Yakere uzu ti nɛngɔ ya, azi ti Izraɛlɛ ali ka kɔdɔrɔ ti kapa, mɛ ali ndɛ asiɛklɛ bere 35 ko, Nzapa tɛnɛndó hɛ̃ la ya, lo na batangɔ ala na “asiɔ ngã” mɛndó ala hĩnga ni ka Ezipito. (Kolimbola Mibeko 7:15) Lége kɔi mɛndó lo li na ni adu ndenge mɛndó lo hɛ̃ la ndia mɛ aba dungɔ vuruni nga na batangɔ tɛrɛ la na siɔ ngã na ye mɛ ala li ti nɛngɔ ya ta a gbɔ̃ azi mɛndɛ̃ ma. Na ndakisa:

•   Ndia niko ayɔndó ka ti aya Izraɛlɛ ya, ale ala ndo gbɔ̃ ngu wa ala ndo kpó nga bɔngɔ tɛ la.—Balevi 15:4-27.

•   Na omɛ aba hiɔ̃ tɛ azi, Nzapa tɛnɛndó ya: “Ayɔ ya mɔ lɛkɛ ndo mɛndɛ̃ ka pɛ gbágbá tɛ mɔ, ti nɛngɔ ya mɔ gwe mɔ ni hiɔ̃ ka da. Ayɔ ya mɔ du nga na kpua ka popo ti awã kwa tɛ mɔ, ti nɛngɔ ya se mɔ ye ningɔ hiɔ̃ ko, mɔ gɛ̃ du mɔ ni da, wa na pɛni mɔ tulu sese ndoni”—Kolimbola Mibeko 23:12, 13.

•   Se zo kɔi du na ngã mɛ alengbi ti gbɔ̃ngɔ azi mɛndɛ̃ ko, ayɔ ya akpã lo katɛ—ti nɛngɔ ya lo du yɔngɔrɔni na azi na pɛ nyi ngoi. Se du ya ngã tɛ lo wɛ, wa uzu ti nɛngɔ ya lo diri ka popo tɛ azi ko, ayɔ ya lo kpó abɔngɔ tɛ lo, lo gbɔ̃ nga ngu wa se mɛ hũ ya lo diri ti “vúruni” la.—Balevi 14:8, 9

•   Se zo pɔtɔ kinda ko, ayɔ ya akpã lo katɛ.—Balevi 5:2, 3; Mitango 19:16.

 Ndia mɛndó a hɛ̃ azi ti Izraɛlɛ ni mangbindó na seti salangɔ tɛrɛ nga na batangɔ tɛrɛ na angã, mɛ amonganga ga hĩnga ni na gesi.

 Na ngoi niko ndo ko, ta azi mɛndɛ̃ ndo hũndo ya dungɔ vuruni du ngbondoni ma. Na ndakisa:

•   Azi mɛndɛ̃ ndo ningala tɛ la hiɔ̃ bondó so tɛrɛ talége. Ni ndo gbɛ̃ndó ngu, ndo gbɛ̃ nga tɛ ti tɛngɔ, ni lengbi ti gbɛ̃ngɔ se ti batangɔ na tɛrɛ mɛ alengbi ti singɔ na siɔ ngã nga na kpɔ̃ngɔ ayangambi.

•   Awa salangɔ ngã ti gã lengbi ti dungɔ na hĩngangɔ ndo yakere bere ta ala hĩnga nga ma. Azi ti Ezipito ndo salelandó na ya “ayɔrɔ” tɛ la, aye nga ma bere mɛnɛ tɛrɛ gazele, hiɔ̃ tɛ ahu, dida mɛ kpi, hĩnɔ̃, mapa mɛ gbɛ̃ ala ndo salela ngandó kaya yɔrɔ tɛ la gba hĩɔ tɛ azi bere tɛ asa.

•   Azi ti Ezipito ti gã agãndó angã gba na lo ti amikrɔbɛ mɛ alo kaya ngu ti Nilɛ na aterase ni. Nda mɛ ngandó ayangambi gba ti Ezipito akpili na ngã ti dɛngɔ ya, nga na angã mɛndɛ̃ ti ya mɛ ndo lo na ndo tɛngɔ atɛ mɛ gbɛ̃ la.

 Kanda aya Izraɛlɛ luandó nzɔ̃ lo wa ala ngandó na sãte ti nzɔ̃ni ɔngɔ azi ti kɔdɔrɔ mɛndɛ̃ na lo mɛ ya ala tɔndɔndó andia tɛ Nzapa.