•   “Kɔdɔrɔ ti Chine adu kɔdɔrɔ mɛ gbingɔ ndo yá ka da kpengbani, ti fãni taa gbingɔ yá kaya kɔdɔrɔ niko na ndenge mɛndó ta adɛ li tɛrɛ lo uzu ma.”​—17/09/2022 The Guardian.

•   “Gbingɔ mɛ ndo yá kpengbani ka Est ti Afrika (Corne de l’Afrique) na lingɔ tɛrɛ lo ngaso bere bulu kũ mɛ na gangɔ.”—26/08/2022 2022 UN News.

•   “Gbingɔ na yangɔ kpengbani na ya akɔdɔrɔ gba ti Europe, ye mɛ ali bere bulu 500 ta adɛndó li tɛrɛ lo ma.”​—23/08/2022 BBC News.

 Azi gba ti siãsɛ atɛnɛ ya, akpale ti ngaso na lingɔ tɛrɛ lo gba nvɛ̃ni na abulu mɛ na gangɔ. Nzɔ̃ dangɔ bɛ na lo ti bi mɛ na gangɔ da? Tɛnɛ mɛ Ngbangɔ tɛnɛ nɛ?

 Ngbangɔ piandó tɛnɛ ya:

•   “Na ndo ndɛ̃ ndɛ̃ ndɛ̃ . . . gwɛ̃ aya gbanda.”​—Luka 21:11.

 Se gbingɔ ayá kpengbani ko, ando li ya ta tɛ ti tɛngɔ adu gba ma. Zangangɔ tɛ ti tɛngɔ ná pɛnɔ mɛ ni ndo si na ni ando kokisa aprɔfesi ti ya Ngbangɔ.​—Suma 6:6, 8.

 Ngbangɔ kambisa nda mɛ gbingɔ ndo yá na olo kpengbani. Ngbangɔ tɛnɛ ya:

•   “Ta adu kumba tɛ zo mɛ ndo nɔ nɔ ya, lo dɔ gɛrɛ lo nvɛ̃ni na nɔ ma.”​—Yirimia 10:23.

 Ta azi alengbi ti longangɔ dɔngɔ gɛrɛ la nvɛ̃ni na nɔ ma, afa ya, ta ala lengbi ti lengɔ gbia na ndo tɛrɛ la nvɛ̃ni ma. Aye mɛ ala ndo li, ando li ya, ndo ahulɛ kpengbani wa ngu azanga na ya ando gba ti lɛ gigi.

•   Azi ti siãsɛ gba atɛnɛ ya, aye mɛ azi ndo li la ando li ya, gbingɔ ati kpengbani ge lɛ sese zu.

•   Aye mɛ azi mɛ na gwɛ̃ ti aye gba ndo li, nga na aye mɛ azi ti politikɛ ndo li zangangɔ kpãngɔ lɛ la na ndo dungɔ lɛ ngɛ̃́ ti bi mɛ na gangɔ ndo li ya, angɔngɔ gba nga na ngu agbɛ̃. Ni ndo kpã ando gba mɛ ngu ndo lo ka da na ya kaka.

 Ngbangɔ ko kapa mɛ.

 Ngbangɔ ko kapa ya, Nzapa na onzingɔ kpale mɛ aba zangangɔ ngu na ndo lɛ gigi. Lo na lingɔ ni ngasia?

1.  1. Nzapa na “kpɔngɔ azi ko la ndo gbɛ̃ lɛ sese.” (Suma 11:18) Lo na hãngɔ ye kɔi ti ngbondoni mɛ ando li ya, ngu azanga na ndo lɛ sese—asiɔ azi, mɛ na gwɛ̃ ti aye gba mɛ ndo li aye mɛ ndo gbɛ̃ lɛ sese.​—2 Timote 3:1, 2.

2.  2. “Sese mɛ ahulɛ kpengbani na tingɔ ndo mɛ ngu asĩ da.” (Yisaya 35:1, 6, 7) Nzapa na onzingɔ aye ti siɔni mɛ kpengba gbingɔ asi na ni, wa lo na gbinyangbingɔ lɛ sese ya, ati paradizo.

3.  3. “Mɔ kpã lɛ mɔ na ndo lɛ sese, wa mɔ li ya, ni ti woni ando dũ nga alé gba.” (Nzembo 65:9) Na lége ti nzɔ̃ sulu tɛ Yehova, lɛ sese na sĩngɔ na aye ti nzɔ̃ni ti tɛngɔ ná ngu ti nzɔ̃ni ti nyɔngɔ.