WANGƆ 10
Mɔ hĩnga bɛta sambela ngasia?
1. Bɛta sambela du bo lenge ni kɔi?
“Ĩ du na kpengba lɛ na ndo awa pangɔ nyɔ̃ Nzapa na nvɛ̃nɛ.”—MATIE 7:15.
Yezo handó awa kalasi tɛ lo na sambela lenge ni kɔi, bɛta sambela. Ni du ma bere lége mɛ gwe tee ka du ti kaka. Yezo pandó ya: “Azi mɛ ndo ɔ ti da ko, ta ala gba ma.” (Matie 7:14) Nzapa ndo ye bo sambela ko tɛnɛ ni ndo lo ka ya Ngbangɔ. Abɛta wa vɔrɔngɔ Nzapa zu ndo du na lo yengɔ kɔi.—Di Yoanɛ 4:23, 24; 14:6; Efɛsɛ 4:4, 5.
Ba video Does God Accept All Forms of Worship?
2. Tɛnɛ mɛ ndó Yezo tɛnɛ na lo tɛ Awakristo ti nvɛ̃nɛ nɛ?
“Ala ndo pa ya ani hĩnga Nzapa, kanda aye mɛ ala ndo li ndo fa ya ta ala hĩnga lo ma.”—TITO 1:16.
Yezo pandó ya awa fangɔ tɛnɛ ti nvɛ̃nɛ na gbɛ̃ngɔ sambela tɛ awa Kristo. Se ta mɔ zi lɛ mɔ kpa ma ko, mɔ lengbi ti pangɔ ya ala du abɛta wa Kristo. Ala ndo pa ya, abombi tɛ ani adu tɛ wa Kristo. Kanda mɔ lengbi ti hĩngangɔ azi ni ko na se kwa tɛ la. Ngasia ? Bo bɛta sambela kɔi la ndo si na awa Kristo ti mbili mbili, mɛ alengbi ti hĩngangɔ la na se liye tɛ la nga na kwa tɛ la.—Di Matie 7:13-23.
3. Mɔ hĩnga abɛta wa vɔrɔngɔ Nzapa ngasia?
Ba alo okɔ̃ ti hĩngangɔ na ala lo mɛ:
-
A bɛta wa vɔrɔngɔ Nzapa ndo tɔndɔ Ngbangɔ lo mɛ ya adu Tɛnɛ tɛ Nzapa. Ala ndo li kpengbani ti tɔndɔngɔ atɛnɛ ti ya Ngbangɔ ka ya du tɛ la. Ni la bɛta sambela a ɔngbi na asambela mɛ ndɛ̃́ mɛ ndo wa azi na dangɔ bɛ tɛ azi. (Matie 15:7-9) Ta abɛta wa vɔrɔngɔ Nzapa ndo ha tɛnɛ mɛ ndɛ̃́ ko se du tɛ la du nga ndɛ̃ ma.—Di Yoanɛ 17:17; 2 Timɔte 3:16, 17.
-
Abɛta ava Yezo ndo gonda ili Nzapa, Yehova. Yezo gondandó ili Nzapa ngoi mɛ ndó lo ndo fa ili niko na azi. Lo zandó azi ya ala hĩnga Nzapa, lo wa nga ndó ala ya ala vɔrɔ Nzapa ya azi gonda ili lo. (Matie 6:9) Ka ndo mɛ mɔ dazu, sambela mɛ ndo ha azi na ili Nzapa la o mɛ wa?—Di Yoanɛ 17:26; Roma 10:13, 14.
-
Abɛta wa Kristo ndo ha Lo-lengɔ Gbia tɛ Nzapa. Nzapa tondó Yezo ya lo pa nzɔ̃ pa ti Lo-lengɔ Gbia. Bo Lo-lengɔ Gbia tɛ Nzapa kɔi la azi zu ndo lɛndɛrɛ. Yezo tɛnɛ ndó tɛnɛ na lo ni ngbii nga ka la kwá tɛ lo. (Luka 4:43; 8:1; 23:42, 43) Lo pandó ya ava ni na ndo pangɔ pa ti Lo-lengɔ Gbia. Se zo hi tɛrɛ lo dã na mɔ, lo pa hɛ̃́ mɔ nzɔ̃ pa ti Lo-lengɔ Gbia tɛ Nzapa, mɔ na pangɔ ya lo ka ya sambela mɛ wa?—Di Matie 24:14.
-
Ta ava Yezo ndo yɔrɔ tɛrɛ la ka ya siɔ gegi olo mɛ ma. Mɔ lengbi ti hĩngangɔ la na lo mɛ ya ta ala ndo yɔrɔ tɛrɛ la ka ya poloso bere gbangbi da ti gegi ma. (Yoanɛ 17:16; 18:36) Fani mɛ ndɛ̃́, ta ala ndo manda ase liye bere asiɔ kwa ti lɛ sese ma.—Di Zaki 4:4.
-
Abɛta wa Kristo ndo yengbi ka popo tɛrɛ la. Tɛnɛ tɛ Nzapa wa ala ya ale ala ye azi ti kɔdɔrɔ zu. Fani sĩni asambela ti nvɛ̃nɛ ndo yɔrɔ tɛrɛ la ka ya lo ti to ti ya kɔdɔrɔ, kanda ta abɛta wa vɔrɔngɔ Nzapa ndo li so ma. (Mika 4:1-3) Abɛta wa Kristo ndo gere na ngoi tɛ la nga na aye tɛ la ti zangɔ bere kpengbangɔ na bɛ azi mɛ ndɛ̃́.—Di Yoanɛ 13:34, 35; 1 Yoanɛ 4:20.
4. Mɔ lengbi ti hĩngangɔ bɛta sambela?
Sambela mɛ wa la tɛnɛ tɛ la ndo lo bo ka ya Ngbangɔ, ala ndo gonda ili Nzapa, ala ndo hanga na azi zu ya Lo-lengɔ Gbia tɛ Nzapa la adu ye mɛ ale azi ndo lɛndɛrɛ wa? Sambela mɛ wa la azi mɛ ka ya ni ndo yengbi ka popo tɛrɛ la, ta ala ndo yɔrɔ tɛrɛ la ka ya to ma wa? Mo hũ ngasia?—Di 1 Yoanɛ 3:10-12.
