Nzapa ndo du ndo zu?
Gbinya ti ya Ngbangɔ
Nzapa lengbi ti hũngɔ aye zu nga na lingɔ aye zu mɛ bɛ lo ye. (Masese 15:3; Aebreo 4:13) Ta Ngbangɔ pa ya Nzapa ndo du ndo zu ma. Kanda ni tɛnɛ ya Nzapa da biani, lo nga na ndo mɛ lo ndo du da.
Nzapa ndo du ngasia? Nzapa du nyingɔ. (Yoanɛ 4:24) Ta zo lengbi ti hũngɔ Nzapa ma. (Yoanɛ 1:18) Asuma ti ya Ngbangɔ mɛ ndo kambisa se mɛ Nzapa ndo du na ni ndo fa ya ndo mɛ Nzapa ndo du na ni da. Ta ni fa ya lo ndo du ndo zu ma.—Yisaya 6:1, 2; Suma 4:2, 3, 8.
Nzapa ndo du ka wa? Nzapa ndo du ka ndo mɛ ta azi lengbi ti hũngɔ ni ma, ndo ni ɔngbi na aye zu mɛ lo li. Yayu la adu ndo mɛ Nzapa ndo du da. (1 Bakonzi 8:30) Ngbangɔ tɛnɛ ya bí kɔi ndo ko, aangelo “li dɔ lo ka gbɛlɛ Yehova,” a So fangɔ ya Nzapa na ndo mɛ lo ndo du da.—Yobo 1:6.
Se ta du ya Nzapa ndo du ndo zu ma, lo lengbi ti hĩngangɔ mbi?
Ĩĩ. Nzapa ndo hĩnga zo kɔi kɔi. Abɛse du ya Nzapa ndo du ka ndo mɛ ta azi lengbi ti hũngɔ ni ma ko, lo ndo hũ azi zu mɛ ge lɛ sese, wa lo ndo za nga azi mɛ na gwɛ̃ ti hɛ̃ngɔ lo dengɔ bɛ. (1 Bakonzi 8:39; 2 Ntango 16:9) Ba se mɛ Yehova ndo fa ya lo ndo kpã lɛ lo ndo awakwa tɛ lo:
Na ngoi mɛ mɔ ndo li sambela: Yehova lengbi ti mangɔ sambela tɛ mɔ bo na ngoi mɛ mɔ ndo li na ni.—2 Ntango 18:31.
Na ngoi mɛ sɔngɔ bɛ ɔ ndo mɔ: “Yehova ndo du dã na azi mɛ bɛ la fa kã; lo ndo so na azi mɛ vundu ɔndo la.”—Nzembo 34:18.
Na ngoi mɛ mɔ na gwɛ̃ ti wangɔ: Yehova “na lingɔ ya mɔ ti na kɔdɛ ti hĩngangɔ ndo wa lo na hɛ̃ngɔ mɔ wangɔ” na lége ti Ngbangɔ, Tɛnɛ tɛ lo.—Nzembo 32:8.
Tɛnɛngɔ ya Nzapa ndo du ndo zu adu yungɔ ndo
Yungɔ ndo: Nzapa ndo du ndo zu mɛ aye mɛ lo li ndo du da.
Bɛta tɛnɛ: Ta Nzapa do du ge tise ma, ta lo ndo du nga ka ndozu mɛ e ndo e hũ ma. (1 Bakonzi 8:27) Adu biani ya atongolo nga na aye mɛndɛ̃ mɛ ge gigi “ndo gonda Nzapa.” (Nzembo 19:1) Nga ma se mɛ ta awa gãngɔ ngbilondo (artiste) ndo du ndo zu na angbilondo mɛ ala ndo gã ma ko, ta Nzapa ndo du nga ndo zu mɛ aye mɛ lo li ndo du da ma. Abɛse nga so ko, angbilondo mɛ lo li alengbi ti zangɔ e ya e hĩnga lo mɛndɛ̃ mɛ ba lo. Kwɛ kɔi aye mɛ ge le gigi ndo za e ya e hĩnga “sé du,” tɛ Wa lingɔ e na ndakisa, ngunu, ndara nga na songo.—Roma 1:20.
Yungɔ ndo: Ayɔ ya Nzapa du ndo zu ti nɛngɔ ya lo hĩnga alo zu wa lo du nga na ngunu zu.
Bɛta tɛnɛ: Nyingɔ vurú du ngunu tɛ Nzapa mɛ lo ndo li na kwa. Na lége ti Nyingɔ vurú tɛ lo, Nzapa lengbi ti hũngɔ bere lingɔ ye zu abɛse du ka wa bere na ngoi ni nɛ zangangɔ ya lo nvɛ̃ni du ka ndo niko.—Nzembo 139:7.
Yungɔ ndo: Nzembo 139:8 ndo tɛnɛ ya, Nzapa ndo du ndo zu, ni tɛnɛ ya: “Se mbi ma ka ndozu, mɔ kai, wa se mbi hu mbɛto tɛ mbi kaya du ti sɛndɛ mɔ nga kai.”
Bɛta tɛnɛ: Ta vɛrsɛ niko tɛnɛ tɛnɛ ti ndo mɛ Nzapa ndo du da ma. Adu biani ya ta ndo kɔi mɛ yɔngɔrɔni ka lɛ Nzapa mɛ lengbi ti gbanzingɔ lo na zangɔ e da ma.
a Yehova adu ili nzapa mɛ kaya Ngbangɔ.
Ba nga atɛnɛ mɛ
GBINYA TI AHŨNDA TI NGBANGƆ
Nyingɔ vurú du nɛ?
Ngbangɔ ndo tɛnɛ bɛta tɛnɛ na ngoi mɛ ni ndo tɛnɛ ya nyingɔ vurú du “ti” Nzapa
