Ba tɛnɛ mɛ agbia ti asambela gba atɛnɛ na lo ti to mɛ ndo tiri ka Ukraine:

•   “Patriarch Kirill gbia ti sambela ti orthodoxe mɛ ka Rusie, ta lo tɛnɛ bɛ siɔni na lo ti to mɛ Rusie bi tɛrɛ kɔdɔrɔ ti Ukraine ma. . . . Sambela tɛ lo ndo tɛnɛ ngoi zu apandɛ ti nvɛ̃nɛ na lo ti kɔdɔrɔ ti Ukraine, na lége ti tɛnɛ niko la gbia ti Rusie ndo pa ya, ta ni li siɔni na bingɔ to tɛrɛ azi ti Ukraine ma.”​—EUobserver, 07/03/2022.

•   “Patriarch Kirill . . . tɛnɛ ya, to mɛ Rusie bi tɛrɛ Ukraine ndo za ti nɛngɔ ya, ala onzi siɔ kpale. Na pangɔ ngaso, lo fa yangondo ya, bɛ lo ndo de na ndenge mɛ Rusie bi to tɛrɛ Ukraine.”​—AP News, 08/03/2022.

•   “Metropolitan Epiphanius I zo ti Kyiv, mɛ gbia ti sambela ti Orthodox mɛ ka Ukraine asulu azi tɛ lo na bi kwa kɔi ti nɛngɔ ya, ala gwe ‘tiri to na azi ti Rusie’. . . , Lo pa nga ya, kpɔngɔ asoda ti Rusie, ta adu lingɔ siɔ kpale ma.”​—Jerusalem Post, 16/03/2022.

•   “E [azi ti ya linɔ ti asambela ti Ukraine (UCCRO)], e hɛ̃ ti e zu hɛ̃ asoda tɛ e ti Ukraine ná azi zu ko la ndo za e na ya to olo, e sulu ge ge ge mɛ ala ndo li ti tiringɔ to na awa kula tɛ azi ti Ukraine, wa e ndo li sambela na lo tɛ la.”​—Tɛnɛ tɛ azi ti UCCRO a, 24/02/2022.

 Mɔ da bɛ mɔ ya nɛ? Asambela mɛ ndo pa ya, ani ndo landa Yezo, alengbi ti sangɔ ngunu bɛ azi tɛ la ya, ala gwe to? Tɛnɛ mɛ Ngbangɔ tɛnɛ nɛ?

Pandɛ ti to mɛndó asambela ahɛ̃ ti la na ya ni

 Pandɛ ti dungɔ lɛ ngɛ̃́ tɛ azi afa ya, abɛse asambela gba ndo tɛnɛ ya, ani ndo li kpale so kpãngɔ siriri ko, ngoi gba ala ndo zi lége hɛ̃ azi ya, ala gwe to, ala ndo pa nga ya, ta ni du siɔni ma. Bandandó gã, Atɛmwɛ tɛ Yehova ndo za azi zu ya, ala hĩnga ya, asambela niko ndo pa nvɛ̃nɛ. Zia e ba ambanga atɛnɛ mɛndó e si na ni kaya ambeti tɛ e na lo ni.

•   Bɛli tɛnɛ mɛ: “Les croisades: une “illusion tragique” akambisandó yangondo ya, sambela ti Katolike ti Roma na nyongo ti mɛ̃nɛ tɛ azi mɛndó akpɔ ala ka lɛ to niko, abɛse ala ndo pa hɛ̃ azi ya, ala ndo kpili na lo tɛ Nzapa ná Kristo.

•   Bɛli tɛnɛ mɛ: “L’Église catholique en Afrique”, akambisandó se mɛ ta asambela alonga onzingɔ to ná kpɔngbingɔ mɛ ndo li tɛrɛ lo na popo tɛ azi ti ya kɔdɔrɔ kɔi ma.

•   Abɛli tɛnɛ mɛ “La religion est-elle responsable? “Le rôle de la religion dans les guerres,” nga na “La religion prend parti” akambisandó se mɛ agbia ti asambela ti Katolike, Orthodox, nga na ti Protestant (Agongo) ndo hɛ̃ ti la na ya ato ndɛ̃ ndɛ̃ ndɛ̃.

Awakristo alengbi ti hɛ̃ngɔ ti la na ya to?

 Yezo pandó ya: “Ale mɔ ye afɔ̃ mɔ nga ma se mɛ mɔ ndoye na tɛrɛ mɔ nvɛni.” (Matie 22:39) “Ĩ ye awa kɛ̃ngɔ ĩ.”​—Matie 5:44-47.

 Yezo pandó ya: “Ta lolɛngɔ gbia tɛ mbi adu ti lɛ gigi olo ma. Se adu ya, lo lɛngɔ gbia tɛ mbi adu ge lɛ sese olo ko, ale awa kwa tɛ mbi atiri to so gbanzingɔ ya, ta ahɛ̃ mbi hɛ̃ agbia tɛ Ayuda ma.” (Yoanɛ 18:36) “Azi zu ko ndotiri to na zabe ko, aho nga ala gbanda na zabe.”​—Matie 26:47-52.

 Binga li mɔ ĩ: Se Yezo kɛ̃ndó ya, ta ava lo atiri to so batangɔ lo ma, awakristo alengbi ti mungɔ tawa so tiringɔ to na lo ti ye mɛndɛ̃? Ti nɛngɔ ya, mɔ hũ se mɛndó awakristo ti siɛklɛ ti uzu alanda na wangɔ tɛ Yezo ko, di tɛnɛ mɛ “Bitumba ezali malamu mpo na bakristo?”

Ye mɛ na singɔ na asambela mɛ ndo hɛ̃ ti la na ya to nɛ?

 Ngbangɔ tɛnɛ yangondo ya, bɛ Yehova kɛ̃ asambela zu mɛ ndo tɛnɛ ya, ani du ava Yezo kanda ta ala ndo tɔndɔ tɛnɛ mɛndó lo ha ma.​—Matie 7:21-23; Tito 1:16.

•   Mbeti ti Suma tɛnɛ ya, ka lɛ Nzapa, asambela ti ngaso na nyongo ti mɛ̃nɛ tɛrɛ “azi ti lɛ sese zu mɛ ndo akpɔ la.” (Suma 18:21, 24) Ti nɛngɔ ya, mɔ hĩnga nda ni ko, di tɛnɛ mɛ: “Babilone Monene ezali nini?”

•   Yezo pandó ya, na kpɔngɔ asambela zu ti nvɛ̃nɛ na lo ti siɔ kpale tɛ la nga ma se ko la ando fa kɛkɛ zu mɛ ta ndohɛ̃ le ma “abi ya wá.” (Matie 7:15-20) Ti nɛngɔ ya, mɔ hĩnga se mɛ ni na lingɔ tɛrɛ lo ko, di tɛnɛ mɛ “Nsuka ya mangomba ya lokuta ekómi pene!”

Photo credits, bandangɔ na ndo kɔti tee ka ndo ga: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images