OMATHELEMIMVO manga Aaisraeli inaaya ya muKaanana, Jehova okwa li u uvanekele oluvalo lwaAbraham oshilongo shoka. Sho Josua a li omuwiliki, Aaisraeli oya li yi ilongekidha okukutha ko Evi lyEuvaneko.

Kalunga okwa li a tokolele AaKaanana ehanagulo molwaashoka oya li yu udhitha oshilongo nomikalo dhopamilalo dhisitha ohoni noya li wo kaaye na ohenda yokutilahi ombinzi. Onkee ano, iilando yomuKaanana mbyoka ya li ya sindika kAaisraeli oya li tayi ka hanagulwa po thiluthilu.

Ihe manga inaaya ya mevi ndyoka, Josua okwa li a tumu ko oondaadhi mbali ndhoka dha li dha kala moshilando Jeriko megumbo lyomukiintu gwedhina Rahab. Rahab okwa li e edhilile oondaadhi ndhoka megumbo lye nokwa li e dhi gamene, nonando okwa li e shi kutya dho odhomoshigwana shaIsraeli. Rahab okwa li e na eitaalo muKalunga kAaisraeli, molwaashoka okwa li uvu nkene Jehova a li a hupitha oshigwana she. Okwa li a pula oondaadhi dhi mu uvanekele kutya ye nuukwanegumbo we itaya ka dhipagwa.

Konima sho Aaisraeli ya yi muKaanana ya ka hanagule po Jeriko, Jehova okwa li a gwitha po omakuma gaJeriko pashikumithalonga. Etangakwiita lyaJosua olya yi mo mbalambala e tali hanagula po oshilando, ihe olya li lya hupitha Rahab nuukwanegumbo we. Opo nduno, nopwaahe na okukakadhala meni lyoomvula hamano, Josua okwa li a kwata ko oshitopolwa oshinene shEvi lyEuvaneko. Konima yaashono evi olya li lya topolelwa omazimo gaIsraeli.

Lwopehulilo lyokulongela kwe Kalunga uule wethimbo, Josua okwa li i ithana oshigwana shi gongale. Okwe shi lombwele paufupi nkene Jehova a li u ungaunga noohekulululwa nokwe shi ladhipike shi tsikile nokulongela Jehova. Ihe sho Josua naantu mboka ya li haya longo pamwe naye ya si, Aaisraeli oya li ya thigi po Jehova e taya ka longela iikalunga. Oshigwana osha kala itaashi vulika koompango dhaJehova uule woomvula 300 lwaampono. Pethimbo mpoka, Jehova okwa li e etha aatondi yAaisraeli, Aafilisti ye ya monithe iihuna. Ihe sho Aaisraeli ya li ya pula Jehova e ya kwathele, Jehova okwa hogolola aatokolihapu momazimo 12 agehe opo ye ya hupithe.

Embo lyAatokolihapu olya hokolola iiningwanima yopethimbo lyaatokolihapu mboka, okuza ngaa kuOtniel sigo okuSimson, ngoka a li e na oonkondo dhi ikalekelwa. Embo ndyoka tali hokolola iiningwanima iindhindhilikwedhi olya tsa omuthindo lwiikando oshili ndjika ya simana ndjoka kutya: Okuvulika kuJehova ohaku eta omalaleko nuuyamba nokwaahavulika ohaku eta iilanduliko ya nika oshiponga.

—Uuyelele moshitopolwa shika owa kankamena kuJosua; Aatokolihapu; Levitikus 18:24, 25.