Yesu oomala othariha wi “muhuwo mukhani” onahaala waakhela mpuro mu Omwene wa wirimu. (Luka 12:32) Nyenya waakhela yamahala yoohakalaliha yeela tahi echu enaphwanela wooniwa mooveya. Mweeparipari, owo onnatitelela waaceenyerya ochuneya wa okhala muchu awookololowa murima wi apake makupa mu Omwene.

Mwawiiwanana ni yeeyo, Yesu onnaaceenyerya amuhuserya awe wi etitelele onwehererya ophiyerya orwa wawe. Owo onnaloca: “Mukhale òmalelene ni ipanthe sovarela mmatani. Ntoko atxhu anàwehererya apwiya aya anarwa wothelani, wi yaphiyà emanaka nsele, yakuve wahulela. Òrèriwa t’amulapeli eni ephwanyiwe ewehereryaka t’apwiyaya.”—Luka 12:35-37.

Amuhuserya ananwerya wiiwexexa mookhweya mukhalelo yoowo Yesu onaphwanaphwaniheiye. Alapeli yaawo onawaaheiye ari ooreheryeyeene, ewehereryaka okooka wa apwiya. Yesu onnathariha: “Apwiya yarwà erilo nari muthupi wipaka, nave yaphwanyà ewehereryaka, òrèriwa ti yowo.”—Luka 12:38.

Iha ti sincipale opwaha ekano ya okhala alapeli oororomeleya, naari anamalapa. Ela ti yawooneya orweela mmukhalelo Yesu, Mwaana a muchu, onarweiye mukhateiye mu niphwanaphwaniho. Owo onnaaleela amuhuserya awe: “Nyuwotho khalani òwehererya, wona wi muhisuwelaka, Mwana a mutxhu t’onereiye aphiye.” (Luka 12:40) Mwawiihiiha mmwaha mukina omwaahiyu, Yesu anahaala orwa. Owo onachuna wi oomuchara awe—xaxaxa yaale a “muhuwo mukhani”—ekhale oolipelela.

Petro onnachuna wiiwexexa mookwakwaleya yeeyo Yesu onataphuleleiye, mwawiihiiha owo onnakoha: “Pwiya, niphwanaphwaniho nla munanlotxela yehuru, nari atxhu othene?” Ohiya omwaakhula Yesu mooluluwanya, Yesu onnakumiherya tho niphanahwaniho noolikana: “Vanonto tuvi mulapeli òroromeleya ni a miruku, mwanene onereiye amuhiyerye anamuteko awe, wi mwa elukuluko yophwanelela àkawele yolya? Òrèriwa ti mulapeli oni aphwanyiwe ti Apwiya awe, aweiwe hiha. Txhiryene kinnolèlani: owo onammuvaha otokwene wa muhakhu awe wothene.”—Luka 12:41-44.

Mu niphwanaphwaniho noopacerya “Apwiya” mwawooneya anaahiwa Yesu, Mwaana a muchu. Mwawooneya, “mulapeli òroromeleya” onavolowela alopwana yaawo anapaka makupa mu “muhuwo mukhani” nave yaawo anahaala ovahiwa Omwene. (Luka 12:32) Iva Yesu onaloca wi achu akina a nikhuuru nenla onahaala waahiyera “anamuteko awe” wi yaavakuleleke, “wi mwa elukuluko yophwanelela àkawele yolya.” Yesu mukhateiye onnamuhusiha ni omulyiha Petro ni amuhuserya akina omunepani, mwawiihiiha awo anaphwanela ororomela wi yookhalavo elukuluku yoomwaahiyu Mwaana a muchu oneereiye arwe. Nave elukuluku yeeyo anamukhalavo marehereryo a waavakulela omunepani oomuchara a Yesu, yoowo ori mwaneene a “anamuteko.”

Yesu onnaceenyerya mmukhalelo mukina ntakhara heeni amuhuserya awe anaphwanelaaya wiikosoopa wi evareryeleke mukhalelo aya. Eri hiiha nthowa nawi ti wooweryeya awo omaala ni opacerya wuupuwelela naari opaka ichu mmukhalelo wooheseya ophiyeryatho owiikara oomuchara awe akina: “Nto mulapeli ole alotxà mmurimani mwawe ariki: ‘Pwiya aka onnalekela orwa’ nave apatxeryà wamana anamuteko asilopwana ni asithiyana, olya ni owurya ophiyerya ohapaliwa. Pwiya a mulapeli ole onamurwa nihiku nohiwehererya ni mwa elukuluku  yohisuweliwa. Owo onamunvalanya ni amwakanyerye ni ale òhiroromeleya.”—Luka 12:45, 46.

Yesu olonce wi oruuhale “moro vathiva.” Nave owo, ohunnuwiha miyaha inatannya oviha otokotoko elapo yoothene nave onnakhumelela mu ovaanya mahusiho ni mihapo naari sookhovelela. Ela ennaavalaanya achu yaawo yaawehererya okhala awiiwanana, yaamwalanihaka “tithi ni mwanawe, nave mwana ni tithinya; mai ni mwanawe amwamuthiyana, nave mwana amwamuthiyana ni amannya; apwiyamwana ni mwara a mwanawe, nave mwara owo ni pwiyamwana awe.”—Luka 12:49, 53.

Masu yaala ta vameekhaaya wa amuhuserya. Voocharela Yesu onnakookela wa muloko wa achu. Ancipale a yaawo ahuumiha mirima saya wi eheemererye wi owo Mesiya, mwawiihiiha owo onnaleela yaawo: “Monaka neku nemelaka onamorelawo nsuwa, muni: epula enamuru pa; nave hiha ennereya. Nave yopaka etxheku erwaka ohitxo, muni: onamurwa oviha; nave ela ennereya. Anawisotherye nyu! Mòsuwela mukhalelo wa vathi ni wa wirimu, vano ntakhara seni muhinasuwelanyu otaphulela elukuluku yela yophwanelela?” (Luka 12:54-56) Awo hiyaari ooreheryeya omweemererya Mesiya.