Se kwa tɛ mɔ awɛ ko, ni lengbi ti hɛ̃ngɔ mɔ pɛnɔ gba naya kpale mɛ aba falanga, singɔ na kpengba kpale ka ndasewa tɛ mɔ nga na sãte tɛ mɔ. Zia e ba atɛnɛ ndɛ̃ ndɛ̃ ndɛ̃ mɛ alo na ndo andia ti ya Ngbangɔ mɛ alengbi ti zangɔ mɔ ya mɔ gbe bɛ mɔ.

•   Ndo tɛnɛ hɛ̃ azi mɛndɛ̃ se mɛ mɔ ndo ma na tɛrɛ mɔ.

   Tɛnɛ mɛ Ngbangɔ tɛnɛ: “Nzɔ̃ kwa ndo du na songo ngoi zu.”—Masese 17:17.

   Se kwa tɛ mɔ awɛ ko, mɔ lengbi ti dungɔ na vundu, na ngɔnzɔ, na sɔngɔ bɛ bere mangɔ tɛrɛ mɔ ya, akpale tɛ mɔ zu agbɛ̃. Na ngoi mɛ mɔ ndo kambisa hɛ̃ akwa mɔ nga na azi ti ndasewa tɛ mɔ se mɛ mɔ ndo ma na tɛrɛ mɔ ko, ala lengbi ti zangɔ mɔ. Ala lengbi ti hɛ̃ngɔ mɔ awangɔ nga na aye mɛndɛ̃ mɛ mɔ lengbi ti lingɔ ti nɛngɔ ya, mɔ lua kwa mɛndɛ̃.

•   Ta mɔ ma sɔngɔ bɛ gba ma.

   Tɛnɛ mɛ Ngbangɔ tɛnɛ: “Ta bɛ ĩ asɔ na lo ti lá ti ndã ma, na lo mɛ ya, lá ti ndã na gangɔ nga na pɛnɔ tɛ lo nvɛni.”—Matie 6:34.

   Ngbangɔ sa ngunu bɛ e ya, e ndo lɛkɛ akpale uzu. (Masese 21:5) Kwɛ kɔi, ni yɔ ge ti e ya, ta e du na sɔngɔ bɛ na lo ti bi mɛ na gangɔ ma. Ale e hĩnga ya, aye mɛ e ndo du na sɔngɔ bɛ na ndoni adu aye mɛ ta ni ndo li tɛrɛ lo ma. Kanda adu nzɔ̃ni ya e li omɛ elengbi ti lingɔ ndɛ wa e du na loyengɔ na lo ti bi mɛ na gangɔ.

   Ngbangɔ ndo hɛ̃ e awangɔ mɛndɛ̃ mɛ alengbi ti zangɔ e na ngoi mɛ e ti na songɔ bɛ. Ti nɛngɔ ya mɔ hĩnga akpale mɛndɛ̃ ko, di bɛli tɛnɛ mɛ “Oyo okoki kosala mpo na kolonga kotungisama.”

•   Lɛkɛ se tɛ mɔ ti salelangɔ na falanga.

   Tɛnɛ mɛ Ngbangɔ tɛnɛ: ‘Mbi hĩnga se ti nzɔ̃ni ti dungɔ na aye gba nga se ti dungɔ wa yɛlɛ .’—Filipɛ 4:12.

   Mɛsana na se du tɛ mɔ mɛ mɔ na ni na olo. Ayɔ nga ya mɔ gbinyangbi se tɛ mɔ ti salelangɔ na falanga so kokisangɔ na gwɛ̃ tɛ mɔ. Du na kpengba lɛ ti nɛngɔ ya ta mɔ li ayongo ti kili kili ma.—Masese 22:7.

   Ti nɛngɔ ya, mɔ hĩnga se ti nzɔ̃ni ti salelangɔ na falanga tɛ mɔ ko, ba bɛli tɛnɛ mɛ “Okosala nini soki ozali lisusu na mbongo mingi te?”

•   Salela ngoi tɛ mɔ na ndenge ti nzɔ̃ni.

   Tɛnɛ mɛ Ngbangɔ tɛnɛ: “Ale ĩ du na ndara. . . , ĩ li nzɔ̃ ye ngoi zu mɛ se ĩ lua lege ti lingɔ ni.”—Kɔlɔsɛ 4:5.

   Abɛse ta mɔ ndo li kwa ngama se ti uzu ma ko, ta mɔ gbinyangbi se tɛ mɔ ti salelangɔ na ngoi ma. Lingɔ ngaso na zangɔ mɔ ya, mɔ li akpale tɛ mɔ zu na seni wa ta mɔ hɛ̃ tɛrɛ mɔ pɛnɔ ma.

•   Hĩnga mɛsɛnɛngɔ na dungɔ lɛ ngɛ̃́ tɛ mɔ mɛ agbinyangbi.

   Tɛnɛ mɛ Ngbangɔ tɛnɛ: “Naya kpengba kwa ti ndenge zu mbana gɛrɛ ndo du da.”—Masese 14:23.

   Ye lingɔ kwa mɛ aɔngbi na kwa mɛndó mɔ ndo li ni uzu. Na ngoi mɛndɛ̃ na yɔngɔ ya mɔ li kwa mɛ azi ndo hũ ni ya, azanga tina bere kwa mɛ ta na hɛ̃ngɔ mɔ falanga gba ngama kwa tɛ mɔ ti uzu ma.

•   Ta mɔ nzɛ̃ ma.

   Tɛnɛ mɛ Ngbangɔ tɛnɛ: “Na ndã tu, lu alé tɛ tɛ mɔ wa tee na ndɔ ta mɔ nzɛ̃ na ti mɔ ma, na lo mɛ ya, ta mɔ hĩnga ndo mɛ ni na singɔ na nzɔ̃ lé ma, bere na dungɔ ndo kɔi bere zu se na dungɔ nzɔ̃ni.”—Mosakoli 11:6.

   Ngbã lá kwɛ gingɔ kwa mɛndɛ̃. Pa hɛ̃ azi mɛndɛ̃ ya, mɔ ndo gi kwa ti lingɔ. Pa ni hɛ̃ azi ti ndasewa tɛ mɔ, azi mɛ mɔ hĩngangbi na ala, akwa mɔ, azi mɛ dã na mɔ nga na azi mɛndɛ̃ se alengbi. Gi akompanyi mɛ ndo mu azi na kwa bere gi kwa na lége ti akompanyi mɛ ando kpã ka sitɛ ti intɛrnɛt. Lɛkɛ tɛrɛ mɔ ti gwengɔ ka ndo mɛ ando gi azi ti kwa, wa lɛkɛ nga ambeti tɛ mɔ zu na seni uzu ti nɛngɔ ya, mɔ gwe ka ndo ti kwa ni.