Taavi yaari mapacereryo a sinakooka?

NSU “sinakooka” nnarwa mu elocelo ya Ekriki nnataphulela “muthukumano wa ekulucu” naari “othukumana vamoha.” Nsina nla ti noophwanelela woona wi ovinyerya khalai, Ayuta yaahikhalano yookhovelela ya othukumana mu sinakooka wi yaakhele nihusiheryo ni omulapa Muluku. Soorepa sa Ehepiri hasinavaha soothoonyerya sookwakwaleya vooloca sa sinakooka, nyenya sookhalavo sooleeliherya sookwakwaleya mu Soorepa Seekristu sa Ekriki wi mapuro oothukumana sintoko yaawo yaahikhalavo chiryene mu nsana noopacerya E.K.

Anamahuserya ancipale anaroromela wi isinakooka soopacerya saakhanle variyari va elukuluku yeeyo Ayuta yaaryaaya wookapuroni o Papulu. Liivuru Encyclopedia Judaica onnathariha: “Alipa oophariwa, yaawatiihiwa oya mu Empa ya Muluku, mu elapo yookhopela, moonelo aya wa ochuna nihakararyo mwa sawuukhula saya, waanaweeriha ochuna othukumana elukuluku ti elukuluku, mwawooneya mu nihiku Nawoorowa, nave wi yaalakhanye Soorepa.” Vaavaa awo yaataphuliwaaya wookapuroni, enooneya ntoko wi Ayuta yaahititelela othukumana ntakhara mavekelo ni waalakhanyaka Soorempwa, ni otikitherya isinakooka mmapuro ari oothene yaakhalaayawo.

Omapacereryo wa nsana noopacerya E.K., esinakooka yaahikhala nipuro ntokotoko na malapelo a Ayuta ni okhala waya vamoha mmiceche soomwalamwala so Metiteraniyu, mu makupa a oriyenti Metiyu, navetho o Isarayeli woothene. Muhusiha a miyaha sa Ayuta a esikola yavasulu yo Yerusalemu Lee Levine ooloca: “Esinakooka eyo yaaphariheliwa ntoko mpuro wa mahusiheryo, a soolya saweela, olociwa miyaha naari milacu, operekhiwa wa ikhorowa sa achu a muceche yoole, mithukumano sa epoliitika ni sa achu vyakala.” Owo ohaaceererya: “Echu yoochuneyaxa, mweeparipari naari nipuro na malapelo.” Hannaphwanela okhala ootikhiniheya, wi Yesu moohihiyererya anaphwanyeya mu sinakooka. (Mar. 1:21; 6:2; Luka 4:16) Waari musinakooka mwemmo owo aahusiheiyemo, aalopoleiyemo, ni waaceenyerya yaale yaaphwanyeya. Omanle otikitheryiwa muloko Weekristu, murummwa Paulo anasiveliwa vancipale ohusiha mu sinakooka. Vaavaa aavoloweiye mu epooma, Paulo woopaceryani aanaya mu sinakooka, woona wi aahaala waaphwanya achu yaachuna osuwela ichu soomunepani.—Saw. 17:1, 2; 18:4.