Na siɛklɛ ti uzu, nyĩ bombi tɛ “aapɔstrɔ na abiazi ka Yeruzalɛmɛ,” ndo la adu bombi tɛ adonzi mɛ ndo hɛ nyɔ̃ na ndo angbondo tɛnɛ na ili awa Kristo zu ko la ahĩni la na kpɔ̃. (Awa Pangɔ Kwa 15:2) Uzu ya nyɔ̃ la se kɔi na ndo lo kɔi ko, ala ndo bingbindó tɛnɛ na ndo tɛnɛ mɛ Ngbangɔ tɛnɛ, ala ndo zia nga ndó ya nyingɔ vulu adɔ ani na nɔ̃. (Awa Pangɔ Kwa 15:25) Se mɛ Bombi tɛ Adonzi ndo li nga na kwa ndɛ na ngoi tɛ e la.

Nzapa ye ya ala li se bɛ ni. Ayata kɔli ko la ahĩni la na kpɔ̃ la ndo li kwa ka Bombi tɛ Adonzi ko, ala ndo ye Ngbangɔ sĩ ala hĩnga nga hɛngɔ nyɔ̃ na ndo alo mɛ aba sambela nga na kwa tɛ e. Ala ndo tengbi ya pɔsɔ kɔi kɔi ti bangɔ agwɛ tɛ ayata ti gegi zu. Ma se ti ngoi ti uzu, abombi ndo lwa andia ti Ngbangɔ na lége ti ambeti mɛ awa bangɔ akɛlɛ kɛlɛ bere ayata mɛ ndɛ ndo ga na ni. Ni ndo li ya nda sewa tɛ Nzapa adu na mangbi kɔi. (Awa Pangɔ Kwa 16:4, 5) Bombi tɛ Adonzi ndo ba se mɛ ndo lɛkɛ na tɛ ti nyingɔ, ala ndo wa e zu ya e hɛ tɛrɛ e na kwa ti fangɔ nzɔ̃ pa ti Lo-lengɔ Gbia, ala ndo ba nga se mɛ alengbi ti salangɔ ayata kɔli ya ala lwa kwa ka ya bombi.

Ndo dɔ nɔ̃ pɛko nyingɔ vulu tɛ Nzapa. Bombi tɛ Adonzi ndo dɔ nɔ̃ pɛko Yehova, Gbia ti lɛ gegi zu, nga na Yezo mɛ Gbia ti bombi. (1 Kɔrinto 11:3; Efɛzɛ 5:23) Ta ayata ti Bombi tɛ Adonzi ndo hũ ya ani du agbia tɛ awa kwa tɛ Nzapa ma. Ndoni kɔi na awa Kristo mɛ ndɛ mɛ ahĩni la na kpɔ̃ zu ko, “ala ndo nɔ̃ ndali nyi ngasã ngbaga [Yezo] ndo zu mɛ lo gwe na ni.” (Suma 14:4) Ayata ti Bombi tɛ Adonzi ndo sepala sĩ na sambela mɛ e ndo li na lo tɛ ala.

• Azi mɛ ndó ka bombi tɛ adonzi mɛ ndo ba kwa ti lɛ sese zu na siɛkɛ ti uzu na?

• Bombi tɛ Adonzi ndo gi dɔngɔ nɔ̃ na pɛko Nzapa ndɛ ngasia?