Aantu oyendji ohaya dhiladhila kutya Oonzapo dhaJehova elongelokalunga epe. Ihe pwa pita ngashingeyi oomvula dhi vulithe po-2 700, aapiya yaKalunga kashili oya li ya popiwa kutya “oonzapo” dhe. (Jesaja 43:10-12) Otwa kala hatu ithanwa Aakonakoni yOmbiimbeli sigo omo-1931. Omolwashike twa tameke okukala hatu ithanwa Oonzapo dhaJehova?

Edhina Oonzapo dhaJehova otali holola Kalunga ngoka hatu longele. Petameko sho Ombiimbeli ya nyolwa, edhina lyaKalunga, Jehova, olya li mo lwiikando omayuvi. Momatoloko ogendji gOmbiimbeli edhina ndika olya pingenwa po nomadhinasimaneko ngaashi Omuwa nenge Kalunga. Ihe Moses okwa ti kutya ‘edhina lyaKalunga oJehova.’ (Eksodus 15:3, OB-1954) Sho Kalunga a holola edhina lye, okwi iyoolola ko kookalunga ayehe yiifundja. Ohatu kala tu iyuvitile uuntsa molwaashoka otwa humbata edhina lyaKalunga eyapuki.

Edhina Oonzapo dhaJehova otali holola oshilonga shetu. Opu na omusholondondo gwaantu yonale mboka ya kala taya gandja uunzapo kutya oyi itaala muJehova, gwa tameka naAbel, omulumentu ngoka a li omuyuuki. Momukokomoko gwoomvula omathele aantu ngaashi Noowa, Abraham, Sara, Moses, David nooyakwawo yalwe oya ningi oshitopolwa ‘shongundu onene yoonzapo.’ (Aahebeli 11:4–12:1) Otwa tokola toko okutseyithila yalwe oshili kombinga yaKalunga ketu, ngaashi naanaa onzapo nenge ombangi hayi kalele po omuntu ngoka kee na ondjo mompangu.

Sho tatu ithanwa edhina Oonzapo dhaJehova otatu holele Jesus. Ombiimbeli otayi ti kutya Jesus oye ‘onzapo yi shi okwiinekelwa noyi na oshili.’ (Ehololo 3:14, NW) Jesus naye mwene okwa ti kutya ‘okwa tseyithila yalwe edhina lyaKalunga’ nokwa kala ta ‘gandja uunzapo washili’ kombinga yaKalunga. (Johannes 17:26, NW; 18:37) Onkee ano, aalanduli yaKristus yashili oye na okuhumbata edhina lyaJehova noku li tseyithila yalwe. Oonzapo dhaJehova ohadhi kambadhala oku shi ninga.

• Omolwashike Aakonakoni yOmbiimbeli ya lukululwa ya kale hayi ithanwa Oonzapo dhaJehova?

• Jehova okwa tameke okukala e na oonzapo kombanda yevi okuza uunake?

• Olye Onzapo yaJehova ya shiga ko?