Kalunga oha kala ngaa e ku wete?
SHOKA TATU ILONGO KESHITO
Ominute 60 dhotango uuna okanona ka valwa ohali kala ethimbo lyelunduluko enene kokahanona. Omolwashike? Omolwaashoka aavalakadhi mboka haya kala ye na ekwatathano nuuhanona wawo pethimbo ndika, ohashi kwathele noonkondo, opo uuhanona wawo wu koke nawa. *
Oshike hashi ningitha omuvalakadhi a kale e na ko nasha nokahanona ke? Omuprofesoli Jeannette Crenshaw okwa yelitha moshileshomwa shedhina The Journal of Perinatal Education kutya oholomone yo-oxytocin “ohayi ningitha omukiintu a kale u uvitile okamwana ohole e li yina sho te ka kwata, sho te ka tala naasho te ka yamutha.” Oholomone yilwe ndjoka hayi holoka molutu pethimbo ndika “ohayi kwathele yina a kale e na ko nasha nokanona ke” nohayi mu ningitha a kale ta dhana nako nokupopya nako. Omolwashike shika sha simana?
Ekwatathano lyopothingo ndyoka hali kala pokati kayina nokahanona olya shitwa po kOmushiti gwetu omunahole, Jehova Kalunga. * Omukwaniilwa David okwa li a pandula Kalunga molwaashoka ‘koonkondo dhe okwa li e ya muuyuni’ nokwa kala e mu gamena miikaha yayina. Okwa galikana a ti: “Onde ku inekele okuza kesiku nda valwa, nowa kala aluhe Kalunga kandje.” — Episalomi 22:9, 10.
DHILADHILA KWAASHIKA: Ngele Kalunga okwa shita omukalo nguka gwa kitakana opo a shilipaleke kutya omuvalakadhi ota ka kala nawa nokanona ke nokugwanitha po oompumbwe dhako, mbela kashi li ngaa pandunge okudhiladhila kutya Kalunga oha kala e na ko nasha natse paumwene tu li “aana yaKalunga”? — Iilonga 17:29.
SHOKA OMBIIMBELI TAYI LONGO KOMBINGA YANKENE KALUNGA E NA KO NASHA NATSE
Jesus Kristus ngoka e shi nawa Omushiti e tu vule okwa li a longo aantu a ti: “Omanza gaali itaga landithwa po nani nando okapeni kamwe akeke? Nokuli kapu na nando olimwe lyomugo tali gwile pevi, Ho ngele ina hala. Nomafufu geni agehe gokomutse oga yalulwa. Ano inamu tila: one mu vule omanza ogendji.” — Mateus 10:29-31.
Aashona owala yomutse hatu gandja eitulomo kuudhila uushona mboka hatu mono, nongele nee nokuli kamwe komuwo ka gwile pevi ihatu pupu ko. Ihe Tate yetu gwomegulu oha kala e wete kehe kamwe komuwo! Ihe uudhila nokuli nando owundji, kawu na ongushu yi vule yomuntu. Oshiilongomwa osha yela: Ino kala nando wa “tila” kutya pamwe Kalunga ke ku wete. Mepingathano naashono, oku na ko nasha nangoye shili!
Kalunga oku na ko nasha natse shili nohe tu tonatele pahole
Omanyolo otage tu shilipaleke
-
“Omeho gOmuwa oga tala akuhe, ohaga tongolola aawinayi naawanawa.” — OMAYELETUMBULO 15:3.
-
“Omuwa oha tonatele aayuuki noha pulakene okulila kwawo.” — EPISALOMI 34:15.
-
“Otandi nyanyukwa nokutanta omolwesilohenda lyoye. Ou wete okuhepekwa kwandje nowa tseya uudhigu wandje.” — EPISALOMI 31:7.
“ONDA LI NDU UVITE KAANDI HOLIKE KUJEHOVA”
Otashi tu etele ngaa uuwanawa washa monkalamwenyo ngele otu shi kutya Kalunga oku na ko nasha natse shili nohe tu tonatele pahole? Eeno otashi wapa, ngaashi Hannah, * gwokoIngilanda e shi yelitha:
“Iikando oyindjiyindji onda li handi iyadha ndu uvite kaandi holike kuJehova nosho wo kutya omagalikano gandje kaga li haga yamukulwa. Onda li tandi dhiladhila kutya pamwe oosho kaandi na eitaalo lya kola. Onda li ndi wete kutya onda li tandi geyelwa nenge itaandi pupwa molwaashoka inandi simana. Onda li ndi wete kutya Kalunga ke na ko nasha nangame.”
Ihe nonando ongawo, Hannah ke na we omalimbililo ngele Jehova oku na ko ngaa nasha naye noku mu hole. Oshike she mu kwathele a lundulule nkene a li u uvite? Okwa ti: “Elunduluko olya li lye endele ko. Onda dhimbulukwa oshipopiwa shimwe shopaMbiimbeli sha gandjelwe pwa pita omimvo odhindji ngashingeyi kombinga yekuliloyambo lyaJesus, shoka sha li sha gumu ndje noonkondo nosha shilipalekulula ndje kutya Jehova oku hole ndje. Uuna omagalikano gandje ga yamukulwa, olundji ohandi lili, oshoka ohandi mono kutya nani Jehova oku hole ndje. Okukonakona Ombiimbeli nokukala pokugongala kwopaKriste okwa longa ndje wo oshindji kombinga yaJehova, uukwatya we nankene ha kala e tu uvitile. Ngashingeyi ondi shi nkene Jehova he tu kwathele nankene e tu hole atuhe nosho wo kutya oku na ehalo lyoku tu sila oshimpwiyu pauhandimwe.”
Shoka Hannah a popi otashi tsu omukumo shili. Ihe ongiini ngoye to vulu okukala nuushili kutya Kalunga oku uvite ko omaiyuvo goye nohe ga kaleke momadhiladhilo? Oshitopolwa tashi landula ko otashi yamukula epulo ndika.
^ Aavalakadhi yamwe mboka haya kwatwa kepolimano konima yokumona, ohashi vulika shi kale oshidhigu kuyo okukala ye na ekwatathano nuuhanona wawo. Ihe nonando ongawo, kaye na okukala yu uvite ye na ondjo. Pakupopya kwehangano li na ko nasha nuundjolowele wopamadhiladhilo lyaAmerika (U.S. National Institute of Mental Health) Epolimano lyokonima yokumona “olya fa hali etithwa kiinima yontumba ya pamba olutu nosho wo omaiyuvo . . . ihe ihali holoka omolwoshinima shontumba shoka omuvalakadhi a ninga nenge inaa ninga.” Opo wu mone uuyelele wa gwedhwa po kombinga yaashika, tala oshitopolwa “Understanding Postpartum Depression” (Nkene epolimano ndyoka hali adha aakiintu konima yokumona hali ungaungiwa nalyo) shi li mo-Awake! 8 Juni 2003.
^ Jehova olyo edhina lyaKalunga, ngaashi shu ulikwa mOmbiimbeli. — Eksodus 3:15, OB-1954.
^ Omadhina gamwe miitopolwa muka oga lundululwa.
Opu na ishewe uuyelele mbuka
OSHUNGOLANGELO
Kalunga oku uvite ko ngaa onkalo yoye?
Molwaashoka Kalunga oye owala e tu shi nawanawa nokwa tseya kutya otwa shitwa ngiini, otashi tu shilipaleke kutya oku uvite ko nawa oonkalo dhetu.
OSHUNGOLANGELO
Omagano ngoka Kalunga e tu pa oge na ondilo
Oshike sha ningitha omagano gontumba ga kale ge na ondilo ge vule omakwawo? Okudhiladhila kombinga yaashoka otashi tu kwathele tu pandule noonkondo ekulilo.
