MWAHA WOOHUSERYA 51
NCIPO 3 Yehova Onnanivaha Ikuru ni Ewehereryo
Miithori Anyu Toochuneya wa Yehova
“Mukhapelele miithori aka mu nipotoro nanyu nannyapara, apwanne herempwale mu liivuru anyu?”—SAL. 56:8.
IPONTU SA VASULU
Mmwaha yoola onahaala onuupuxerya wi Yehova onnasuwela vaavaa nnakhalaahu oothanana nave wi onahaala onivaha yeeyo nnachunaahu wi nikhale phaama.
1-2. Mikhalelo taani sinaneeriha omoriha miithori?
WIILIWIILI oothene ahu, ninnamoriha miithori. Ikwaha ikina ninnamoriha miithori nthowa na okhala oohakalala. Akhweya nyuwaano mwaahimoriha miithori vaavaa yeeren’yaaya echu yoochuneyaxa naari yavameekhaaya wa nyuwaano, ntoko yootakiherya, oyariwa wa mwaninyu, vaavaa muupuwenlaanyu echu yaphaamaxa naari vaavaa mwaamwaakhelaanyu nthamwene anyu oosiveliwa yoowo mmalinhaanyu iyaakha sincipale muhoonanne.
2 Nyenya, ikwaha sincipale ninnanla nthowa nawi nri oothanana ni oohooxeya. Ntoko yootakiherya, nnanwerya winla vaavaa muchu onannyeenyeiheiye vancipale. Nnanwerya winla vaavaa nnoonaahu wiicela wanthowa na ereca etokweene ehinalooleya, naari vaavaa nnamuyeleelaahu oosiveliwaahu mookhwani. Mu ilukuluku seiha, nnanwerya wiisoona ntoko mulipa a miririmu Yeremiya vaavaa Yerusalemu aatoloxiweiye ni Apapulu. Yeremiya ooloca: “Mihice sa maahi sinnachimaka mwiithoni mwaka . . . Miitho aka annanla moohihiyererya, hanamaala.”—Wiik. 3:48, 49, TNM.
3. Yehova onoona hai vaavaa onawooneiye alapeli awe ehooxeyaka? (Yesaya 63:9)
3 Yehova onnasuwela phaameene ikwaha seiho nnanlaahu mu okumi ahu nthowa na sawuukhula. Piipiliya onnanleela wi owo onnasuwela wi mmoha ti mmoha a hiyaano wiiliwiili onnahooxeya, nave owo onnaniwiriyana vaavaa nnamvekaahu nikhaviheryo. (Sal. 34:15) Nyenya Yehova onnapaka sincipale opwaha pahiru onoona ni oniwiriyana. Owo Tiithi ahu nave onnansivela vancipale, mwawiihiiha, vaavaa owo onanooneiye ninlaka, owo onnatepa othanana nave mwawaakuveya onnanikhaviherya.—Mwaalakhanye Yesaya 63:9.
4. Sootakiherya taani sa Mpiipiliyani nnahaalaahu othokororya, nave tiheeni nnahaalaahu ohuserya vooloca sa Yehova?
4 Mmasu awe, Yehova onnaloca mukhalelo owo aakhuleleiye vaavaa alapeli awe yaamorinhaaya miithori. Nnanwerya woona yeela nthokororyaka sootakiherya sa Ana, Tavite ni Mwene Esekiya. Tiheeni yaaweerinhe omoriha miithori? Yehova aakhulenle hai oveka waya nikhaviheryo? Mwawiihiiha, nnahaala woona mukhalelo Yehova onanihakararyeiye vaavaa nnakhalaahu oothanana, vaavaa nniiciwaahu naari vaavaa nnoonaahu wi hiyaavo ewehereryo.
MIITHORI A OTHANANA
5. Ana iisoona hai ni mukhalelo awe?
5 Ana aahihoolela makacamiho oohiyanahiyana yaawo yaamweerinhe omoriha miithori a othanana. Makina a yaawo, waari nthowa na waaceiwa nave namwaaceiwa awe Penina, aanamunyemula. Yaakhala ntoko wi hiyaari yawiicela, woona wi Ana haarino anamwane, nyenya Penina aahikhalano anamwane ancipale. (1 Sam. 1:1, 2) Penina aahititelela omphuca Ana nthowa na ohikhalano anamwane. Nyuwaano mwaahaala wiisoona hai ni mukhalelo yoola? Ana aahikhala oonyeenyeya ophiyerya “ananla, ahinalya” nave aahikhala ‘oosoosiwa murima’.—1 Sam. 1:6, 7, 10, PMM.
6. Tiheeni Ana eenreiye wi aphwanye nihakararyo?
6 Ti mwawiihai Ana aaphwannyeiye nihakararyo? Echu yaamukhavihenrye yaari wi owo aahiya o nipuro namalapelo eeparipari, o tapernakulu. Woonaru waacamela va mukhora wa n’yate na tapernakulu, ‘owo aahaavekela Apwiya anlaka mootitelela.’ Owo aahimveka Yehova: “Vareryani othanana wa kapuro anyu, mukuupuwele!” (1 Sam. 1:10, 11, PMM) Ana aahiloca miyoonelo sawe wa Yehova. Ti yawooneya wi Yehova aahitannyeyaxa murima vaavaa oonneiye miithori a mwanawe yoola oochuneya!
7. Nihakararyo taani Ana aakhenleiye nthowa na ohula murima awe wa Yehova?
7 Ti mwawiihai Ana iisoonneiye amanle ohula murima awe wa Yehova mu nivekelo ni waakhela yoororomeliha wa Namukucho Mutokweene Eli? Piipiliya onnaloca: “Muthiyana ole àpwaha, àlya ni winiwa murima wammalela.” (1 Sam. 1:17, 18, BNM) Naamwi mukhalelo awe wa othanana nlelo wahitoroken’ye, Ana aahiisoona okhala ootaphuwa. Owo aahirula niphuta nawe noohokola na mmuupuweloni wa Yehova. Owo aahiiwexexa miyoonelo sawe, aahiwiriyana mavekelo awe nave voocharela, aahimukhaviherya okhalano anamwane.—1 Sam. 1:19, 20; 2:21.
8-9. Mwawiiwanana ni Ahepri 10:24, 25, ntakhara heeni ti woochuneya ophiya mmithukumano Seekristu? (Moone tho eruku.)
8 Nihusiheryo wa hiyaano. Nyuwaano munnahoolela mukhalelo woovila yoowo onaweerihaani omoriha miithori a othanana? Akhweya muri oothanana nthowa na okhwa wa mmusi naari nthamwene anyu. Vaavaa ichu ntoko seiha sineereyaaya, nyuwaano munanwerya ochunaka okhala mukhatiinyu nave eyo enneereya. Nyenya, hiiha ntoko Ana aaphwannyeiye nihakararyo ni nlipiho moorweela wa oya o tapernakulu, nyuwaano tho munanwerya ophwanya nihakararyo moorweela wa ophwanyeya mmithukumano Sekristu—naamwi nyuwaano muri oovelavela ni oothanana. (Mwaalakhanye Ahepri 10:24, 25.) Mmithukumano ninnawiriyana iversikulu sa Mpiipiliyani sinanivaha ichu saphaama seiho sinanilipiha, ola mukhalelo mmoha yoowo Yehova onanikhaviheryeiye omaala wuupuwelaka ichu seiho sinaneeriha okhala oothanana. Ela enanwerya onikhaviherya ovareryela miyoonelo sahu, naamwi mukhalelo ahu ohaakumve okhala phaama mwawaakuveya.
9 Mmithukumano sahu, anna ni arokora annanihakararya nave annanooniherya mukhalelo ananisivelaaya, nave ninniisoona okhala phaama vaavaa nnakhalaahu ni yaawo. (1 Ate. 5:11, 14) Moone yaweereya emoha ya piyoneero avameekhaaya yoowo aamuyeleenle mwaariye mookhwani. Owo ooloca: “Miyaano nlelo kinnamoriha miithori. Ikwaha ikina kinnakhala mukhataaka nave kininla. Nyenya mithukumano sahu sinnakhala ehime yeeparipari ya nlipiho. Masu aphaama a anna ni arokora, mweeparipari ennakhala oohakararya wa miyaano. Moohipwacha mukhalelo kinakhalaaka oothanana kihaakumve ophiya mmithukumano, kaphiya weiwo ilukuluku soothene kinnakhala phaama.” Vaavaa nnakhalaahu mmithukumano, Yehova onnaapharihela anna ni arokora wi enikhaviherye.
Anna ni arokora ahu ananwerya oloca ni hiyaano mwaphaama ni oneeriha wiisoona okhala phaama (Moone eparakrafu 8-9)
10. Nni ncharihe hai yootakiherya ya Ana vaavaa nnakhalaahu oothananaxa?
10 Ana tho aaphwanya nihakararyo moorweela wa oloca miyoonelo sawe wa Yehova mu nivekelo. Nyuwaano tho munanwerya ‘omvonyerya Yehova wuukhuwa wanyu woothene,’ muroromelaka wi owo onahaala owiriyana. (1 Pet. 5:7) Murokora mmoha yoowo aiyawe yiiphiwe ni ampava yaawo yaarino kapuchi, onnuupuwela: “Kaahikhala oothananaxa ophiyerya kaahuupuwela wi nkirwa tho kikhala oohakalala. Nyenya ilukuluku soothene kaavekelaaka wa Atiithi aka Yehova, yaawo anakisivela vancipale, kaaniisoona okhala phaama. Ikwaha ikina miyaano nkaasuwelano othariha mukhalelo kiisoonaaka, nyenya owo aanakiiwexexa. Vaavaa kaakhalaaka oothananaxa, kaanavekela wa yoowo wi akivahe murecele. Mwawaakuveya kaaniisoona okhala oomaaleleya nave kaanawerya opaka echu yeeyo kaachunaaka opaka mu nihiku nenle.” Vaavaa nyuwaano munavekelaanyu wa Yehova ni omuleela yeeyo enaweerihaani okhala oothanana, Yehova tho onnakhala oothanana nave onniiwexexa mukhalelo muniisoonaanyu. Naamwi nikacamiho nanyu nihimanle, Yehova onanwerya woohakararyaani ni wookhaviheryaani okhala oomaaleleya. (Sal. 94:19; Afi. 4:6, 7) Nave owo onahaala ochuwela ovilela wanyu woororomeleya.—Ahe. 11:6.
MIITHORI NTHOWA NA OHIROROMELEYA WA AKINA
11. Ti mwawiihai Tavite iisooneiye vaavaa akina yaamukhalihaaya moohiroromeleya?
11 Variyari va okumi awe, Tavite aanaphwanela ovilela makacamiho oovila yaawo yaamweerinhe omoriha miithori. Yaahikhalavo achu ancipele yaamwiica, ophiyerya tho asinthamwene awe akina ni amusi awe yaari oohiroromeleya wa owo yaaheererya omuhooxa. (1 Sam. 19:10, 11; 2 Sam. 15:10-14, 30) Variyari va elukuluku yoovilaxa mu okumi awe, owo oorepa: “Kiri oovelavela wanthowa na wuupulelaxa; ohiyu woothene kinnanaaniha ekaama aka ni miithori; kinakonaakavo kinnasareihavo ni miithori.” Ntakhara heeni Tavite iisooneiye hiiha? Owo oothariha: “Wanthowa na oothene yaale anakihooxa”. (Sal. 6:6, 7) Vaavaa akina yaamukhalihaaya Tavite moonanaraxa, owo aanakhala oothanana ophiyerya ahinawerya omaala winla.
12. Ti mwawiihai Tavite iisooneiye vooloca sa Yehova? (Salmu 58:8)
12 Moohipwacha wiica yoowo Tavite aahoolenleiye, owo aari oolekecheya wi Yehova aanamusivela. Owo oorepa: “Yehova onamwiiwa winla waka.” (Sal. 6:8) Ekwaha ekina, owo aahirepa masu aphaamaxa yaawo nnaphwanyaahu mu Salmu 56:8. (Mwaalakhanye.) Vaavaa nnaalakhanyaahu masu yaala, nnanwerya wiiwexexa wi Yehova onnansivelaxa nave onnuukhuwa ni mukhalelo nniisoonaahu. Tavite olonce wi waakhanle ntoko wi Yehova aathukumanya miithori awe akhapelelaka mu nipotoroni naari orempwa mu liivru. Tavite aanaroromela wi Yehova aahoona nave aahuupuwelela wiicela wawe. Tavite aahilekecheya wi Atiithi awe oosivela a wirimu yaanasuwela ohiya pahiru seiho aahooleleiye, nyenya tho mukhalelo iho saamvolowelaaya.
13. Vaavaa akina anawuulihaayani muru naari wookhalihaani moohiroromeleya, tiheeni munaphwanelaahu wuupuwela? (Moone tho eruku.)
13 Nihusiheryo wa hiyaano. Apwanne muri a murima woonyaanyeya nthowa na muchu yoowo mwaamuroromelaanyu ookhalinheni moonanara? Akhweya nyuwaano munnahooxeya mmurimani nthowa nawi ompwana anyu naari othela wanyu orimmala moohiwehereryeya, naari akhweya muchu yoowo mwaamusivelaanyu oohiya omurumeela Yehova. Munna mmoha amwaariye epanke mararuwo nave emuchawa, ooloca: “Nkaawerya weemererya wi eyo yoheereya ni miyaano. Kaahiisoona okhala oothanana, oonyeenyeya ni oohikhala echweenevo.” Wakhala wi mookhalihiwa moohiroromeleya naari mohuulihiwa muru, muhakararyeye moorweela wa osuwela wi Yehova harwa oohiyaani. Munna owo ooloca: “Kohiiwexexa wi achu ananwerya okhala oohiroromeleya wa hiyaano, nyenya Yehova ilukuluku soothene onamukhala Mwala ahu. Moohipwacha yeeyo enahaala weereya, owo onamunikhaviherya. Owo harwa aahiya achu awe oororomeleya.” (Sal. 37:28) Muupuwele wi osivela wa Yehova onnapwaha wa muchu ori oothene. Vaavaa nyuwaano munachaiwaanyu ni muchu yoowo mwaamuroromelaanyu onnakhala wawiicelaxa, nyenya Yehova hanatoroka echu yeeyo ooneiye mwa nyuwo, nyuwaano mwa asisapo wa yoowo. (Aro. 8:38, 39) Echu munaphwanelaanyu wuupuwela ti ela: Moohipwacha mukhalelo muchu ookhalinheiyeni, Atiithi anyu a wirimu annoosivelaani.
Liivru a Salmu onnanroromeliha wi Yehova ori vakhiviru wa yaale a murima woophweeya (Moone eparakrafu 13)
14. Yoororomeliha taani Salmu 34:18 onanivaheiye?
14 Waakhanle wi mookhalihiwa moonanara, masu a Tavite anaphwanyeya mu Salmu 34:18 ananwerya wookhaviheryaani. (Mwaalakhanye.) Ereferensiya emoha elonce wi yaale ari “oonyaanyeya mmunepani” ananwerya wiisoona wi hiyaano echu. Ti mwawiihai Yehova onaakhaviheryeiye yaale aniisoona mmukhalelo yoola? Yehova “ori vakhiviru” vahu, Owo ori ntoko tiithi naari mai yoowo onampharelela ni omuhakararya mwaana yoowo oninla, vaavaa nnahooxeyaahu nthowa na muchu yoowo onikhalinhe moonanara, Yehova onnoona wiicela nave onnanikhaviherya mwawaakuveya. Owo onnakhala awuukhuwa wi anihakararye vaavaa nnakhalaahu ni murima woophweeya ni wakhala wi ninniisoona ohikhala echu enevo. Nave onnanivaha ichu sincipale sinanivaha ewehereryo seiho sinanikhaviherya ovilela ni saweeha sa mahiku ahu.—Yes. 65:17.
MIITHORI NTHOWA NA OHIKHALANO EWEHERERYO
15. Mikhalelo taani Esekiya aahoolenleiye seiho saamweerinhe winla?
15 Arino iyaakha 39, Mwene Esekiya o Yuta aahiiceliwa ereca etokweene. Mulipa a miririmu Yesaya aahimuleela muchaka wa Yehova wi Esekiya ahaala okhwa nthowa na ereca awe. (2 Mam. 20:1) Wa Esekiya yaakhala ntoko wi hiyaarivo ewehereryo. Nthowa na othanana ni muchaka yoowo, Esekiya aahinla vancipale. Owo aahipaka nivekelo nookhumela vathi va murima.—2 Mam. 20:2, 3.
16. Tiheeni Yehova eenreiye wa Esekiya?
16 Vaavaa Yehova iiwaleiye nivekelo na Esekiya ni oonneiye miithori awe, aahikhalano niphwanya ntakhara Esekiya nave mooreera murima aahimuleela owo: “Kohiiwa nivekelo naa, koona mithori aa. Kinamoopenusha!” Moorweela wa Yesaya, Yehova aahimuroromeliha mooreera murima wi aahaala waaceererya okumi awe ni omwaakiha Yerusalemu mmatani mwa Asiriya.—2 Mam. 20:4-6, PMM.
17. Ti mwawiihai Yehova onanikhaviheryeiye vaavaa nnahoolelaahu makacamiho oovilaxa mookumini? (Salmu 41:3) (Moone tho eruku.)
17 Nihusiheryo wa hiyaano. Apwanne munnahoolela nikacamiho na okumi nenlo nnooneya wi hiwaavo openuwa? Mmuleele Yehova mukhalelo muniisoonaanyu, owo onahaala woowiriyanaani naamwi nyuwaano mwinlaka vaavaa munavekelaanyu. Piipiliya onnanroromeliha wi “Tiithi a ikharari ni Muluku a ohakararya woothene” onahaala onihakararya mu saweeha sahu soothene. (2 Ako. 1:3, 4) Mmahiku ahu yaala hannaphwanela oweherya wi Yehova onahaala omalihavo makacamiho ahu oothene, nyenya nnaphwanela omuroromela owo wi anikhaviherye. (Mwaalakhanye Salmu 41:3.) Moorweela wa munepa awe waweela, Yehova onnanivaha ikuru, miruku ni murecele wa mpuwa wi nivilele ni seiha. (Mas. 18:14; Afi. 4:13) Owo tho onnanihakararya moorweela wa onivaha ewehereryo yawi omwaahiyu, haavo onahaala wiiceliwaka.—Yes. 33:24.
Yehova onahaala waakhula mavekelo ahu anivahaka ikuru, miruku ni murecele wa mpuwa (Moone eparakrafu 17)
18. Yoorepa taani munoonaanyu wi ti yoohakararya vaavaa muchu onahooleleiye nikacamiho noovilaxa? (Moone ekaaxa “ Masu Oohakararya wi Nivute Miithori Ahu.”)
18 Esekiya aahihakararyeya ni masu a Yehova. Moolikana tho, nnanwerya ophwanya nihakararyo Mmasu a Muluku. Vaavaa nnakhalaahu awuukhuwa, masu a Yehova a Mpiipiliyani ananwerya onihakararya ni onikhaviherya okhala oomaaleleya. (Aro. 15:4) Vaavaa murokora mmoha a Onaneela Nsuwa wa Afrika aaphwanyiweiye ni ereca ya kanser, owo ikwaha sincipale aaninla. Owo ooloca: “Yoorepa emoha kinoonaaka wi ti yoohakararya ti Yesaya 26:3. Namwi ikwaha sincipale nihiweryaka omaliha nikacamiho, eversikulu ela ennaroromeliha wi Yehova onanwerya oneeriha okhala oomaaleleya ni onikhaviherya ovilela yaweeha vyakala.” Apwanne yookhalavo yoorepa yeeyo munoonaanyu wi tiyoohakararya vaavaa munahoolelaanyu mikhalelo seiho inooneya ntoko wi tisoovilaxa, akhweya ophiyerya ohikhalavo ewehereryo?
19. Tiheeni nnaweheryaahu omwaahiyu?
19 Makuchuwelo a mukhalelo yoola wa ichu onnaacamela, nave ninnaweherya wi anahaala okhalavo makacamiho mancipale yaawo anatannya wiicela ni winla. Nyenya, hiiha ntoko noonnaahu mu sootakiherya sa Ana, Tavite ni Mwene Esekiya, Yehova onnoona winla wahu nave onnakhala oothanana. Owo onnansivela moorweela wa otitelela okhala oororomeleya wa yoowo moohipwacha wiicela, nave owo onnuupuwela miithori ahu. Mwawiihiiha, vaavaa nnahoolelaahu mikhalelo soovila, mweeparipari nnaphwanela ohula murima ahu wa Yehova mu nivekelo. Nihirwe niivalaanye ni anna ni arokora ahu oosivela a mmulokoni. Nave moorweela wa omwaalakhanya Piipiliya nnahaala waakhela ohakararya wa Yehova. Nnaphwanela ororomela wi natitelela ovilela moororomeleya, Yehova onahaala onireeliha. Eyo enaphitaanyerya yoororomeliha yootikhiniha yawi mu elukuluku aya, owo onahaala ovuta mmiithoni mwahu miithori oothene a othanana, ohiroromeleya wa akina ni ohikhalano ewehereryo. (Wup. 21:4) Mwawiihiiha, pahiru nnahaala omorihaka miithori a ohakalala.
NCIPO 4 Yehova “ti Mukukhuli Aka”
