otashi vulika a li e na aamwayinamati, aamwayinakadhona, oyanagona, ooyinagona noohekulu, mboka a li e na ekwatathano lyopothingo nayo. Otashi vulika wo a li itee ke ya mona we. Nonando ongawo, Sara okwa li a pula komeho esiku nesiku, i ilongekidhile etembu.

Nonando opwa li omashongo, Sara okwa pakele iinima ye nokwi ilongekidha okuya, sho esiku lya thiki. Tera, ngoka a li omutse gwegumbo, okwa yi pamwe naAbraham naSara, nonando okwa li e na omimvo 200 lwaampono. (Genesis 11:31) Sara okwa li e na oshinakugwanithwa shokusila oshimpwiyu he ngoka a kulupa. Lot naye okwa yi nayo, sho ya vulika kuJehova e taya “thigi po evi lyaBabilonia [Kaldea].” — Iilonga 7:4.

Oya yi tango kuumbangalantuninginino yu uka kuHaran, pu na ookilometa 960 lwaampono, ya landula omulonga gwaEufrat. Aanegumbo mbaka oya ka kala uule wethimbo lyontumba muHaran. Pethimbo mpoka, Tera otashi vulika a li te ehama noka li we ta vulu okutsikila nolweendo. Omo ya kala moka sigo Tera a si mepipi lyomimvo 205. Pompito yimwe manga inaaya tsikila nolweendo lwawo, Jehova okwa popi natango naAbraham. Okwe mu lombwele a thige po Haran e ta yi kevi hoka te mu ulukile. Oshikando shika Jehova okwe mu uvanekele a ti: “Otandi ke ku pa oluvalo olwindji.” (Genesis 12:2-4) Sho ya zi muHaran, Abraham okwa li e na omimvo 75 omanga Sara omimvo 65, nokaya li ye na aanona. Ongiini nduno oluvalo olwindji talu ka za muAbraham? Mbela ota ka konga po omukulukadhi gumwe? Okuhokana ombanda okwa li kwa ha pethimbo ndyoka, na Sara otashi vulika a li ti ipula noshinima shoka.

Nonando ongawo, oya thigi po Haran e taya pula komeho. Mbela oya li noolye? Ombiimbeli otayi tu lombwele kutya aanegumbo yaAbraham oya yi nomaliko gawo agehe “naapika ayehe ya li ye ya na muHaran.” (Genesis 12:5) Osha yela kutya Abraham naSara oya li ya lombwele mboka ya hala okupulakena kuyo, kombinga yaashoka yi itaala. Omahokololo gamwe gonale gAajuda otaga ti kutya aantu mboka ya popiwa movelise ndjika oomboka yi itedhulula, e taya wayimine Abraham naSara mokulongela Jehova. Ngele osho, nena eitaalo lyaSara lya kola olyo lya li lye mu ningitha a tompe mboka ta popi nayo kombinga yaKalunga ke nosho wo yetegameno lye. Onawa tu tedhatedhe kombinga yaSara. Omolwashike mbela? Oshoka otu li muuyuni mbuka aantu kaaye na eitaalo netegameno. Ngele owi ilongo oshinima oshiwanawa mOmbiimbeli, shi lombwela wo yalwe.

Konima sho ya taaguluka omulonga gwaEufrat, tashi vulika mo 14 Nisan 1943 K.E.N., oya yi kuumbugantu yu uka kevi ndyoka Jehova e yu uvanekele. Nisan omwedhi gwOshijuda. (Eksodus 12:40, 41) Kala ando wa fa wu wete Sara ta talatala a fuulwa kuushitwe wi ili nowi ili nokonkalo yombepo ombwanawa yomevi ndyoka. Popepi nomiti ominene dhaMore, popepi naShekem, Jehova okwa li ishewe i ihololele Abraham, e ta ti kuye: “Oshilongo shika otandi ke shi pa oluvalo lwoye.” Uutumbulilo “oluvalo” kawa li tuu tawu ti sha kuAbraham! Osha yela kutya owe mu ningitha a dhiladhile kombinga yoshikunino shaEden, moka Jehova a hunganeke kutya oluvalo otalu ka hanagula po Satana esiku limwe. Jehova okwa adhika a lombwela nale Abraham kutya aantu ayehe kombanda yevi otaya ka lalekwa nuuyamba, okupitila moluvalo lwe. — Genesis 3:15; 12:2, 3, 6, 7.

Uukwanegumbo mbuka nawo owa li hawu adhika komaupyakadhi gomuuyuni mbuka. MuKaanan omwa li ondjala yekomba, na Abraham okwa tokola a ye kuEgipiti naanegumbo lye. Ihe okwa li e wete uupyakadhi mboka tawu ke ya adha muEgipiti. Okwa kunkilile Sara a ti: “Ngoye omukiintu wa shitika. Ngele Aayegipiti taye ku mono, otaa ka dhiladhila kutya ngoye ogwandje. Oyo notaa dhipaga ndje po notaye ku etha u kale nomwenyo. Ya lombwela kutya ngoye omumwameme; nena otaa hupitha ndje molwoye e  taa ningi ndje nawa.” (Genesis 12:10-13) Omolwashike Abraham a li a lombwele Sara ngawo?

Abraham ka li omufundja nenge ekatalume ngaashi aagandji yuusama yamwe haya ti. Sara okwa li shili omumwahe gwaAbraham. Abraham okwa li e na omatompelo omawanawa gokukala a kotoka. Yo naSara oya li ye shi shi kutya kapu na shoka sha simana shi vule elalakano lyaKalunga li na ko nasha noluvalo lwi ikalekelwa noshigwana shoka tashi ka za muAbraham. Onkene egameno lyaAbraham olya li lya simana li vule iinima ayihe. Uuyelele waalafululi owe shi koleka kutya aalumentu Aaegipiti, mboka ye na oonkondopangelo, oya li haya kutha po aakulukadhi yaantu nokudhipaga aasamane yawo. Onkee ano, Abraham okwa li a katuka pandunge, na Sara okwa tsu kumwe naye.

Omathimbo hamale, shoka Abraham a li a tila osho sha ka ningwa. Omalenga gamwe gomukwaniilwa Farao oga mono nkene Sara a shitika, nonando okwa li a koka. Omalenga oge shi hokololele omukwaniilwa, ngoka a gandja elombwelo, opo Sara e etwe kuye. Onkalo ndjoka oya li ya gwilila po Abraham, na Sara okwa li a tila noonkondo. Osha fa shi Ii ngeyi kutya Sara okwa li u ungaungwa naye ngaashi omuyenda a simana, ihe hangaashi onkwatwa. Otashi vulika omukwaniilwa a li a hala okuheka Sara noku mu fuula nomaliko ge. Opo ihe ta ka kundathana naAbraham nawa, opo Sara a ninge po omukadhi. — Genesis 12:14-16.

Dhiladhila kuSara ta tala evi lyaEgipiti, sho e li muuwa. Okwa li u uvite ngiini, sho e li metungo ishewe nota pewa iikulya iiwanawa? Mbela onkalamwenyo ndjoka yuuzeko, tashi vulika yi vule ndjoka yokuUr, oya li ye mu fuula? Ando Sara okwa li e etha po Abraham nokuninga omukadhi gwaFarao, ando Satana okwa ka yololela ketayego! Ihe shoka hasho Sara a ningi. Okwa li omudhiginini kuAbraham, kondjokana yawo nokuKalunga ke. Itashi ka kala tuu oshiwanawa, ngele aaihokani ayehe oya kala aadhiginini ngaashi Sara muuyuni mbuka aantu ye hole oluhondelo! Omolwashike itoo holele Sara mokukala omudhiginini, uuna tu ungaunga naamboka wu hole nonookuume koye?

Jehova okwa yi mo olunyala a gamene Sara, sho a tumine Farao naanegumbo lye uuvu uudhigu. Sho Farao e shi mono kutya nani Sara omukulukadhi gwaAbraham, okwe mu shuna kuye nokwa li a pula Abraham negumbo lye alihe ya ze mo muEgipiti. (Genesis 12:17-20) Abraham okwa li lela a nyanyukwa, sho a galulilwa omukadhi. Dhimbulukwa kutya okwa li e mu lombwele a ti: “Ngoye omukiintu wa shitika.” Onkee ano, okwa li e hole Sara, omolwuukwatya we uuwanawa, mboka wu vule eholokopo lye. Sara okwa li e na eopalo lyomeni, uukwatya mboka Jehova a lenga. (1 Petrus 3:1-5) Atuheni otwa pumbwa okukala tu na uukwatya mboka. Otatu ka holela eitaalo lyaSara, ngele otwa pititha komeho iinima yopambepo pehala lyomaliko, ngele tatu lombwele yalwe shoka tu shi kombinga yaKalunga nosho wo ngele tu li aadhiginini komithikampango dhaKalunga, uuna tatu makelwa.