Nyuwaano akhweya munnachuna osuwela michaka saphaama. Nave sookhalavo michaka saphaama wa nyuwo ni wa oosiveliwaanyu.

Michaka saphaama seiyo iri Mpiipiliya, liivuru yoowo Mpatusa a elapo yoothene, Yehova Muluku, eerinheiye wi arempwe iyaakha muculi. Mu yoolaleeryiwa yeela, nnahaala waathokororya aliivuru asese a Mpiipiliya yaawo arino michaka saphaama ntakhara achu oothene hiyo. Awo anasuwanyeya moorweela wa masina a alopwana yaawo Muluku aapharihenleiye wi yaarepe—Mateu, Marko, Luka, ni Yohani.

Ancipale aniichana saweereya seiyo sese ntoko Michaka misese. Ooseese analoca muchaka, naari michaka vooloca sa Yesu—yoowo ori mphiro wa Muluku ntakhara ovulusa nave ntoko Mwene a Omwene wa Muluku wa wirimu, Yesu onahaala oruuha mareeliho oohimala wa oothene yaale anooniherya nroromelo mwa yoowo.—Marko 10:17, 30; 13:13.

Akhweya nyuwaano munniikoha ntakhara heeni Muluku oveerenleiye saweereya sese sa okumi ni mahusiheryo a Yesu.

Wookhalavo mphurelo wa okhalano saweereya soohiyana wa yeeyo Yesu olonceiye ni opankeiye. Wi niphwanaphwanihe, nkaanyiheryani wi alopwana asese amwaacamenle muhusiha oovuwa. Mulopwana ori ohoolo wa muhusiha mulipa a musokho. Ori omoono woolopwana mulipa a murece. Mulopwana onanwiriyana ari omoono woothiyana mulipa oototha ihopa ni nthamwene awaacameleya a muhusiha. Nave mulopwana aneesese, ori oculi, mulipa oovareryela yoowo ori mmiravo waapwaha akina. Alopwana ooseese toororomeleya, nave muchu ti muchu ookhalano makupa anamusivela naari onathokororyeiye. Wakhala wi muchu ti muchu onarepa yaweereya yeeyo muhusiha olonceiye ni opankeiye, soorepa sooseese akhweya saahaala okhalano saweereya  soohiyana. Moorweela wa othokororya saweereya sooseese, okhalano mmuupuweloni moonelo ni soolakelela soohiyana, nnahaala okhalano yaweereya yawaakhwanela wa yeeyo muhusiha olonceiye ni opankeiye. Ela enooniherya mukhalelo nneeraahu niphure moorweela wa okhalano saweereya sese soohiyana sa okumi wa Muhusiha Mutokweene, Yesu.

Nlocaka sa niphwanaphwaniho, mulipa a musokho onachuna waakusa murima achu yaawo ari Ayuta, mwawiihiiha onathokororya mahusiheryo naari saweereya mmukhalelo yoowo oni waakhaviherye alipa oowiriyana oopacerya. Mulipa a murece onavuwiha openusiwa wa areca naari alipa oorakala, mwawiihiiha onnasepa ichu ikina seiyo mulipa a musokho olonceiye mu yaweereyaawe naari onaperekha mmukhalelo woohiyana. Nthamwene awaacameleya onaceenyerya moonelo ni mikhalelo sa muhusiha. Saweereya sa mmiravo ti sookhuveya nave opanke mukwasu. Naamwi hiiha saweereya sa muchu ti muchu ti seeparipari. Ela ennooniherya phaameene okhweleya waya okhalano saweereya sooseese sa okumi wa Yesu seiyo sinaaceererya wiiwexexa wahu miteko, mahusiheryo, ni omuchu awe.

Akhweya achu anamuloca ‘Muchaka wa Mateu’ naari ‘Muchaka wa Yohani.’ Tahi yoonanara, ntakhara muchaka ti muchaka orino “Mitchaka Yaphama ya Yesu Kristu, Mwana a Muluku.” (Marko 1:1) Nto, mmukhalelo wawunlaana, orivo pahiru muchaka mmoha naari michaka saphaama, vooloca sa Yesu, onaphwanyeya wa hiyo mu saweereya sese.

Oohuserya ancipale a Masu a Muluku aalikanyiha nave ahiiwananiha saweereya ni iparipari sinaphwanyeya mu Mateu, Marko, Luka, ni Yohani. Ovinyerya 170 E.K., namarepa o Siriya Tasiyano aahilipiserya weerano yeeyo. Owo aahisuwela wi aliivuru ala ooseese teeparipari ni ooveereliwa, nave aahimpaka Diatessaron, liivuru yoowo onarehererya saweereya sa okumi ni muteko wa Yesu.

Yesu—Ephiro, Eparipari, ni Ekumi toolikana, koma ootepa okhala eeparipari ni awaakhwanela. Eyo ti yooweryeya woona wi vano ninniiwexexa phaama okhwaaniheryeya wa sooloherya sincipale ni maphwanaphwaniho. Wiiwexexa yoola onnahiya vanlakani ichu aalonceiye ni aapankeiye, mmukhalelo saweereya saapaken’yaaya. Otholathola wa arkeyoloxiya onnakhaviheryatho wiiwexexa ichu ikina ni moonelo wa alipa oorepa. Mwawiihiiha, haavovo onaphwanela ovaanya mukhalelo elociwaaya yaweereya ti yaweereya. Koma liivuru Yesu—Ephiro, Eparipari, ni Ekumi onnaperekha eyo mmukhalelo woophwanelela ni waweemereryeya.

Vaavaa munamwaalakhanyaanyu ni ompuha liivuru yoola, mweererye ohela mmuupuweloni muchaka woopacerya ntakhara nyuwo ni oosiveliwaanyu. Muupuwele wi Yesu Kristu mukhateiye aahiloca wa murummwa Tomasi: ‘Miyo ka, ephiro, eparipari, ni ekumi. Havo onaya wa Atithi ahivinre wa miyo.’—Yohani 14:6.

Liivuru Yesu—Ephiro, Eparipari, ni Ekumi onahaala wookhaviheryaani othamalela mukhalelo Yesu moomalela oreiye “ephiro.” Pahiru moorweela wa yoowo ti wooweryeya omwaacamela Yehova Muluku mu nivekelo. Opwaha yeeyo, Yesu ti ephiro wi naataanihiwe ni Muluku. (Yohani 16:23; Aroma 5:8) Mwawiihiiha, pahiru moorweela wa Yesu nnanwerya okhalano onthamwene wa weemereryeya ni Muluku.

Yesu ti “eparipari.” Owo aahiloca ni aahikhala mwawiiwanana ni eparipari; eyo yaari ntoko wi eparipari yaakhala mwa Yesu. Owo aahikhwaaniherya sooloherya sincipale, yeeyo yaakhanle “‘à’. mwa yowo.” (2 Korinto 1:20; Yohani 1:14) Sooloherya seiyo sinnanikhaviherya woona muteko wookhweleya wa Yesu mu okhwaaniheryeya wa yookhwela ya Muluku.—Wupulula 19:10.

Nave Yesu Kristu ti “ekumi.” Moorweela wa woopola, owo oovaha okumi ni nikhami nawe noophaameya, eerihaka wi okhale wooweryeya wa hiyo okhalano “ekumi yeparipari,” yeeyo eri “ekumi yohimala.” (1 Timóteo 6:12, 19; Éfeso 1:7; 1 Yohani 1:7) Owo onahaala okhala “ekumi” wa macikhwi yaawo anahaala oviihiwa mookhwani ni ewehereryo ya okhala wookhala Mparataiso.—Yohani 5:28, 29.

Oothene ahu nnaphwanela wiiwexexa ni ocicimiha muteko wa Yesu mu yookhwela ya Muluku. Nnaweherya wi munamusiveliwa ohuserya sincipale vooloca sa Yesu—“ephiro, eparipari, ni ekumi.”