OSHITOPOLWA SHOKUKONAKONWA 47
EIMBILO 103 Aakuluntugongalo oye li omagano
Aamwatate, omwa itulila po ngaa elalakano lyokuninga aakuluntugongalo?
“Omulumentu ngoka a hala okuninga omuwiliki gwegongalo lyaKalunga, oye okwa hala oshilonga oshiwanawalela.” — 1 TIM. 3:1.
SHOKA TATU KA ILONGA
Iitegelelwa yimwe yopamanyolo mbyoka omumwatate e na okugwanitha po, opo a kale a gwana okulangekwa po e li omukuluntugongalo.
1-2. “Oshilonga oshiwanawalela” shuukuluntugongalo osha kwatela mo shike?
NGELE ngashingeyi opwa pita ethimbo wu li omuyakuligongalo, otashi vulika wu li pokulangekwa po wu kale omukuluntugongalo. Mbela owa hala okulonga ‘oshilonga shoka oshiwanawalela’? — 1 Tim. 3:1.
2 Iilonga yomukuluntugongalo oya kwatela mo shike? Oha kwatele komeho iilonga yokuuvitha, ha longo nuudhiginini momatalelopo guusita nomokulonga yalwe, noha tungu egongalo okupitila moohapu nomoshiholelwa she. Onkee oshi shi okuuviwa ko sho Ombiimbeli tayi ti kutya aakuluntugongalo mboka haya longo nuudhiginini, oye li “omagano.” — Ef. 4:8.
3. Ongiini omumwatate ta vulu okukala a gwana okuninga omukuluntugongalo? (1 Timoteus 3:1-7; Titus 1:5-9)
3 Ongiini to vulu okukala wa gwana okuninga omukuluntugongalo? Okukala wa gwana okuninga omukuluntugongalo, inashi faathana nokukala wa gwana okulonga iilonga yontumba yokwiikongela omboloto. Olundji opo wu mone iilonga, shoka wa pumbwa uunkulungu owala mboka omugandji gwiilonga ta pula. Mepingathano naashono, ngele owa hala okulangekwa po wu li omukuluntugongalo, inashi gwana owala okukala wu li omuuvithi nomulongi omwaanawa. Owa pumbwa okugwanitha po iitegelelwa yopamanyolo yaakuluntugongalo, mbyoka tayi adhika muTimoteus gwotango 3:1-7 nomuTitus 1:5-9. (Lesha.) Oshitopolwa shika otashi ka kundathana iitegelelwa itatu mbyoka aakuluntugongalo ya pumbwa okugwanitha po: ngaashi okukala nedhina ewanawa megongalo nokondje yegongalo, okutula po oshiholelwa oshiwanawa ye li omitse dhomagumbo nosho wo okukala nehalo lyokukwathela egongalo.
ININGILA EDHINA EWANAWA
4. Osha hala okutya ngiini, okukala ‘kuu na oshipo’?
4 Opo wu kale wa gwana okuninga omukuluntugongalo, owu na okukala ‘kuu na oshipo,’ sha hala okutya, owu na edhina ewanawa megongalo, omolweihumbato lyoye. Owu na wo okukala ho “popilwa muuwanawa nokumboka yaa shi Aakriste.” Mboka kaaye shi ooitaali otashi vulika ya sheke shoka wa itaala, ihe kaye na okukala netompelo lyasha lyokukala ya limbililwa eihumbato lyoye nenge ngele ngoye omunashili ngaa. (Dan. 6:4, 5) Ipula ngeyi, ‘Ondi na ngaa edhina ewanawa megongalo nokondje yegongalo?’
5. Ongiini to vulu okuulika kutya ngoye ‘oho longo uuwanawa’?
5 Ngele ‘oho longo uuwanawa,’ oho kongo omaukwatya omawanawa muyalwe noku ya pandula omolwomaukwatya ngoka. Oho kala wo wa nyanyukwa okulongela yalwe uuwanawa, nokuli nomiinima mbyoka inoo tegelelwa wu ninge. (1 Tes. 2:8) Omolwashike uukwatya mboka wa simana unene kaakuluntugongalo? Oshoka ohaya longitha ethimbo lyawo olindji, ya tonatele egongalo nokugwanitha po iilonga yawo. (1 Pet. 5:1-3) Nonando ongawo, enyanyu ndyoka haya mono sho taya yakula yalwe, oli vule kokule eiyambo kehe haya ningi. — Iil 20:35.
6. Omomikalo dhini tatu vulu ‘okuyakula yalwe’? (Aahebeli 13:2, 16; tala wo ethano.)
6 Oho ulike kutya oho ‘yakula yalwe,’ uuna to ningile yalwe uuwanawa, mwa kwatelwa mboka kaaye shi ookuume koye. (1 Pet. 4:9) Embo limwe olya ti kutya omulumentu ngoka ha yakula yalwe, oha ulukile ohenda nokuli naantu mboka kee shi, noha kala a nyanyukwa oku ya taamba ko megumbo lye. Ipula kutya, ‘Mbela onda tseyikila ngaa handi yakula aayenda mboka haye ya megongalo lyetu?’ (Lesha Aahebeli 13:2, 16.) Omulumentu ngoka ha yakula yalwe, oha topolelathana shoka e na naayenda, mwa kwatelwa mboka ye na iiniwe iishona nosho wo aapiya yaJehova mboka haya longo nuudhiginini, ngaashi aatonatelishikandjo naamboka taya talele po, opo ya gandje iipopiwa. — Gen. 18:2-8; Omayel. 3:27; Luk. 14:13, 14; Iil. 16:15; Rom. 12:13.
Aaihokani Aakriste taya taamba ko omutonatelishikandjo nomukulukadhi gwe megumbo lyawo (Tala okatendo 6)
7. Omukuluntugongalo oha ulike ngiini kutya “ke na okahalu kiimaliwa”?
7 ‘Ku na okahalu kiimaliwa.’ Shika osha hala okutya iimaliwa niinima yopamaliko, hayo ya simana unene kungoye. Kashi na nduno mbudhi kutya owu na iiniwe oyindji nenge hasho, oho tula iinima yUukwaniilwa pondondo yotango mokukalamwenyo kwoye akuhe. (Mat. 6:33) Oho longitha ethimbo, oonkondo nosho wo iiniwe yoye, wu longele Jehova, wu sile oshimpwiyu aanegumbo lyoye, nowu yakule egongalo. (Mat. 6:24; 1 Joh. 2:15-17) Ipula kutya: ‘Mbela iimaliwa oya simana shi thike peni kungame? Mbela onda gwanenwa ngaa kwaashono ndi na? Nenge ohandi kala tandi gandja unene eitulomo ko ku likola oshimaliwa niinima oyindji yopamaliko?’ — 1 Tim. 6:6, 17-19.
8. Omomikalo dhini to vulu okuulika kutya owu na ‘eidhiliko’ nosho wo eipangelo?
8 Ngele owu na ‘eidhiliko’ nosho wo eipangelo, shono otashi ulike kutya owu na ondjele monkalamwenyo yoye. Pashiholelwa, iho li nokunwa sha pitilila, okuzala nokwiiyopaleka kwoye otaku opalele noho hogolola omainyanyudho omawanawa. Iho holele okukalamwenyo kwaantu mboka ihaaya longele Jehova. (Luk. 21:34; Jak. 4:4) Oho kala wa ngungumana, nonando yamwe oye ku hinde. Ku shi ‘onkolwe,’ noino tseyikila ho nu sha pitilila. Ipula ngeyi, ‘Mbela okukalamwenyo kwandje otaku ulike ngaa kutya ondi na eidhiliko nosho wo eipangelo?’
9. Ongiini to vulu okukala ‘ho ikwata nawa nowu na elandulathano’?
9 Ngele ‘oho ikwata nawa,’ oho konakona iinima nuukeka sha ikolelela komakotampango gOmbiimbeli. Oho dhiladhila muule kombinga yomakotampango ngoka, opo wu mone omayele neuvoko lyomuule. Iho thiki pehulithodhiladhilo mbala, ihe pehala lyaashono, oho shilipaleke kutya owu na uuyelele awuhe mboka wa pumbwa. (Omayel. 18:13) Oshizemo, oho ningi omatokolo omawanawa, ngoka ge li metsokumwe nomadhiladhilo gaJehova. Ngele ‘owu na elandulathano,’ oho kala wi iyunganeka nawa noho kala pethimbo. Owu shiwikile wu li omwiinekelwa noho landula nawa omalombwelo. Omaukwatya ngaka otage ke ku kwathela wu kale nedhina ewanawa. Ngashingeyi natu ka kundathaneni nkene to vulu okwaadha iitegelelwa yopamanyolo, mokutula po oshiholelwa oshiwanawa wu li omutse gwegumbo.
TULA PO OSHIHOLELWA OSHIWANAWA, WU LI OMUTSE GWEGUMBO
10. Ongiini omulumentu ha ulike kutya oku shi “okukala nawa naanegumbo lye”?
10 Ngele owa hokana nowa hala okuninga omukuluntugongalo, aanegumbo lyoye oye na okukala ye shi okuholelwa kuyalwe. Onkee ano owu na okukala omulumentu e shi “okukala nawa naanegumbo lye.” Ano, wu shiwikile wu li omutse gwegumbo omunahole noho sile nawa oshimpwiyu aanegumbo yoye. Shika osha kwatela mo okukwatela komeho aanegumbo momaipyakidhilo agehe gopambepo. Omolwashike shika sha simanenena? Omuyapostoli Paulus okwa pula a ti: “Omulumentu ngoka kee shi, nkene e na okukala naanegumbo lye, ota vulu ngiini okulela egongalo lyaKalunga?” — 1 Tim. 3:5.
11-12. Omolwashike eihumbato lyaanegumbo yomumwatate lya simanenena, ngele okwa hala okulangekwa po e li omukuluntugongalo? (Tala wo ethano.)
11 Ngele owu li omuvali, oyana yoye oye na okukala “ye na evuliko nesimaneko.” Owu na oku ya longa noku ya putudha pahole. Odhoshili kutya ngaashi owala aanona ayehe, nayo oye na okukala haya yolo nohaya dhana. Ihe omolweputudho lyoye ewanawa, ohaya vulika, ye na esimaneko noye na wo eihumbato ewanawa. Shimwe ishewe, ninga ngaashi to vulu wu ya kwathele ya kokeke ekwatathano ewanawa naJehova, ya kale metsokumwe nomakotampango gOmbiimbeli noya ninge ehumokomeho sigo ya ninginithwa.
12 “Oyana oye na okukala ooitaali, inaa uvikila uupwidhi nenge okwaavulika.” Ngele okanona okaKriste oka yono eyono lya kwata miiti, shono otashi ka guma ngiini he? Ngele he ine ka putudha noku ka pa uutekuvuliko, ita ka kala a gwana okulangekwa po e li omukuluntugongalo. — Tala Oshungolangelo yomasiku 15 Kotoba 1996, epandja 21, okatendo 6-7.
Omitse dhomagumbo ohadhi putudha nawa oyana, moku ya kwatela momaipyakidhilo gopaKriste gi ili nogi ili (Tala okatendo 11)
KWATHELA EGONGALO
13. Ongiini to vulu okuulika kutya owu na “engungumano” nenge ondjele, na ‘iho tuwalala’?
13 Aamwatate mboka ye na omaukwatya omawanawa gopaKriste, oye li ekwatho enene kegongalo. Omulumentu ngoka e na ‘ondjele,’ oha lalakanene ombili. Ngele owa hala okukala wa tseyikila wu na ondjele, kala ho pulakene kuyalwe nokukambadhala oku ya uva ko. Pashiholelwa, ngele etokolo ndyoka lya ziminwa koyendji kali li ompinge nompango nenge nekotampango lyOmbiimbeli, mbela oto ka kala ngaa wa hala oku li yambidhidha? Okukala ‘ihoo tuwalala’ osha hala okutya, iho thiminike yalwe ya ninge iinima momukalo moka wa hala. Owu shi kutya osha simana okupulakena komaetopo gayalwe. (Gen. 13:8, 9; Omayel. 15:22) Ku shi ‘omutamanani’ noiho ‘geye mbala.’ Pehala lyokupopya nayi nenge wu nyenyete nayalwe, owu na ombili nayo. Wu li omulumentu omunambili, oho katuka onkatu wu pange ombili, nokuli nomoonkalo oondhigu. (Jak. 3:17, 18) Oohapu dhoye dhombili otadhi vulu okungungumaneka omitima dhayalwe, nokuli nodhaamboka taye ku pataneke. — Aatok. 8:1-3; Omayel. 20:3; 25:15; Mat. 5:23, 24.
14. Uutumbulilo “ke na okukala . . . opo a ningi Omukriste,” noshitya “omuyapuki,” nenge omudhiginini, otayi ti ngiini?
14 Omumwatate ngoka a gwana okuninga omukuluntugongalo, “ke na okukala omuntu ngoka, opo a ningi Omukriste.” Nonando ino pumbwa okukala wa ninginithwa omimvo odhindji, owa pumbwa ethimbo opo wu ninge Omukriste a pyokoka. Manga inoo langekwa po wu li omukuluntugongalo, ngaashi Jesus, owu na okuulika kutya, ngoye omwiifupipiki nowa tegelela Jehova neidhidhimiko, e ku pe iinakugwanithwa ya gwedhwa po megongalo. (Mat. 20:23; Fil. 2:5-8) Oto vulu okuulika kutya ngoye “omuyapuki” nenge omudhiginini mokukakatela kuJehova nokomakotampango ge nosho wo mokulandula ewiliko ndyoka hali zi kehangano lye. — 1 Tim. 4:15.
15. Mbela omukuluntugongalo oku na okukala omupopi gwomontaneho omwaanawa? Shi yelitha.
15 Omanyolo otage shi popi sha yela kutya aatonateli oye na okukala taya ‘vulu okulonga aantu.’ Mbela shino osha hala okutya owu na okukala omupopi gwomontaneho omwaanawa? Aawe. Aakuluntugongalo oyendji ohaya pondola miilonga yokuuvitha nomokuninga omatalelopo guusita, nonando kaye li aapopi yomontaneho aawanawa. (Yelekanitha Aakorinto yotango 12:28, 29 nosho wo Aaefeso 4:11.) Nonando ongawo, owu na okuninga oonkambadhala, opo wu hwepopaleke uunkulungu woye nowu kale omulongi omwaanawa. Ongiini to vulu oku shi ninga?
16. Ongiini to vulu okuninga omulongi omwaanawa? (Tala wo ethano.)
16 “Okudhiginina ohapu ndjoka yi shi kwiinekelwa.” Opo wu kale omulongi omwaanawa, shilipaleka kutya elongo lyoye lyomontaneho nosho wo omayele ngoka ho gandja, oga kankamena kOohapu dhaKalunga. Kala ho konakona Ombiimbeli nosho wo iileshomwa yetu. (Omayel. 15:28; 16:23) Sho to konakona, gandja eitulomo kunkene to vulu okutula miilonga Omanyolo, nuuna to longo yalwe, kambadhala okwaadha omitima dhaapulakeni yoye. Oto vulu okukala omukuluntugongalo omwaanawa, ngele owa pula omaetopo okuza kaakuluntugongalo mboka ye na owino noku ga tula miilongo. (1 Tim. 5:17) Aakuluntugongalo oye na okukala ‘taya vulu okutsa omukumo’ ooitaali ooyakwawo; ihe omathimbo gamwe aakuluntugongalo oye na ‘okuholola omapuko gawo,’ nenge tu tye oku ya pukulula. Monkalo kehe, aakuluntugongalo oye na aluhe okukala aanambili. Ngele oho popi nelaka etalala, nohole, nelongo lyoye olya kankamena kOohapu dhaKalunga, oto ka pondola, oshoka oto holele Omulongi omunene, Jesus. — Mat. 11:28-30; 2 Tim. 2:24.
Omuyakuligongalo ta ilongo okulonga aantu ta longitha Ombiimbeli, omanga e li po nomukuluntugongalo. Omuyakuligongalo ta iyenditha po wo poshipopiwa she, a italela mesipili (Tala okatendo 16)
TSIKILA OKUNINGA EHUMOKOMEHO
17. (a) Oshike tashi vulu okukwathela aayakuligongalo, ya tsikile okulalakanena okukala ya gwana okulangekwa po? (b) Oshike aakuluntugongalo ye na okukaleka momadhiladhilo, uuna taya tala ngele aamwatate oya gwana okulangekwa po ye li aakuluntugongalo? (Tala oshimpungu, “Kala wu na ondjele, uuna to tala ngele aamwatate oya gwana okulangekwa po.”)
17 Aayakuligongalo yamwe ohaya kala ye uvite kutya kaye na esiku ya langekwe po ye li aakuluntugongalo, uuna taya tala kiitegelelwa. Ihe dhimbulukwa kutya Jehova nosho wo ehangano lye, inaya tegelela wu kale wa gwanenena. (1 Pet. 2:21) Ombepo yaJehova oyo hayi ku kwathele wu gwanithe po iitegelelwa mbika. (Fil. 2:13) Mbela opu na uukwatya wumwe wa hala okuhwepopala muwo? Ngele osho, galikana kuJehova. Ninga omapekapeko kombinga yuukwatya mboka, nokupula gumwe gwomaakuluntugongalo e ku pe omaetopo gankene to vulu okuhwepopala.
18. Aayakuligongalo otaya ladhipikwa ya ninge shike?
18 Atuheni, natu tsikileni okukokeka omaukwatya ngoka ga kundathanwa moshitopolwa shika, mwa kwatelwa naamboka ya langekwa po nale ye li aakuluntugongalo. (Fil. 3:16) Mbela owu li omuyakuligongalo? Tsikila nokuninga ehumokomeho! Pula Jehova e ku dheule noku ku zule, opo wu mu longele nowu kwathele egongalo. (Jes. 64:8) Jehova na laleke nuuyamba oonkambadhala dhoye, sho to longo nuudhiginini wu kale wa gwana okulangekwa po wu li omukuluntugongalo.
EIMBILO 101 Natu longeni muukumwe
