MWAHA WOOHUSERYA 31
NCIPO 12 Muluku Ahu Mutokweene, Yehova
Tiheeni Yehova Eenreiye wi Awoopole Achu Oocheka?
“Vawi Muluku aatepa osivela elapo ophiyerya omvaha Mwanawe ooyariwa meekheiye.”—YOH. 3:16.
IPONTU SA VASULU
Mukhalelo Yehova eenreiyevo echu wi anikhaviherye owaniha yoocheka ni mukhalelo eerinheiye okhala wooweryeya wi hiyo nipuhe ekumi yoohimala, nri ootaphuwa wa yoocheka.
1-2. (1) Yoocheka tiheeni nave nni nivoothe hai owaniha wahu ntakhara yoocheka? (Moone tho “Masu Atharihiwe.”) (2) Tiheeni nnahaalaahu othokororya mmwaha yoola ni miyaha mikina inaphwanyeya mu Mulipeleli yoola? (Moone tho “Enoota wa Alipa Alipa Awaalakhanya” mu erevista yeela.)
APWANNE mwaamusiveliwa osuwela ophiyerya mweeryo taani Yehova onoosiveleiyeeni? Mukhalelo mmoha wa osuwela naakhulo nene ti ola: Muhuserye yeeyo owo eenreiye wi awoopoleeni wa yoocheka ni okhwa. Yoocheka a mwiicani awoopiha yoowo muneeraanyu muhiwerye owanano mukhatiinyu. Oothene ahu ninnacheka nihiku ti nihiku nave ninnakhwa wa nthowa na yoocheka. (Aro. 5:12) Naamwiihiiha, sookhalavo michaka saphaama. Nnikhaviheryo na Yehova nnanwerya ovootha yoocheka. Chiryene, ovootha wahu ti weeparipari!
2 Yehova Muluku onnaakhaviherya achu owaniha ni yoocheka mu iyaakha 6.000. Ntakhara heeni? Woona wi onnanisivela. Owo onnaasivela achu ovinyerya elukuluku yeeyo aapatunxeiye. Woona wi onnanisivela vancipale, owo oopaka ichu sincipale wi anikhaviherye vaavaa nnachekaahu. Muluku oosuwela wi yoocheka ennakeriha wookhwani nave owo hanachuna wi nikhwe. Owo onachuna wi nikhale ni okumi okhala wookhala. (Aro. 6:23) Ti yeeyo owo onachuneiye wa nyuwaano. Mmwaha yoola, nnahaala othokororya makoho ala mararu: (1) Ti mwawiihai Yehova aavanheiye ewehereryo achu oocheka? (2) Ti mwawiihai achu oocheka akhalai yaaphwannyaaya mahala a Yehova? (3) Tiheeni Yesu eenreiye wi awoopole achu wa yoocheka ni okhwa?
TI MWAWIIHAI YEHOVA AAVANHEIYE EWEHERERYO ACHU OOCHEKA?
3. Tiheeni yeeren’ye wi makholo ahu oopacerya echeke?
3 Vaavaa Yehova aampatunxeiye mulopwana ni muthiyana oopacerya, owo aachuna wi awo ekhale oohakalala. Owo aahaavaha nipuro naphaama, yamahala ya othela ni muteko woohakalalihaxa. Awo yaahaala osareiha elapo ni anamwane aya, yeerihaka wi elapo yoothene ekhale parataiso, xarti a mu Eteni. Muluku aahiihale pahiru echu emoha yookhweya. Nave owo aahaalopola wi wakhala wi aananariha nlamulo, emmwareelaka Muluku mwaayiini, yoocheka aya yaahaala waakeriha wookhwani. Ninnasuwela yeeyo yeeren’ye. Munkeelo oonanara murima yoowo ahaamusivela Muluku naari mano achu, aahaawoka yaawo wi ehimwiiwelele Muluku. Atamu ni Eva, yaaheemererya ovolowela yoola woonanara. Vaavaa yaahin’yaaya omuroromela Tiithi aya oosivela, awo yaacheka. Ntoko nnasuwelaahu, masu a Yehova yaahaakhwanela. Ovinyerya mu nihiku nenle oya muhoolo, awo yaapacerya wuuluvala, nave vookuchula, ekhwa.—Map. 1:28, 29; 2:8, 9, 16-18; 3:1-6, 17-19, 24; 5:5.
4. Ntakhara heeni Yehova onniica yoocheka ni onikhaviherya owaniha yeeyo? (Aroma 8:20, 21)
4 Yehova oheemererya wi mwaha yoola woothananiha orempwe ntakhara mphurelo ahu. Eyo ennanikhaviherya wiiwexexa ntakhara heeni owo oniiceiye vancipale yoocheka. Yoocheka ennanimwalanya ni Tiithi ahu nave ennanikeriha wookhwani. (Yes. 59:2) Ti nthowa nene Satana, munkeelo oomwareya yoowo otannyile makacamiho oothene yaala, onasiveleiye yoocheka nave onamwaramwaxeiye yeeyo. Woonaru owo uupuwela wi aahivootha mu Eteni. Nyenya owo hiiwexexa ophiyerya mweeryo taani Yehova oreiye oosivela. Muluku hatoronke yoolakelela awe ntakhara anamwane a Atamu ni Eva. Nthowa na waasivela achu, mwawaakuveya owo aavahererya ewehereryo wa oothene. (Mwaalakhanye Aroma 8:20, 21.) Yehova aanasuwela wi akina a anamwane yaala yaahaala omusivelaka nave yaahaala waavyaka nikhaviheryo nawe wi ewanihe ni yoocheka. Nave ntoko Tiithi ni Mpatuxa aya, owo aahaala waavaha mukhalelo wa okhala ootaphuwa wa yoocheka ni owaacameliha wa yoowo. Tiheeni Yehova aahaleiye weera wi ela ekhale yooweryeya wa oothene?
5. Ti liini Yehova aavanheiye ewehereryo yoopacerya wa achu oocheka? Mutharihe. (Mapacereryo 3:15)
5 Mwaalakhanye Mapacereryo 3:15, TNM. Mwawaakuveya, Yehova aahiloca wi aahaala omutoloxa Satana nave aahaala waavaha ewehereryo achu oothene. Muluku aalaiherya wi “muyareriwo” waahaala ovaha ewehereryo. Muyareriwo yoola ohoolo waya waahaala omutoloxa Satana, anyaanyaka miteko soothene sootakhala Satana otannyileiye mu Eteni. (1 Yoh. 3:8) Mwawiihiiha, muyareriwo yoola waahaala ohooxeya wi waakhwaniherye yeela. Satana aahaala omphoreiha moorweela wa omwiipha. Ela yaahaala omwiicela vancipale Yehova. Nto osooseya murima yoola waahaala okhala woophwanelela woona wi achu yaale yahaarino ewehereryo yaahaala woopoliwa wa yoocheka ni okhwa!
TI MWAWIIHAI ACHU OOCHEKA AKHALAI YAAPHWANNYAAYA MAHALA A YEHOVA?
6. Tiheeni alopwana a nroromelo, ntoko Apele ni Nowa yeenraaya wi emwaacamele Yehova?
6 Mu iyaakha masana masaneene, vakhaani-vakhaani Yehova onneeriha okhala yookwakwaleya mukhalelo achu oocheka eneeraaya emwaacameleke yoowo. Apele, mwaana anaawiili a Atamu ni Eva, aari muchu oopacerya wooniherya nroromelo wa Yehova emanle weereya epahu mu Eteni. Woona wi Apele aanamusivela Yehova, nave aanaavya omuhakalaliha ni omwaacamela Yoowo, Apele aahimvaha Yehova mukucho. Apele aari mukukhula; mwawiihiiha, owo aahaakuxa akina a asaana a ipucepuche sawe, awiipha, nave aaveleela wa Yehova. Yehova aakhulenle hai? Owo “aahakalala ni Apele vamoha ni yoovaha awe.” (Map. 4:4, TNM) Yehova aaheemererya mikucho soolikana ni seiho saavahiwa ni achu yaawo yaamusivela ni omuroromela yoowo, ntoko Nowa. (Map. 8:20, 21) Moorweela wa weemererya mikucho ntoko seiho, Yehova aahooniherya wi achu oocheka enanwerya ophwanya mahala awe ni omwaacamela. b
7. Tiheeni nnahuseryaahu orweela wa Aparahamu okhala ooreheryeya omvaha mwanawe ntoko mukucho?
7 Yehova aahimveka Aparahamu, mulopwana a nroromelo noolipa wi apake echu yoovilaxa: Omveleele mwanawe Isaki ntoko mukucho. Mweeparipari Aparahamu aahoona ela okhala echu yawiicelaxa. Nyenya owo aahimwiiwelela Yehova. Nto Muluku aahimuhiiha ahalaka vakhaani omwiipha. Nlelo, yootakiherya yeela ennahusiha achu oothene erino nroromelo eparipari yoochuneya. Yehova aari ooreheryeya omveleela Mwanawe oosiveliwa ntoko mukucho. Yehova onnaasivela achu vancipale.—Map. 22:1-18.
8. Tiheeni nnahuserya orweela wa mikucho sa axinama saavekiwa mu Nlamulo? (Onamukucho 4:27-29; 17:11)
8 Iyaakha masana masaneene ohoolo waya, Yehova aahaavaha Aisarayeli Nlamulo, nave owo aahaaleela wi evaheke mikucho sa asinama wi ileveleliwe soocheka saya. (Mwaalakhanye Onamukucho 4:27-29; 17:11.) Mikucho seiho sooniherya mukucho mutokweene, yoowo waahaala waavuluxa achu moomalela orweela wa yoocheka. Alipa a miririmu a Muluku yaahiveereliwa othariha wi muyareriwo waaroromelihiwe, yoowo aahaala okhala xaxaxa Mwaana a Muluku, aahaala ohooxeya ni wiiphiwa. Owo aahaala wiiphiwa ntoko mukucho wa epucepuche. (Yes. 53:1-12) Mwaanyiherye ela: Yehova aahaala omveleela Mwanawe oosiveliwa ntoko mukucho wi aavuluxe achu, ophitaanyerya nyuwaano, orweela wa yoocheka ni okhwa!
TIHEENI YESU EENREIYE WI AWOOPOLE ACHU?
9. Tiheeni Yohani Mpatisi aalonceiye sa Yesu? (Ahepri 9:22; 10:1-4, 12)
9 Mu nsana noopacerya E.K., mulapeli a Muluku Yohani Mpatisi aahiloca sa Yesu o Nasareti ariki: “Moone Epucepuche ya Muluku, yeeyo enaviihavo yoocheka ya mweelaponi!” (Yoh. 1:29) Masu yaala annamooniherya Yesu ntoko muyareriwo waaroromelihiwe. Owo aahaala ovaha mukucho waaroromelihiwe. Vookuchula, muyareriwo wa Yehova waahiphiya wi owoopole achu moomalela wa yoocheka.—Mwaalakhanye Ahepri 9:22; 10:1-4, 12.
10. Yesu oonihenrye hai wi ‘aarweenle owiichana’ alipa oocheka?
10 Voopacerya, Yesu aatikitheren’ye wa achu yaawo yiisoona moonanara woona wi yaari achu oocheka nave owo aahaawopa okhala oomuchara awe. Owo aanasuwela wi yoocheka yaari mutathaari waaweeriha achu wiiceliwa. Mwawiihiiha, owo aanawaavya alopwana ni athiyana yaawo yaasuwela wi yaari alipa oocheka. Apharihelaka niphwanaphwaniho, aaloca: “Achu ahiniiceliwa hanamwaavya mulipa a murece, nyenya yaale aniiceliwa tanamwaavya.” Owo aahaaceererya: “Nkirweenle owiichana achu awookololowa, nyenya alipa oocheka.” (Mat. 9:12, 13) Yesu aanakhala mwawiiwanana ni masu yaala. Owo moosivela aahilevelela soocheka sa muthiyana yoowo aarapiha inaani sa Yesu ni miithori sawe. (Luka 7:37-50) Owo aahimuhusiha iparipari soochuneya muthiyana o Samariya veehimeni, naamwi Yesu aasuwela meecelo oohiphwanelela a muthiyana. (Yoh. 4:7, 17-19, 25, 26) Ophiyerya wi Muluku aahimvaha Yesu ikuru sa waaviha alopwana, athiyana ni anamwane yaawo yaakhwile.—Mat. 11:5.
11. Ntakhara heeni achu oocheka yaanamwaacamela Yesu?
11 Ninnawerya wiiwexexa ntakhara heeni achu yaawo yeera ichu soonanara yaasiveliwaaya omwaacamela Yesu. Owo aanawooniherya niphwanya ni oreera murima. Awo yaanakhala ootaphuwa omwaacamela. (Luka 15:1, 2) Nave Yesu aanathamalela ni waachuwela yaawo yooniherya nroromelo mwa yoowo. (Luka 19:1-10) Yesu aahooniherya wa achu mukhalelo Yehova oreiye aikharari. (Yoh. 14:9) Moorweela wa masu ni saweera sa Yesu, ninnahuserya wi Yehova taikharari nave onnaasivela achu oocheka. Yesu aahaakhaviherya achu oocheka ochuna otoroka okumi aya ni omuchara yoowo.—Luka 5:27, 28.
12. Tiheeni Yesu aahusinheiye vooloca sa okhwa wawe?
12 Yesu aanasuwela yeeyo yaahaala omweera muhoolo. Mu ikwaha sincipale, owo aahaaleela oomuchara awe wi owo aahaala oveleeliwa ni wiiphiwa va mwiri. (Mat. 17:22; 20:18, 19) Owo aanasuwela wi mukucho awe waahaala oviihamo yoocheka mweelaponi, hiiha ntoko Yohani aalalen’yeiye ni alipa a miririmu yaalohenryaaya. Yesu tho aahihusiha wi amanle oveleela okumi awe, aahaala ‘wiiruuhela achu oothene.’ (Yoh. 12:32) Achu oocheka yaanwerya omuhakalaliha Yehova moorweela wa omweemererya Yesu ntoko Pwiyaya ni moorweela wa ochara iphiro sawe. Waakhanle wi aheerano yeeyo, vookuchula yaahaala ‘otaphuliwa wa yoocheka.’ (Aro. 6:14, 18, 22; Yoh. 8:32) Mwawiihiiha, mwawiiveleela ni moolipa murima, Yesu aahihoolela okhwa wawe wawiicela.—Yoh. 10:17, 18.
13. Mmukhalelo taani Yesu aakhwileiye, nave okhwa wawe onanihusiha eheeni vooloca sa Yehova Muluku? (Moone tho eruku.)
13 Yesu aahitumihiwa, ophariwa, ophuciwa, wootheriwa, othorihiwa, ophiyerya ohooxiwa. Anakhoco yaamukeriha o nipuro aayeiye wiiphiwawo nave yaamukhomela vamwirini. Vaavaa aavilenleiye moororomeleya wiicela woothene yoole, aakhalavo Muchu mukina yoowo aatempe ohooxeya. Owo aari Yehova Muluku. Yehova aakhalano owerya ni ikuru sa weeriha wi Mwanawe ahihooxeye nto owo heenreno yeeyo. Ntakhara heeni? Tiheeni yaamweerinhe Tiithi oosivela weerano ichu mmukhalelo yoowo? Osivela. Yesu aaloca ariki: “Vawi Muluku aatepa osivela elapo ophiyerya omvaha Mwanawe ooyariwa meekheiye, wi oothene yoole onamuroromela ahitoloxiwe, nto akhaleno ekumi yoohimala.”—Yoh. 3:16.
Moorweela wa weemererya wi Mwanawe iiphiwe, Yehova aahisooseya murima ni yoolakelela yawi anoopole wa yoocheka ni okhwa (Moone eparakrafu 13)
14. Tiheeni mukucho wa Yesu onoohusihaayani?
14 Mukucho wa Yesu yawooniherya etokweene yawi Yehova onnaasivela anamwane a Atamu ni Eva. Ela ennooniherya mukhalelo Yehova onoosiveleiyeeni. Owo oomveleela Mwanawe oosiveliwa ni ovilela ohooxeya otokotoko ni yoolakelela ya owoopolaani wa yoocheka ni okhwa. (1 Yoh. 4:9, 10) Chiryene, owo onnachuna omukhaviherya mmoha ti mmoha a hiyo owaniha ni yoocheka, ni ovootha!
15. Tiheeni nnaphwanelaahu weera wi niphure yamahala ya Muluku ori mukucho wawoopola wa Yesu?
15 Yamahala ya Muluku, mukucho wa woopola wa Mwanawe ooyariwa meekheiye, onneeriha okhala wooweryeya wa hiyo oleveleliwa soocheka. Nto wi nleveleliwe ni Muluku nnaphwanela weera echu emoha. Echu taani yeeyo? Yohani Mpatisi vamoha ni Yesu mwaneene aavaha naakhulo: “Murukunuxe murima, ntakhara Omwene wa wirimu wohaacamela.” (Mat. 3:1, 2; 4:17) Mwawiihiiha ocharuwa echu yoochuneyaxa, naachunaka wi niwanihe ni yoocheka ni omwaacamela Tiithi ahu oosivela. Nyenya ocharuwa onavolowela eheeni? Nave ti mwawiihai eyo enanikhaviheryaaya owaniha ni mukhalelo ahu woocheka? Mwaha woohuserya onacharela onahaala waakhula makoho yaala.
NCIPO 18 Othamalela Yawoopola
a MASU ATHARIHIWE: Mpiipiliyani masu awi “yoocheka” enanwerya waahiwa saweera soonanara, ohikhala mwawiiwanana ni meecelo avasulu a Yehova. Nto masu awi “yoocheka” enanwerya waahiwa ohiphaameya, naari yoocheka yeeyo ori mukhalelo nramvaahu wa Atamu. Yoocheka yeeyo nramvaahu tenaneeriha oothene ahu okhwa.
