Akina yunnunwe mmiceche seiyo alopwana ancipale anaakhalihaaya athiyana ntoko wi tahi asisapo. Ntoko yootakiherya, Hansi, ooweherya mmoha a ekulucu o Poliviya ooloca: “Alopwana akina aphwiiwale mu sookhovelela soohiphwanelela seiho sinavuwiha wi alopwana teri ookhweleyaxa waapwaha athiyana nave wiiliwiili hanaacicimiha yaawo.” Xenkixiani, mutokweene mmoha o Taiwani, ooloca: “Kinakhalaakawo, alopwana ancipale anoona wi athiyana hanaphwanela wiivoliiherya mmiyaha saya. Wakhala wi mulopwana ooloca moonelo wa muthiyana vooloca sa echu vyakala, asinthamwene awe ananwerya omveeha.” Alopwana akina annooniherya nthalu naya vooloca sa athiyana mmukhalelo wawooneya. Ntoko yootakiherya, mu ochekula waya, awo ananwerya waanyemula ni waahiciha athiyana.

Moohakalaliha, haavo muchu ori oophariwa ni sookhovelela sa elapo yeeyo oyariweiyewo. Owo onanwerya ovootha mukhalelo yoowo wa woona wi alopwana teri avasulu waapwaha athiyana. (Aef. 4:22-24) Eyo enanwerya weereya echarihaka yootakiherya ya Yehova. Mmwaha yoola nnahaala woona mukhalelo Yehova onaakhaliheiye athiyana, mukhalelo anna aneeraaya ehuserye waakhaliha athiyana hiiha ntoko Yehova ni mukhalelo atokweene aneeraaya evahe yootakiherya mmukhalelo wa wooniherya ncicimiho wa arokora.

YEHOVA ONAAKHALIHA HAI ATHIYANA?

Yehova onnavaha yootakiherya yoophaameya vooloca sa mukhalelo athiyana anaphwanelaaya okhalihiwaka. Ntoko Tiithi oopixa murima, owo onnaasivela anamwane awe oothene. (Yoh. 3:16) Nave arokora oororomeleya ari ntoko anamwane oochuneyaxa wa yene. Muthokororye mikhalelo inacharela inooniheryaaya mukhalelo Yehova onaavaheiye esisapo athiyana.

 Owo hanaakhaliha mwa nthalu. Yehova ohaapatuxa alopwana ni athiyana oophwanaphwana ni yoowo. (Map. 1:27) Owo haapatunxe alopwana wi ekhale amasuweleloxa naari amavyakeloxa waapwaha athiyana, naari mano tahi wi onaachuna alopwanaru waapwaha athiyana. (2 Math. 19:7) Owo ohaapatuxa alopwana ni athiyana ni owerya omohamoha wa wuupuwela wi yiiwexexeke iparipari sa Mpiipiliya ni wuupuwelela mikhalelo sawe sooreera. Yehova tho onnathokororya nroromelo na alopwana ni athiyana mmukhalelo woolikana, naamwi ewehereryo aya ori okhala mparataiso veelaponi yavathi naari orumeela ntoko mamwene ni alipa mukucho wirimu. (2 Pet. 1:1, enoota) Chiryene, vooloca sa athiyana, Yehova tahi a nthalu.

Owo onnaawiriyana. Yehova onnapwachapwacha mukhalelo wa wiisoona ni wuukhuwa wa athiyana. Ntoko yootakiherya, Owo aahiwiriyana nave aaheeravo echu mwawiiwanana ni mavekelo a Rakeli ni Ana. (Map. 30:22; 1 Sam. 1:10, 11, 19, 20) Yehova tho aahaaveerela alopwana omurepa Piipiliya ophitaanyerya saweereya sa alopwana yaawiriyanne athiyana. Ntoko yootakiherya, Aparahamu aahichariha malakiheryo a Yehova a onwiriyana mwaariye, Sara. (Map. 21:12-14) Mwene Tavite aahinwiriyana Apikayeli. Mweeparipari, owo aahoona wi Yehova taamuruminhe wi aye aloce ni yoowo. (1 Sam. 25:32-35) Yesu, yoowo onooniherya moophaameya mikhalelo sa Atiithi awe, aahaawiriyana amamaawe, Mariya. (Yoh. 2:3-10) Sootakiherya seiya sinnooniherya mukhalelo mmoha yoowo Yehova onooniheryeiye mu waacicimiha ni waawiriyana athiyana.

Owo onnaaroromela yaawo. Ntoko yootakiherya, Yehova aahimuroromela Eva wi akhaviherye elapo yoothene. (Map. 1:28) Va weerano yeeyo, owo aahooniherya wi haamoona ntoko ooyeveelavo wa Atamu, nyenya ntoko mukhaviheryi awe. Yehova aahaaroromela tho alipa a miririmu aasithiyana Tepora ni Hulta wi yaavahe ekano achu awe ophitaanyerya muthoriha ni mwene. (Amut. 4:4-9; 2 Mam. 22:14-20) Mmahiku ahu, Yehova onnaaroromela athiyana Eekristu wi ekhwaaniherye muteko awe. Arokora yaala oororomeleya annalapa ntoko alaleeryi, mapiyoneera ni mamisiyonaariya. Awo annakhaviherya oteka ni orehererya Ipa sa Omwene ni ipa sa marehereryo. Akina a yaawo anarumeela Opeteli, akina analapa mu ikupweete sootaphulela. Arokora yaawo eri ntoko nikhuuru ntokweene na anakhoco yaawo Yehova onaaphariheleiye wi yeereno yookhwela awe. (Sal. 68:11) Mwawooneya, Yehova hanawoona athiyana ntoko oohikhala akuru naari oohiwerya.

TI MWAWIIHAI ANNA ANEERAAYA EHUSERYE WAAKHALIHA ATHIYANA HIIHAA NTOKO YEHOVA?

Anna, wi nsuwele waakhanle wi ninnaakhaliha arokora Eekristu hiihaa ntoko Yehova, nnaphwanela waalikhela muupuwelo ahu ni saweera sahu. Wi neereno yeeyo, ninnachuna nikhaviheryo. Hiiha ntoko ekhankoonya ya raiyu-X enaweryaaya ophwanya nikacamiho na okumi mmurima wa muchu, nthamwene aphaama ni masu a Muluku ananwerya nave anamunikhaviherya ophwanya muupuwelo vyakala woonanara vooloca sa athiyana yoowo akhweya nryaahuno mpuwa mwahu. Tiheeni nnaphwanelaahu weera wi naakhele nikhaviheryo nenla?

Mmukohe nthamwene aphaama. (Mas. 18:17) Ninneerano phaama omwaavya nthamwene oororomeleya yoowo osuweliwe ntoko aphaama ni oophimelela wi nimpakele makoho ntoko ala: “Munoona hai mukhalelo kinaakhalihaaka arokora? Apwanne awo ananwerya oloca wi kinnaacicimiha? Apwanne kinnaphwanela orehererya mukhalelo vyakala vooloca sa mukhalelo kinalocaaka ni yaawo?” Wakhala wi nthamwene anyu ooloca echu vyakala munaphwanelaanyu orehererya, musepe wiisaakiha. Ohiya yeeyoru, munaphwanela opaka matorokelo oochuneya.

Muhuserye Masu a Muluku. Mukhalelo mmoha waphaama wa osuwela waakhanle wi ninnaakhaliha phaama arokora ori moorweela wa waalikhela saweera sahu mu omwaleela wa Masu a Muluku. (Ahe. 4:12) Vaavaa nnamuhuseryaahu Piipiliya, ninnahuserya vooloca sa alopwana yaakhalinhe phaama athiyana ni alopwana yaahaakhalinhe phaama yaawo. Nnanwerya olikanyiha saweereya saya ni sawihu. Ohiya yeeyoru, olikanyiha iversikulu sa Mpiipiliyani inanwerya onikhaviherya osepa opharihela soorepa wi naakihe moonelo ahu woohiphwanelela vooloca sa mukhalelo ahu wa owoona athiyana. Ntoko yootakiherya, mwawiiwanana ni 1 Petru 3:7, muthiyana otheliwe onaphwanela okhalihiwaka ‘mwa ncicimiho ntoko epiya yawaakuvela ophweeya.’ b Apwanne eyo enataphulela  wi owo tooyeveela, a masuwelelo vakhaani ni oowerya vakhaani aalikanyihiwaka ni mulopwana? Hooye! Mulikanyihe masu a Petru ni yeeyo Akalatiya 3:26-29 onaloceiye, wi Yehova ohaathanla athiyana ni alopwana wi yakhale mamwene vamoha ni Yesu wirimu. Vaavaa nnahuseryaahu masu a Muluku ni omveka nthamwene ahu aphaama wi aloce mukhalelo nnaakhalihaahu athiyana, nnanwerya ohuserya wooniherya ncicimiho noophwanelela wa arokora ahu.

TI MWAWIIHAI ATOKWEENE A MULOKO ANOONIHERYAAYA NCICIMIHO WA AROKORA?

Anna mmulokoni tho ananwerya ohuserya waakhaliha arokora mwancicimiho echaraka yootakiherya ya atokweene oosivela. Ti mwawiihai atokweene enatikitheryaaya yootakiherya ya wooniherya ncicimiho wa arokora? Hankooni nthokororye mikhalelo mikina sawooneya sinacharela.

Atokweene annaathamalela arokora. Murummwa Paulo aahivahererya yootakiherya yaphaama wi atokweene echariheke. Owo aahaathamalela vanlakani vene arokora oohiyanahiyana mu ekaarata awe aarepenleiye a muloko wo Roma. (Aro. 16:12) Apwanne munnawerya waanyiherya ohakalala arokora yaala yaakhanlaayano vaavaa ekaarata ya Paulo yaalakhanyiwaaya mmulokoni? Mmukhalelo mmohamoha, atokweene mooreera murima annaathamalela arokora ntakhara mikhalelo saya saphaama ni muteko anapharaaya ntakhara Yehova. Eyo ennaweeriha arokora osuwela wi ennacicimihiwa ni ovahiwa esisapo yincipale. Masu oolipiha a atokweene enaphwanela okhala xaxaxa yaawo arokora anachunaaya wi etitelele omurumeela Yehova.—Mas. 15:23.

Vaavaa enaalipihaaya arokora, atokweene ennapharihela masu ooreera ni ooluluwanya. Ntakhara heeni? Murokora mmoha awiichaniwa Xesika ooloca: “Ti waphaama vaavaa anna analocaaya wa murokora ‘munnaphara muteko waphaama.’ Nyenya ninnatepa othamalela vaavaa anna ananithamalelaaya mu ichu sooluluwanya, ntoko waahusiha aniihu nave tho vaavaa enakiraathaaya moomaaleleya mmithukumano naari vaavaa enaaxaaya elukuluku wi emukuxe oohuserya  aya a Piipiliya wi oonele mithukumano.” Vaavaa atokweene anaathamalelaaya arokora mu ichu sooluluwanya, awo anneeriha wi arokora yiisooneke oochuneya ni asisapo mmulokoni.

Atokweene ennaawiriyana arokora. Atokweene awiiyeviha annasuwela wi tahi wi ilukuluku soothene annakhalano miruku soophwanelela. Atokweene yaala ennaawopa arokora wi ewiriyane miyoonelo saya, nave awo ennaawiriyana moopwacha vaavaa awo analocaaya. Yeerakano yeela, atokweene ennaalipiha arokora nave awo ennaphura. Mwawiihai? Mutokweene mmoha awiichaniwa Xerarto, yoowo onarumeela Opeteli, ooloca: “Kohiiwexexa wi oveka miyoonelo sa arokora yaanakikhaviherya okhwaaniherya murici aka mmukhalelo waphaama. Mu ikwaha sincipale, arokora aapaka muteko muncipale waapwaha anna akina.” Nave mmiloko, ancipale a yaawo ennalapa ntoko mapiyoneera, nave awo aasuwela phaameene vooloca sa achu a mu ekulucu aya. Mutokweene mmoha awiichaniwa Priyani ooloca: “Arokora ahu aakhalano sincipale wi evahererye ntakhara marehereryo. Mwawiihiiha, mphure orweela wa saweereya saya!”

Atokweene amiruku hanaakuvela ovaanya moonelo wa arokora. Ntakhara heeni? Mutokweene mmoha awiichaniwa Etuarto ooloca: “Moonelo ni saweereya sa murokora inanwerya omukhaviherya munna osuwela yeeyo enavolowela mwaha, nave enanwerya omukhaviherya winnuwiha niphwanya. (Mas. 1:5) Naamwi mutokweene ahiyaaka opharihela miyoonelo sa murokora, owo onanwerya omuthamalela wa nthowa na miyoonelo sawe ni wuukhuwa wawe.

Atokweene annaavyakiha arokora. Atokweene amavyakelo annaavya ikari wi yaavyakihe arokora. Ntoko yootakiherya, awo ananwerya waahusiha ohoolela mithukumano sa muteko woolaleerya wakhala wi munna oopatisiwa hanaphwanyeyavo. Awo tho enanwerya waavyakiha opharihela ikaruma naari maakina wi ewerye okhaviherya miteko sa mmarehereryo wa orehererya ni oteka. Opeteli, ahooleli ennaavyakiha arokora wi ekhapelele miteko soohiyanahiyana, ntoko orehererya, othuma, ovareryela ikhorowa, aprokrama a mu komputatore ni ikina. Vaavaa atokweene anaavyakihaaya arokora, awo annooniherya wi annawoona arokora ntoko oowerya ni oororomeleya.

Arokora ancipale ennapharihela ovyakiha yoowo yaakhenlaaya orweela wa atokweene wi yaakhaviherye achu akina. Ntoko yootakiherya, arokora akina annapharihela ovyakiha yaakhenlaaya mmuteko wa oteka wi yaakhaviherye akina orehererya naari oteka ipa saya emanle ovira epahu ya maphacuwelo. Arokora akina ennapharihela mavyakelo yaawo evahereryiwaaya wi elaleerye ni ekarinya ni waakhaviherya ni waavyakiha arokora akina mmukhalelo yoowo wa olaleerya. Ti mwawiihai arokora aniisoonaaya vooloca sa atokweene yaawo enaavyakiha? Murokora mmoha awiichaniwa Xenifer, ooloca: “Vaavaa kaalampaaka mu eproxeetu emoha ya muteko wa oteka Ipa sa Omwene, muhooleli mmoha aapharihela elukuluku awe wi akivyakihe. Owo aahiiwexexa muteko kaaphanraaka nave aahikithamalela wa nthowa na yeeyo. Kaahisiveliwa vancipale olapa ni yoowo nthowa nawi kaaniisoona okhala asisapo ni oororomeleya.”

MIPHURELO SAWAAKHALIHA AROKORA NTOKO EMUSI

Ninnaasivela arokora ahu oororomeleya ntoko Yehova onaasiveleiye! Mwa yeeyo, ninnaakhaliha ntoko emusi. (1 Tim. 5:1, 2) Ninniisoona oocicimihiwa ni awiirumiha wanthowa na omulapa Yehova vamoha ni yaawo. Ninnakhala oohakalalaxa vaavaa awo anoonaaya wi ninnaasivela ni waakhaviherya. Murokora mmoha awiichaniwa Vanesa, ooloca: “Kinnatepa omuthamalela Yehova wa nthowa na opaka makupa a marehereryo awe, yaawo esaren’ye ni anna yaawo enakilipiha vancipale.” Murokora mmoha o Taiwani ooloca: “Kinnatepa omuthamalela Yehova ni marehereryo awe yaawo enaavaha esisapoxa athiyana ni miyoonelo sahu. Eyo ennalipiha nroromelo naka nave ennakeeriha woona ekari kiryaakano ya opaka makupa mmarehereryo a Yehova.”

Yehova onniirumiha vaavaa onawooneiye alopwana Eekristu oororomeleya yiilipixeryaka owoona athiyana hiihaa ntoko Owo onawooneiye! (Mas. 27:11) Munna awiichaniwa Penxami yoowo onarumeela ntoko mutokweene o Eskosiya ooloca: “Moonelo eelapo vooloca sa athiyana onanwerya okhala wooveeha. Mwa yeeyo, vaavaa athiyana anavolowaaya mu Empa ya Omwene, ennachuna woona ohiyana.” Mwawiihiiha, hankooni niilipixerye oothene ahu wi nimutakiherye Yehova, naakhalihaka arokora ahu oosiveliwa mmukhalelo woosivela ni ncicimiho nenlo awo anaphwanelaaya.—Aro. 12:10.