Iilonga yaayapostoli 25:1-27
25 Onkee ano konima yomasiku gatatu, sho Festus a ningi ngoloneya gwoshitopolwalongo* shaJudea, okwa zi kuKesarea e te ya kuJerusalem.
2 Opo nduno aayambi aakuluntu naalumentu, mboka ya li ya simanekwa kAajuda, oya lombwele Festus, shoka taya tamanekele Paulus. Onkee ano oya indile Festus
3 e ya kwathele a tume Paulus, e ye kuJerusalem. Ihe oya li ya pangela ompangela, ya langele Paulus mondjila, opo ye mu dhipage.
4 Ihe Festus okwe ya lombwele kutya Paulus na kale muKesarea nosho wo kutya naye masiku ote ke ya ko hoka.
5 Okwa ti: “Onkee ano mboka ye na oonkondopangelo mokati keni naye ye, tu ye nayo, ya ka tamaneke omulumentu nguka, ngele okwa ninga sha sha puka.”
6 Onkee ano sho Festus a kala puyo uule womasiku gahetatu, nenge omulongo lwaampono, okwa yi kuKesarea, opo nduno esiku lya landula ko, okwa kuutumba koshipundi shokupangula, nokwa gandja elombwelo, Paulus a etwe kuye.
7 Sho Paulus e ya mo, Aajuda, mboka ya za kuJerusalem, oya thikama ye mu kundukidha, noye mu tamanekele iinima oyindji ya kwata miiti, mbyoka ya li itaaya vulu oku yi koleka.
8 Ihe Paulus okwa ipopile ta ti: “Ngame inandi yona Ompango yAajuda, nenge nda popila otempeli muuwinayi, nenge nda yona kOmukesari.”
9 Molwaashoka Festus okwa li a hala okupandika kAajuda, okwa pula Paulus ta ti: “Mbela owa hala tu ye kuJerusalem, wu ka pangulwe komeho gandje omolwiinima mbika?”
10 Ihe Paulus okwa ti: “Onda thikama komeho goshipundi shokupangula shOmukesari, hoka ndi na okupangulilwa. Ngame inandi yona sha kAajuda, ngaashi owala nangoye wu shi shi nawa.
11 Ngele ngame onda yona shili, nonda ninga sha sha gwana okudhipagitha ndje, itandi indile andola kaandi dhipagwe; ihe ngele iinima, mbyoka tandi tamanekelwa kaalumentu mbaka kayi shi yoshili, kapu nando ogumwe e na uuthemba wokugandja ndje miikaha yawo. Onkee ano otandi indile, ndi pangulwe kOmukesari.”
12 Konima sho Festus a mana okukundathana naagandjimayele ye, okwa ti: “Molwaashoka owa indila, wu ka pangulwe kOmukesari; oye ne ke ku pangule.”
13 Konima sho pwa piti omasiku gontumba, omukwaniilwa Agrippa nosho wo Bernike oya thiki muKesarea, ye ya okutalela po Festus.
14 Sho ya kala mo uule womasiku gontumba, Festus okwa lombwele omukwaniilwa kombinga yoshipotha shaPaulus, ta ti:
“Opu na omulumentu gumwe, ngoka a thigwa kuFeliks mondholongo,
15 naasho nda li muJerusalem, aayambi aakuluntu naakuluntu yoshigwana shAajuda oya hokololele ndje kombinga ye e taya pula ndje, ndi mu pangule, nondi mu tokolele eso.
16 Ihe onde ya lombwele kutya pampango yaRoma, inashi pitikwa, omuntu a gandjwe kaapataneki ye, omanga inaa tsakanena nayo oshipala noshipala e ta pewa ompito, a ipopile kombinga yaashoka ta tamanekelwa.
17 Onkee ano sho ye ya huka, inandi kakadhala, ihe esiku lya landula ko, onda kuutumba koshipundi shokupangula e tandi gandja elombwelo, omulumentu ngoka a etwe kungame.
18 Nena aatamaneki ye oya thikama, noye mu tamaneke, ihe inaye mu tamanekela iinima iiwinayi, mbyoka nda li tandi dhiladhila kutya okwa ninga.
19 Oya li owala taye mu tamanekele iinima yi na ko nasha nelongelokalunga lyawo yene nosho wo kombinga yomulumentu gwedhina Jesus, ngoka a sa, ihe Paulus okwa kala ta ti kutya oku na omwenyo.
20 Ihe sho nda nyengwa okuungaunga noshipotha shoka, onda pula Paulus ngele okwa hala okuya kuJerusalem, opo a ka pangulwe hoka shi na ko nasha niinima mbyoka.
21 Ihe sho Paulus a indile, a kalekwe mondholongo, manga a tegelela a pangulwe kuAgustus,* onda gandja elombwelo, a kalekwe mo, sigo oosho tandi ke mu tumina kOmukesari.”
22 Opo ihe Agrippa okwa ti kuFestus: “Onda hala okupulakena komulumentu ngoka ngame mwene.” Festus okwa ti: “Oto ka uva kuye ngula.”
23 Onkee ano esiku lya landula ko, Agrippa naBernike oye ya taya iyulike kutya oya tumbala, noye ya mompangu pamwe naawiliki yetangakwiita nosho wo naamboka ya talika ko ya simana moshilando; opo nduno sho Festus a gandja elombwelo, Paulus okwa etwa mo.
24 Nena Festus okwa ti: “Omukwaniilwa Agrippa nosho wo amuhe, mboka mwa gongala mpaka pamwe natse, oshigwana ashihe shAajuda muJerusalem nosho wo muka osha kala tashi indile ndje tashi igidha kutya omulumentu nguka mú wete mpaka na dhipagwe.
25 Ihe ngame onda mono kutya ina ninga sha sha gwana oku mu dhipagitha. Onkee ano sho omulumentu nguka a indile ndje ye mwene, a ka pangulwe kuAgustus, onda tokola ndi mu tume kungoye.
26 Ihe kandi na sha shoka tandi vulu oku ku nyolela omusimanekwa kombinga yomulumentu nguka. Onkee ano onde mu eta komeho geni amuhe, unene tuu komeho goye, omukwaniilwa Agrippa, opo ndi kale ndi na sha shokunyola kombinga ye, konima ngele a pulwapulwa.
27 Oshoka kandi wete shi li pandunge kungame okutuma omunandholongo kaapu na kutya ota tamanekelwa shike.”
Omanyolo gopevi
^ Pethimbo lyepangelo lyaRoma, oshitopolwalongo osha li hashi pangelwa kungoloneya.
^ Edhinasimaneko ndyoka olya li hali ithanwa aapangeli Aaroma, ihe kali shi edhina lyomuntu.
