Lo-lɛngɔ Gbia tɛ Nzapa abanda lingɔ kwa ka ndozu na bulu ti 1914. Bandangɔ na bulu niko nda lo-lɛngɔ gbia tɛ azi abanda. E hĩnga ni ngasia? E hĩnga ni na bangɔ aprɔfɛsi ti ya Ngbangɔ nga na alo mɛ ndo li tɛrɛ lo ge lɛ gigi bandangɔ na bulu ti 1914.

1. Tɛnɛ mɛndó Ngbangɔ tɛnɛ nɛ?

Mbɛti tɛ Danyele tɛnɛ ya Lo-lɛngɔ Gbia tɛ Nzapa na bandangɔ lingɔ kwa na ndangba ngoi mɛ ndo ili ni ya “angoi mbalambala.” (Danyele 4:16, 17) Asiɛklɛ gba na gesi Yezo ili ndo ngoi niko ya “bi mɛ Nzapa ako hɛ̃ [azi],” wa lo tɛnɛ ngandó ya ta ngoi niko dɛ si ka ndani ma. (Luka 21:24) Nga ma se mɛ e na hũngɔ na ni angoi mbalambala asukandó na bulu ti 1914.

2. Bandangɔ na bulu t 1914 ye mɛ ndo ɔ ge lɛ gigi nɛ, wa liye mɛ azi ti na ni nɛ?

Ava Yezo hũndandó lo ya: “Lo mɛ gbanda afa ngoi ti gangɔ tɛ mɔ, afa nga ya, ngoi ti [gigi] wɛngɔ alengbi wɛ nɛ?” (Matie 24:3) Yezo pandó hɛ̃ la ya alo gba na lingɔ tɛrɛ lo na ngoi mɛ lo na tingɔ Gbia ti Lo-lɛngɔ Gbia ka ndozu. Alo ni du to, gwɛ̃ nga na yingingɔ ti sese. (Di Matie 24:7.) Ngbangɔ tɛnɛndó ya liye mɛ azi na tingɔ na ni na “ndangba bi, NWT” na lingɔ ya ngoi ti ndani ati “ngoi ti pɛnɔ” nvɛ̃ni. (2 Timɔte 3:1-5) Ni la du ye mɛ e ndo hũ bandangɔ na bulu ti 1914.

3. Nda mɛ gigi sĩ na siɔ lo bandangɔndó la Lo-lɛngɔ Gbia tɛ Nzapa abanda lɛngɔ gbia ka ndozu nɛ?

Na pɛ tingɔ Gbia ka ndozu ko, Yezo tirindó to na Satana na ademɔ tɛ lo. Lo nwɔ̃ ndo Satana. Ngbangɔ tɛnɛ ya “amu ndo lo na aangelo tɛ lo zu, asa la ge lɛ sese.” (Suma 12:9, 10, 12) Satana hĩnga ya angbã dã aho ni. Na lo ni la lo na ngɔnzɔ kpengbani wa lo ndo si na pɛnɔ ge lɛ sese zu. E hĩnga na olo mɛ nda mɛ gigi ndo gbɛ̃ bo gbɛ̃ngɔ! Kanda Lo-lɛngɔ Gbia tɛ Nzapa na onzingɔ alo niko zu.

 GI HĨNGANGƆ LO MƐNDƐ̃

4. Aprɔfɛsi ti ya Ngbangɔ mɛ atɛnɛ tɛnɛ ti aye mɛndó ali tɛrɛ lo na 1914

Se mɛndó prɔfɛsi niko ati na seni ti fãni ti uzu . . .

• (D) Kɛkɛ ndo fa na?​—Ba vɛrsɛ ti 22.

• (E) Lo-lɛngɔ gbia tɛ lo dɔndó lo ngasia?​—Di Danyele 4:29-33

• (F) Ye mɛndó si na Nebukadanɛzarɛ ka nda “angoi mbalambala” nɛ?​—Di Danyele 4:34-36.

Se mɛndó prɔfɛsi niko ati na seni ti fãni ti sɛ . . .

• (G) Kɛkɛ ndo fandó na?​—Di 1 Ntango 29:23.

• (H) Lo-lɛngɔ gbia niko adɔndó lo ngasia? E hĩnga ngasia ya lo-lɛngɔ gbia niko adɔ lo na ngoi mɛndó Yezo ge lɛ sese nɛ?​—Di Luka 21:24.

• (I) Ndo nga na ngoi mɛ wa la a dirindó na Lo-lɛngɔ Gbia niko nɛ?

 6. Hĩngangɔ ya Lo-lɛngɔ Gbia tɛ Nzapa banda lingɔ kwa wɛ alengbi ti sangɔ ngunu bɛ e

Di Matie 24:3, 14, wa na pɛni hɛ̃ gbinya ti ahũnda olo mɛ:

• Kwa ti ngbondoni mɛ ndo fa ya Lo-lɛngɔ Gbia tɛ Nzapa banda lingɔ kwa wɛ nɛ?

• Mɔ lengbi ti hɛ̃ngɔ ti mɔ na ya kwa niko ngasia?

Lo-lɛngɔ Gbia tɛ Nzapa banda lingɔ kwa wɛ, wa a gbã dã ni na lɛngɔ gbia na ndo lɛ sese zu. Di Aebreo 10:24, 25, wa na pɛni hɛ̃ gbinya ti hũnda olo mɛ:

• Ye mɛ kɔi kɔi ge popo tɛ e lengbi ti lingɔ na lo mɛ ya “lá ti diringɔ tɛ Gbia Yezo adoli” wɛ nɛ?

 NA NDUNU NI

Aprɔfɛsi ti ya Ngbangɔ nga na alo mɛ ndo ɔ ge lɛ gigi ndo fa ya Lo-lɛngɔ Gbia tɛ Nzapa banda lingɔ kwa wɛ. E ndo fa ya e ye lo niko na ngoi mɛ e ndo pa nzɔ̃ pa nga na ngoi mɛ e ndo gwe bombi.

Bozongeli

• Ye mɛndó li tɛrɛ lo na kɔngɔ nda angoi mbalambala mɛ mbɛti ti Danyele tɛnɛ tɛnɛ ni nɛ?

• Ye mɛ to mɔ, mɔ ye ya Lo-lɛngɔ Gbia tɛ Nzapa banda lingɔ kwa na bulu ti 1914 nɛ?

• Ye mɛ mɔ lengbi ti lingɔ ti fangɔ ya Lo-lɛngɔ Gbia tɛ Nzapa banda lingɔ kwa wɛ nɛ?