Tu li oluvalo lwomuntu gwotango, Adam, atuhe yamwe. Nonando aanegumbo oya tegelelwa ya kale ye holathane noya simanekathana, kunena oshidhigu okumona mo ohole ndjoka momagumbo. Shoka hasho Kalunga ketu omunahole a hala.

“Holeni mukweni, ngaashi mu ihole ne yene.” — LEVITIKUS 19:18.

“Holeni aatondi yeni.” — MATEUS 5:44.

Tala kunkene Kalunga a popi kutya ohole oshike mOohapu dhe, mAakorinto yotango 13:4-7:

“Ohole ohayi idhidhimikile ayihe noyi na olukeno.”

Dhiladhila kwaashika: Oho kala wu uvite ngiini ngele yalwe ohaye ku idhidhimikile nohaya ungaunga nangoye nolukeno noihaye ku ngwenyaukile uuna wa ningi omapuko?

“Ohole ihayi si efupa.”

Dhiladhila kwaashika: Oho kala wu uvite ngiini uuna yalwe ye ku limbililwa unene nenge ye ku sila efupa?

Ohole “ihayi kongo shayo yene.”

Dhiladhila kwaashika: Oho kala wu uvite ngiini ngele yalwe ohaya pulakene komaetopo goye noihaya kala taya ti oyo ye li mondjila?

Ohole “ihayi dhimbulukwa uuwinayi ye u ningilwa.”

Dhiladhila kwaashika: Kalunga oha dhimine po nehalo ewanawa aantu mboka ya yona kuye noyi iyela ombedhi. “Iha tamanana ethimbo kehe, ye iha kala a geya sigo aluhe.” (Episalomi 103:9) Ohatu shi pandula lela, uuna gumwe ngoka tu uvitha nayi e tu dhimina po. Onkee otu na aluhe okukala hatu dhimine po yalwe uuna ye tu geyitha. — Episalomi 86:5.

Ohole “ihayi nyanyukilwa uugoyoki.”

Dhiladhila kwaashika: Uuna oshinima oshiwinayi she tu ningilwa, ihatu kala twa hala yalwe ya kale ya panda sho tatu mono iihuna. Onkee ihatu kala twa panda uuna yalwe taya mono iihuna, nonando oye tu ninga nayi.

Opo Kalunga e tu yambeke, otu na okukala tu hole yalwe momikalo ndhoka, kashi na nduno mbudhi kutya oyo oolye. Omukalo gumwe moka tatu vulu oku shi ninga, okukwathela mboka ye na ompumbwe.