KALUNGA okwa li a pe Jesus oonkondo a longe iinima mbyoka ya li itaayi vulu okulongwa kaantu yalwe. Jesus okwa li a longo iikumithalonga oyindji mbyoka olundji e yi longo montaneho yoonzapo odhindji. Iikumithalonga mbyoka oya li yu ulike kutya Jesus oku na oonkondo e vule oombepo dhuuwinayi nota vulu okukandula po omaupyakadhi ngoka aantu inaaya gwanenena ya nyengwa oku ga kandula po thiluthilu. Tala kiinima yimwe mbyoka ta vulu okukandula po.

Ondjala. Oshikumithalonga shaJesus shotango osho shoka sho a li a shitukitha omeya ga ninge omaviinu. Iikando iyali, okwa li a palutha aantu omayovi niikwiila noohi oonshona. Poompito adhihe ndhoka mbali iikulya oya li ya gwanena aantu ayehe e tapu hupu.

Uuwehame. Jesus okwa li a aludha aantu mboka ya li ye na “uuvu kehe noshigombo kehe.” (Mateus 4:23) Jesus okwa li wo a aludha aaposi, aathitamatsi, aanashilundu nosho wo mboka ya li ye na oshintona. Okwa li wo a aludha iilema niitiningili. Kapwa li pu na uuvu mboka a li inaa vula okwaaludha.

Onkalo yombepo ya nika oshiponga. Sho Jesus naalongwa ye ya li mosikepa mefuta lyaGalilea, oshikungulu oshinene osha li sha tukuluka. Aalongwa oya li ya tila noonkondo. Jesus okwa li a ganda ombepo e ta ti komakuthikuthi: “Mwena!” Sho Jesus a popi ngaaka, oshikungulu osha mwena. (Markus 4:37-39) Pompito yimwe, Jesus okwa li e ende kombanda yomeya mefuta sho kwa li ku na oshikungulu oshidhigu.—Mateus 14:24-33.

Oombepo dhuuwinayi. Oombepo dhuuwinayi odhi na oonkondo dhi vule aantu. Aantu oyendji kaya li ye na oonkondo dhokusinda oombepo dhuuwinayi ndhoka dhi li aatondi yaKalunga aakwanyanya. Olundji Jesus okwa li a lombwele oombepo ndhoka dhi ze mo maantu moka dha li, opo ya kale kaaye li we mepangelo lyadho. Jesus ka li e dhi tila. Pehala lyaashono odha li dhi shi kutya oku na oonkondopangelo dhi thike peni nohadhi mu tila.

Eso. Oshi li shu uka sho eso tali ithanwa “omutondi gwahugunina” ngoka aantu itaaya vulu okusinda. (1 Aakorinto 15:26) Ihe Jesus okwa li a yumudha aantu mboka ya li yasa, okwa li a yumudha omwanamati gwomuselekadhi nokamwanakadhona kaavali mboka ya li ya sa oluhodhi noonkondo omolweso lya ko. Pompito yimwe ondhindhilikwedhi Jesus okwa li wo a yumudha kuume ke Lasarus montaneho yaalilisa oyendji nonando Lasarus okwa li a ningi omasiku gane a sa. Nokuli naamboka ya li ye tonde Jesus noonkondo oya li ya zimine kutya oye a longo oshikumithalonga shoka.—Johannes 11:38-48; 12:9-11.

Omolwashike Jesus a li a longo iikumithalonga ayihe mbyoka? Aantu ayehe mboka Jesus a li a yumudha oya ka sa natango. Ihe nando ongawo, iikumithalonga yaJesus oya li ya gandja uunzapo wa simanenena kutya omahunganeko agehe gatuntula kombinga yokupangela kwOmukwaniilwa gwopaMesiasa otaga ka gwanithwa. Kapu na omalimbililo kutya Omukwaniilwa ngoka a langekwa po kuKalunga ita vulu okuhulitha po ondjala, uuwehame, onkalo yombepo ya nika oshiponga, oombepo dhuuwinayi nenge nokuli eso. Jesus okwe shi ulika nale kutya Kalunga okwe mu pa oonkondo dhokuhulitha po iinima ayihe mbyoka.

—Uuyelele moshitopolwa shika owa kankamena kembo lyaMateus, Markus, Lukas naJohannes.