Ngaashi edhina Oshinyanga shUukwaniilwa tali shi holola, iipalanyolo yopaMbiimbeli mbyoka hayi kundathanwa mpoka ohayi ukitha eitulomo kUukwaniilwa waKalunga mboka wa li ehuku lyeuvitho lyaJesus. — Lukas 8:1.

Oshinyanga shUukwaniilwa osho ondingandinga yelongelokalunga lyashili moshitopolwa kehe. Iilonga yokuuvitha onkundana ombwanawa moshitopolwa kehe ohayi unganekwa okuza pehala mpoka. (Mateus 24:14) Iinyanga yUukwaniilwa oyi ivule muunene noyi na omitholomo dha yoolokathana, ihe ayihe oya tungwa momukalo tagu opalele, noyindji ohayi longithwa komagongalo ge vulithe pulimwe. Moomvula opo dha zi ko, otwa tunga Iinyanga yUukwaniilwa iipe omayuvi omilongo (uupokati wiinyanga itano mesiku) opo tu vule okukala tu na omahala ga gwana gokugongalela omolwomwaalu gwaauvithi nogwomagongalo ngoka tagu indjipala. Oshike sha li she tu kwathele tu vule oku shi ninga? — Mateus 19:26.

Ohayi tungwa taku longithwa omayambidhidho ngoka haga gandjwa koshiketha shimwe. MOshinyanga shUukwaniilwa kehe, ohamu kala okaketha kOmayambidhidho gOkutungitha Iinyanga yUukwaniilwa mUuyuni Auhe. Omayambidhidho ngaka ohaga tuminwa koshitayimbelewa opo iimaliwa yi gandjwe komagongalo ngoka ga pumbwa okutunga nenge ga hala okulundulula omutungilo gwiinyanga yawo yuukwaniilwa.

Ohayi tungwa kaaiyambi mboka ihaaya futwa sha, ya za momaputuko ga yoolokathana, haya longo iilonga ya yoolokathana noye li moonkalo dha yoolokathana. Miilongo oyindji omu na Oongundu dhOkutunga Iinyanga yUukwaniilwa. Oongundu dhaatungi naaiyambi ohadhi ende nomagongalo moshilongo, hadhi yi nokuli nokomahala gokuushayi, opo dhi ka kwatele komeho pukehe Oshinyanga tashi tungwa nokudheula Oonzapo dhomoshitopolwa shoka. Miilongo yilwe omu na Okomitiye yOkutunga yomOshitopolwa ndjoka ya tulwa po yi tonatele iilonga yokutunga nokutungulula Iinyanga yUukwaniilwa yomoshitopolwa shoka ya pewa. Aakuluntugongalo mboka ye shi okutunga ohaya wilike egongalo moonkatu adhihe dhokutunga, naamboka ye na ontseyo yokutunga ohayi iyamba. Kehe oshikando taku tungwa, iilyo yegongalo lyomoshitopolwa oyo hayi kala oyindji. Ombepo yaJehova noonkambadhala ndhoka hadhi ningwa koshigwana she nehalo ewanawa oyo hayi shi ningi tashi wapa opo shika shi ningwe. — Episalomi 127:1; Aakolossa 3:23.

• Omolwashike ehala lyetu lyelongelokalunga hali ithanwa Oshinyanga shUukwaniilwa?

• Ohatu shi ende ngiini opo tu vule okutunga Iinyanga yUukwaniilwa muuyuni auhe?