Oshungolangelo yOshiingilisa, ye 1 Juni 1912, oya ti: “Otashi vulika aantu oyendji mboka haya lesha iileshomwa yetu, ye shi aantu mboka ihaaya mono ko. Onkee ano, aantu mboka ye na uulema womeho otaya vulu okwiimonena iileshomwa yawo oshali. . . . Niileshomwa mbyoka, oya nyolwa moondanda ndhoka taya vulu okulesha.” Oshungolangelo oya gwedha ko ya ti: “Oyendji yomuyo oya pandula onkundana ombwanawa ndjoka tayi popi kombinga yomalalekonuuyamba ngoka twa tegelela monakwiiwa.”

 Sho oohapu ndhoka dha nyolwa, oshilongo kehe osha li shi na omukalo gwasho gwokunyola oondanda dhoshiposi. Oonzapo dhaJehova odha adhika nale hadhi nyanyangidha iileshomwa ya kankamena kOmbiimbeli, ya nyolwa moondanda dhoshiposi, notadhi tsikile oku shi ninga. Ngashingeyi otu na iileshomwa yoshiposi momalaka ge vulithe 50. Mbela ohayi nyanyangidhwa ngiini?

 Opo tu nyanyangidhe oshileshomwa shoka tashi vulu okuleshwa kaanuulema womeho, tango ohatu lundululile iitya moondanda ndhoka taya vulu okulesha. Michael Millen ngoka ha longo kOshikondo shOkunduluka Oondanda koPatterson, moAmerika okwa ti: “Nale otwa li hatu longitha oopolohalama ndhoka twa landa, opo tu nduluke po oondanda dhoshiposi, ihe kadha li hadhi vulu okulongithwa momalaka agehe ngoka twa pumbwa. Ngashingeyi ohatu longitha opolohalama hayi ithanwa Watchtower Translation System, ndjoka hayi vulu okulongithwa komalaka ogendji, ngoka haga nyanyangidha omambo goshiposi. Kaku na we nando opolohalama yimwe ye yi fa.”

 Miileshomwa yoshiposi omathano nago oga fatulula wo. Pashiholelwa, ethano ndyoka li li kombanda yokambo Kala nonkalamwenyo ombwanawa sigo aluhe, olya fatululwa kwa tiwa: “Omulumentu te ende mondjila ya golyauka ya kundukidhwa kiimeno iiwanawa, kiikulundundu nosho wo koondundu.” Jamshed, ngoka e li omuyakuligongalo nosho wo omukokolindjila e na uulema womeho, okwa ti: “Ondi hole omukalo moka omathano gomiileshomwa yetu haga fatululwa.”

 Embo lyaaposi ngele lya pu okunyanyangidhwa, ohali tuminwa koshitayimbelewa, opo uudhulumutu wu ka tsuwe pombapila ndjoka ihaayi tuuka nuupu, nonando oyi kale tayi longithwa iikando oyindji. Omapandja goshileshomwa agehe ohaga mangelwa kumwe, opo ihe oshileshomwa shoka tashi tumwa pamwe niileshomwa yilwe komagongalo hoka ku na aaleshi yoshiposi, nenge shi tuminwe ngoka e na uulema womeho ye mwene, ngele oku na okaketha kopoosa. Mpoka sha pumbiwa, iitayimbelewa ohayi ningi elongekidho iileshomwa mbyoka yi tuminwe meendelelo aamwatate mboka ye na uulema womeho, opo ye ke yi longithe pokugongala.

 Iilonga ayihe mbyono ohayi pula ethimbo nosho wo oshimaliwa oshindji. Oshinyanyangidho shetu koWallkill, moAmerika ethimbo ndyoka hashi longitha okupilinta Oombimbeli 50 000, oli thike pwaandyoka hali longithwa okunyanyangidha owala Oombiimbeli 2 dhoshiposi. Opo Ombiimbeli yoshiposi mOshiingilisa yi kale yi ihwa po, oya topolwa momambo 25. Iinima mbyoka ya longithwa opo Ombiimbeli ndjoka yi nyanyangidhwe, ondando yayo oya konda pwaandjoka yOmbiimbeli yimwe ayike lwiikando 123. a Iipeko yehwata owala limwe lyomambo 25 ohayi kotha iimaliwa yi thike N$ 2 190 lwaampo.

 Mboka haya kwathele mokunduluka po omambo goshiposi ohaya kala yu uvitile ngiini iilonga yawo mbyono? Nadia, ngoka ha longo koshitayimbelewa shaSouth Afrika okwa ti: “Aamwatate naamwameme mboka ye na uulema womeho, onkalamwenyo yawo kayi shi ompu. Onkene onde shi tala ko shi li elalekonuuyamba oku ya ningila sha shoka tashi ya kwathele. Osha yela kutya Jehova oku ya hole noonkondo.”

 Ongiini ngele ngono ihaa mono ko ke shi okulesha oondanda dhoshiposi? Omimvo dha ka pita, otwa li twa pititha okambo Learn to Read Braille (Ilonga okulesha oondanda dhoshiposi), hoka ke na oondanda dhoshiposi nodhaamboka kaaye na uulema womeho. Oka nyolwa nelalakano lyokulongithwa kwaambono haya mono ko naamboka ihaaya mono ko. Okambo hono ohake ya niilongitho mbyono hayi vulu okulongithwa okunyola oondanda dhoshiposi. Mboka tayi ilongo oondanda dhoshiposi ohaya longitha iilongitho mbyoka oku dhi topatopa yo yene. Okutopatopa hoka ohaku kwathele ngoka te dhi ilongo a dhimbulukwe ondanda kehe sho te yi gumu.

 Aamwatate naamwameme mboka ihaaya mono ko, oya mona mo ngiini uuwanawa miileshomwa mbika? Ernst, ngoka ha zi moHaiti, okwa li ha kala pokugongala kee na nando oshileshomwa sha sha shoshiposi. Oshizemo, okwa li e na okwiilonga momutse shoka ta ka popya uuna ta gandja oshipopiwa nenge ta gandja omatyokosha. Ernst okwa ti: “Ihe ngashingeyi, ohandi vulu okuganeka ndi gandje etyokosha lyandje ethimbo kehe. Ondi uvite nda hangana naamwatate naamwameme. Atuhe ohatu pewa iikulya yopambepo ya faathana kuJehova.”

 Omukuluntugongalo gwedhina Jan a kala moAustria, ngoka e na uulema womeho noha kwatele komeho Ekonakono lyOshungolangelo nosho wo Ekonakonombiimbeli lyEgongalo okwa ti: “Iileshomwa yetu yoshiposi oyi uvitike nawa yi vulithe iileshomwa yilwe mbyoka nda lesha. Pashiholelwa, iileshomwa yetu oyi na oonomola dhomapandja, omanyolo gopevi haga vulu okumonika nuupu nomathano oga yelithwa nawa.”

 Omukokolindjila gwedhina Seon-ok, ha zi moSouth Korea, oku na uulema womeho nowomakutsi. Nale pokugongala okwa li owala ha kwathelwa u uve shoka tashi popiwa taku longithwa omaudhi gokoonyala, ihe ngashingeyi oha vulu okulesha iileshomwa yoshiposi kuye mwene. Seon-ok okwa ti: “Iileshomwa yilwe yoshiposi ohayi vulu okukala iidhigu okulesha, shaashi oondanda dhimwe nenge uundothi wumwe kawu po, go omatumbulo gamwe oga penga nenge ombapila mpoka ga nyolwa okapelupelu kowala. Ihe Oonzapo dhaJehova ohadhi longitha oombapila dhi na ongushu, noondanda nenge tu tye uudhulumutu ohawu kala uunene nawa, naashoka ohashi shi ningi oshipu kungaye okulesha. Nale onda li handi konakona owala iileshomwa ya kankamena kOmbiimbeli uuna pu na ngoka ta kwathele ndje. Ihe ngashingeyi ohandi konakona kungaye mwene. Onda nyanyukwa noonkondo sho handi vulu okwiilongekidhila okugongala nohandi vulu okukutha ombinga muko pakuudha. Ohandi lesha iileshomwa yetu ayihe yoshiposi noinandi hala nokuli okweetha po oku yi lesha.”

 Ngaashi iileshomwa yetu yilwe, iileshomwa yetu yoshiposi nayo oyi na uutumbulilo tawu landula: “Oshileshomwa shika ihashi landithwa. Osha nyanyangidhwa, opo shi longithwe miilonga yokulonga aantu Ombiimbeli muuyuni awuhe, mbyoka hayi ambidhidhwa nomayambidhidho gopashimaliwa gehalo ewanawa.” Otwa pandula sho hamu gandja omayambidhidho ngoka okupitila momikalo dhi ili nodhi ili, ndhoka dha popiwa kepandja lyetu lyokointaneta, donate.mt1130.com. Okugandja kweni nehalo ewanawa, ohaku kwathele mokunyanyangidha iileshomwa ya kankamena kOmbiimbeli, mwa kwatelwa mbyoka yoshiposi.