Ombiimbeli inayi popya kutya uunake Kalunga a shiti ewangandjo nenge kutya olya pula ethimbo li thike peni. Pehala lyaashono oya ti: “Petameko Kalunga okwa shiti egulu nevi.” (Genesis 1:1) Ombiimbeli inayi popya kondandalunde kutya uunake sha li “petameko.” Nonando ongawo, elandulathano lyiiningwanima mbyoka ya popiwa muGenesis oya ningwa, manga “omasiku” gahamano geshito inaaga adha.

•  Mbela omasiku gahamano geshito paulelalela omasiku ngoka ga thikama po moowili 24?

•  Oshike sha li sha ningwa po muule womasiku gahamano geshito?

•  Mbela ehokololo lyomuGenesis oli li ngaa mondjila, ngele tashi ya piinima yuunongononi?

•  Uunake etango, omwedhi noonyothi ya shitwa?

•  Shi ikolelela kOmbiimbeli, evi olya kala ko uule wethimbo li thike peni?

Aawe. MOmbiimbeli oshitya “esiku,” otashi vulu okuukitha kuule wethimbo lya yoolokathana, shi ikolelela kwaashoka tashi popiwa. Pashiholelwa, oshitopolwa shimwe shehokololo, otashi popi kutya egulu nevi oya shitwa mesiku limwe. — Genesis 2:4.

Evi ndyoka lya li lya “vongakana nolya li owala,” Kalunga okwe li ningi opulanete hoka taku vulu okukalwa. (Genesis 1:2) Opo nduno okwa shitile ko iinima yi na omwenyo. Ombiimbeli oya popya oongundu hamano dhiiningwanima, mbyoka ya ningwa muule womasiku geshito.

• Esiku 1: Kalunga okwa tula ko uuyelele kevi, shoka sha ningitha pu kale omutenya nuusiku. — Genesis 1:3-5.

• Esiku 2: Kalunga okwa ningi eyalelo pokati komeya, omeya ngoka ge li kohi yalyo naangoka ge li kombanda. — Genesis 1:6-8.

• Esiku 3: Kalunga okwe shi ningi tashi wapa, opo uukukutu wu holoke. Kevi okwa shitile ko wo iimeno. — Genesis 1:9-13.

• Esiku 4: Kalunga okwa shiti etango, omwedhi noonyothi, iinima mbyoka yi li omaminikilo, opo yi minikile evi. — Genesis 1:14-19.

• Esiku 5: Kalunga okwa shiti iinamwenyo yomomeya nosho wo mbyoka hayi tuka. — Genesis 1:20-23.

• Esiku 6: Kalunga okwa shiti iimuna, iiyamakuti nosho wo aantu. — Genesis 1:24-31.

Konima yesiku etihamano, Kalunga okwa fudha po kiilonga ye nenge tu tye okweetha manga okushita. — Genesis 2:1, 2.

Ehokololo lyOmbiimbeli li na ko nasha neshito lyuuyuni, inali nyolwa pamukalo gwopaunongononi. Pehala lyaashono, olya nyolwa momukalo moka aaleshi nokuli naamboka yopethimbo lyOmbiimbeli, ya li taya vulu okuuva ko nuupu elandulathano lyiinima mbyoka Kalunga a shiti. Ehokololo kombinga yeshito itali kondjithathana niinima yopaunongononi mbyoka ya kolekwa yi li paushili. Omunongononi gumwe gwewangadjo, Robert Jastrow, okwa nyola a ti: “Omauyelele agehe oga yoolokathana, ihe uuyelele wopaMbiimbeli kombinga yiiningwanima mbyoka ya popiwa muGenesis otawu tsu kumwe naamboka waanongononi; elandulathano lyiiningwanima olya fala sigo opokushitwa komuntu.”

Etango, omwedhi noonyothi oya kala nale yi li ko yi li oshitopolwa ‘shegulu’ ndyoka lya shitwa “petameko.” (Genesis 1:1) Ihe uuyelele wayo kawa li wa thika ko kevi, molwaashoka ewangandjo olya li enene unene. (Genesis 1:2) Nonando uuyelele owali wu wetike mesiku lyotango, kakwa li ku shiwike kutya otawu zi peni. Mesiku etine, ewangandjo aniwa olye ende tali yela. Ombiimbeli oya ti kutya etango, omwedhi noonyothi oya li ya tameke ‘okuminikila evi,’ noya li tayi gandja uumbangi wankene ya li yi na okukala yi wetike komuntu ngoka e li kevi. — Genesis 1:17.

Ombiimbeli inayi tu lombwela kutya evi olya kala ko ethimbo li thike peni. Genesis 1:1 oye shi ulika kutya ewangandjo nosho wo evi oyi na etameko. Edhiladhilo ndika itali kondjithathana nuuyelele washili wopaunongononi nenge naashoka aanongononi yi itaala kombinga yevi kutya olya kala ko ethimbo li thike peni.