Jesus okwa li a uvithile aantu etumwalaka lyombili. Ihe pompito yimwe okwa li a lombwele aayapostoli ye a ti: “Inamu dhiladhila, ngame onde ya okweeta ombili kombanda yevi. Inandi ya okweeta ombili, ihe egongamwele. Ongame nde ya okuhongakanitha omumati nahe, nomukadhona nayina, noshitenya shomukiintu nayinamweno.” (Mat. 10:34, 35) Mbela Jesus okwa li a hala okutya ngiini?

Jesus ka li a hala okutopola aanegumbo, ihe okwa li e shi kutya omalongo ge otaga ka eta etopoko momagumbo gamwe. Onkee, mboka ya hala okuninga aalongwa yaKristus nokuninginithwa, oya pumbwa okukala ye shi kutya aantu yaandjawo itaya ka kala ya panda etokolo lyawo. Omathimbo gamwe ookuume kawo kopandjokana nenge aantu yaandjawo otaye ke ya pataneka, naashoka otashi ke shi ningitha oshidhigu ya kale aadhiginini komalongo gaKristus.

Ombiimbeli otayi ladhipike Aakriste ya “kale nombili naantu ayehe.” (Rom. 12:18) Ihe omalongo gaJesus ohaga vulu okukala ga fa “egongamwele” momaukwanegumbo gamwe. Shika ohashi ningwa uuna oshilyo shimwe shuukwanegumbo sha taamba ko omalongo gaJesus, omanga yalwe ye li ompinge nago nenge taye ga pataneke. Ngele shoka osha ningwa, yamwe yomegumbo ohaya ningi “aatondi” yaangoka ti ilongo oshili. — Mat. 10:36.

Aalongwa yaKristus mboka haya zi megumbo limwe naakwanezimo yawo ye li melongelokalunga li ili, omathimbo gamwe oye na okutokola ngele otaya nyanyudha Jehova naKristus nenge aakwanezimo yawo. Pashiholelwa, aakwanezimo mboka kaaye shi oonzapo otashi vulika ye ya thiminike ya dhane esiku lyefudho lyontumba lyelongelokalunga. Uuna aalongwa yaJesus yi iyadha monkalo ndjoka, otaya ka nyanyudha lye? Jesus okwa ti: “Ngoka e hole he nenge yina e mu vulile ndje, oye ino opalela ndje.” (Mat. 10:37) Odhoshili kutya Jesus ka li ta ti kutya opo aalongwa ye ya kale ye mu opalela, kaye na okukala ye hole aavali yawo unene. Ihe okwa li ta tsu omuthindo ya kale ye na etaloko li li mondjila shi na ko nasha naashoka. Ngele aanegumbo mboka kaaye shi Oonzapo ohaye tu pataneke sho tatu longele Jehova, otu na okutsikila okukala tu ya hole, ihe otu na okudhimbulukwa kutya otu na okukala tu hole Jehova shi vulithe puyo.

Uuna aalanduli yaJesus taya patanekwa kaakwanezimo, ohashi vulu oku ya yemateka noonkondo. Ihe ohaya kaleke momadhiladhilo oohapu dhaJesus ndhika tadhi ti: “Ngoka itaa humbata [“omuti gwomahepeko,” NW] gwe e ta landula ndje, oye ino opalela ndje.” (Mat. 10:38) Niitya yimwe, Aakriste uuna taya patanekwa kaakwanezimo yawo, ohaya kala ye shi tala ko kutya oshi li oshitopolwa shomahepeko ngoka ye na okwiidhidhimikila ye li aalongwa yaKristus. Ihe ohaya kala ye na einekelo kutya omolweihumbato lyawo ewanawa, aantu yaandjawo otaya ka lundulula okudhiladhila kwawo notaya ka kala ya hala okwiilonga etumwalaka lyOmbiimbeli. — 1 Pet. 3:1, 2.