Ngoi gba Ngbangɔ ndo ili Yezo ya “Nyi Nzapa.” (Yoanɛ 1:49) Tɛnɛ mɛ, “Nyi Nzapa” ndo fa ya Nzapa la li aye zu, wa dungɔ lɛ ngɛ̃́ zu alo ka tɛ lo abɛse dungɔ lɛ ngɛ̃́ tɛ Yezo. (Nzembo 36:9; Suma 4:11) Ta Ngbangɔ ndo tɛnɛ ya Nzapa dũndó nyingambi nga ma se mɛ azi ndo dũ na ayangambi ma.

 Ngbangɔ ndo ili nga aangelo ya “aya bɛta Nzapa.” (Yobo 1:6) Ngbangɔ di tɛnɛ ya zo ti kɔzoni Adamu dundó “nyi Nzapa.” (Luka 3:38) Na lo mɛ ya Yezo dundó zo ti uzu mɛndó Nzapa la li lo wa Nzapa li ngandó lo kɔi na ti lo ko, nda mɛ Ngbangɔ ndo tɛnɛ ya lo du kɔzo Nyi Nzapa la.

•  Yezo ndó na dungɔ lɛ ngɛ̃́ ka ndozu uzu ti nɛngɔ ya a dũ lo ge lɛ sese?

•  Kwa mɛndó Yezo ndo li ka ndozu uzu ti nɛngɔ ya lo ga ge lɛ sese nɛ?

 Ĩĩ. Yezo ndó na tɛrɛ ti nyingɔ ka ndozu uzu ya adũ lo ge tise na tɛrɛ ti mi. Yezo nvɛ̃ni tɛnɛndó ya: “Mbi lo ka ndozu, mbi zu ge lɛ sese.”—Yoanɛ 6:38; 8:23.

 Nzapa lindó Yezo uzu ti nɛngɔ ya lo li aye mɛndɛ̃ zu. Ngbangɔ pa ya:

•   “Lo du . . . kɔzo Nyi Nzapa lo ɔ azi zu, lo ɔ nga aye zu mɛ Nzapa ali.”​—Kɔlɔsɛ 1:15.

•   “Nzapa tonda lingɔ aye zu ti ndo lo.”​—Suma 3:14.

 Yezo kokisandó prɔfɛsi mɛ ba zo “mɛ dungɔ lɛ ngɛ̃́ tɛ lo bandandó gã, na ngoi mɛ ta maka ni da ma.”​—Mika 5:2; Matie 2:4-6.

 Lo ndó na ndima gba ka ndozu. Yezo kambisandó ndima mɛ lo na ni ka ndozu na ngoi mɛndó lo li sambela, lo tɛnɛ ya: “Baba . . . hɛ̃ mbi ndima mɛ ndo mbi na ni ka tɛ mɔ gã, uzu ti mɔ lingɔ sese.”​—Yoanɛ 17:5.

 Lo za ndó To lo na lingɔ atãnga aye mɛndɛ̃ zu. Yezo lindó kwa ka gunda To lo “mabere wa kwa ti kɔdɛ.” (Masese 8:30) Ngbangɔ tɛnɛ na lo tɛ Yezo ya: “Ti ndo lo ndo la Nzapa ali aye zu mɛ ka yayu na omɛ ge tise.”​—Kɔlɔsɛ 1:16.

 Nzapa lindó atãnga aye zu na lége tɛ Yezo. Na ya aye ni elengbi ti dikɔngɔ aye zu mɛ na tɛrɛ ti nyingɔ, ndozu nga na tise. (Suma 5:11) Elengbi ti tɛnɛngɔ ya mangbi mɛndó ka popo tɛ Nzapa na Yezo adu nga mabere mangbi mɛ ndo du ka popo tɛ wa lingɔ plan ti da na wa kingɔ da ni. Wa lingɔ plan ndo lɛkɛ plan ti da, kanda wa kingɔ da ndo landa plan mɛ ahɛ̃ lo ti nɛngɔ ya lo ki da ni.

 Lo du tɛnɛ. Ngbangɔ ndo ili Yezo ya “tɛnɛ.” Na ngoi mɛndɛ̃ ni ndo tɛnɛ tɛnɛ ti dungɔ lɛ ngɛ̃́ mɛndó Yezo na ni uzu ti nɛngɔ ya lo ga ge lɛ sese (Yoanɛ 1:1) Alengbi ti dungɔ ya Nzapa salelandó Yezo ti nɛngɔ ya lo pa kwa na ndia tɛ lo hɛ̃ azi mɛndɛ̃ mɛ na tɛrɛ ti nyingɔ.

 Yezo pa ngandó nyɔ Nzapa hɛ̃ azi mɛ ge tise. Alengbi ti dungɔ ya Yehova salela ngandó Yezo ti nɛngɔ ya lo hɛ̃ Adamu na Eva ndia ka yaka ti Edene. (Ebandeli 2:16, 17) Alengbindó ti dungɔ ya Yezo la du aangelo mɛndó ndo dɔ aya Izraɛlɛ na nɔ ka bɛ nyama mɛ ayɔndó ya aya Izraɛlɛ atɔndɔ lo.—Kobima 23:20-23. a