Katu na okudhiladhila kutya molwaashoka aalongwa 70 kaya li po sho Jesus a toto po Uulalelo wOmuwa, kali e ya hokwa nenge ye mu iteka po. Ihe pompito ndjono, Jesus okwa li owala a hala okukala pamwe naayapostoli ye.

Aalongwa ye ayehe 12 nosho wo mboka 70, okwa li e ya hole shi thike pamwe. Petameko Jesus okwa hogolola mokati kaalongwa ye oyendji aalumentu 12 mboka a ithana aayapostoli. (Luk. 6:12-16) Okwa li e li muGalilea sho a “ithana aayapostoli ayehe 12,” opo ihe “okwe ya tumu ya ka uvithe kombinga yUukwaniilwa waKalunga nokwaaludha” aantu. (Luk. 9:1-6) Konima yaashono, sho Jesus a li muJudea “okwa hogolola aalongwa yalwe 70, nokwe ya tumu ooyaali nooyaali.” (Luk. 9:51; 10:1) Onkee ano Jesus okwa li e na aalanduli ye li miitopolwa ya yoolokathana, mboka taya uvitha etumwalaka kombinga ye.

Aajuda mboka ya ningi aalongwa yaJesus, oya li taya ka kala haya dhana natango oshituthi shOpaasa lumwe momumvo, taye shi ningi pamwe naantu yaandjawo. (Eks. 12:6-11, 17-20) Manga ku na okathimbo okafupi Jesus a dhipagwe, okwa yi pamwe naayapostoli ye kuJerusalem. Kali a ithana aalongwa ye ayehe okuza muJudea, Galilea nomuPerea ya gongale poshituthi oshinene shOpaasa. Osha yela kutya Jesus okwa li owala a hala okukala pamwe naayapostoli ye pompito ndjoka. Okwe ya lombwele a ti: “Onda halelela okulya pamwe nane Opaasa ndjika, manga inaandi ka hepekwa.” — Luk. 22:15.

Okwa li e na etompelo ewanawa sho e shi ningi. Masiku Jesus okwa li ta ka dhipagwa e li “onzigona yaKalunga ndjoka tayi kutha po oondjo dhuuyuni!” (Joh. 1:29) Oshinima shono osha li tashi ka ningilwa muJerusalem moka Kalunga a kala ha yambelwa omafikiloyambo uule wethimbo. Eso lyaJesus olya li tali ka eta emanguluko enene noonkondo li vulithe pwaandyoka, sho aanegumbo Aaisraeli ya li haya li onzi, uusiku mboka ya tembuka muEgipiti. (1 Kor. 5:7, 8) Shoka Jesus a ningi osha li sha pe ompito aayapostoli 12 ya ninge ekankameno lyegongalo lyopaKriste. (Ef. 2:20-22) Shoka oshihokithi osho kutya “komamanya omulongo nagaali” goshilando oshiyapuki, Jerusalem okwa nyolwa “omadhina gaayapostoli yOnzigona omulongo nayaali.” (Eh. 21:10-14) Eeno, aayapostoli aadhiginini oya li taya ka dhana onkandangala onene mokugwanithwa po kwelalakano lyaKalunga. Omolwetompelo ndyono Jesus okwa li a hala okukala pamwe nayo pOpaasa yahugunina nosho wo pUulalelo wOmuwa mboka wa landula ko nziya konima yaashoka.

Sho Jesus a toto po uulalelo mboka aalongwa yalwe nosho wo mboka 70 kaya li po. Ihe nonando ongawo, aalongwa ayehe mboka aadhiginini oya li taya ka mona mo uuwanawa mUulalelo wOmuwa mboka Jesus a toto po. Ayehe mboka ya li ya ningi Aakriste aagwayekwa otaya ka ya mehangano lyuukwaniilwa, ndyoka Jesus a lombwele aayapostoli ye ongulohi ndjoka. — Luk. 22:29, 30.