Wi nimuhakalalihe Yehova nnaphwanela okhalano nroromelo. Mwawiihiiha, Piipiliya onnaloca wi “tahi wi oothene aakhalano nroromelo.” (2 Tes. 3:2) Murummwa Paulo aahiloca sa yaawo yaamwiikara, “achu oonanara murima ni ootakhala,” wa yaawo aachuneiye woopowa. Nyenya masu awe vooloca sa nroromelo annaphariheleya mwa ichu sincipale. Achu akina annathanla okhooca sawooniherya sookwakwaleya yawi ookhalavo Mpatuxa—Muluku. (Aro. 1: 20) Akina ananwerya oloca wi aakhalano nroromelo moorweela wa woona owerya wa vasuluxa. Nyenya yoororomela yeela mwa meekhaaya tahi yawaakhwanela wi nimuhakalalihe Yehova.

Nnaphwanela olekecheya wi Yehova ookhala nave onnaachuwela yaawo arino nroromelo noolipa. (Ahe. 11:6) Nroromelo ari makupa a yawiima ya munepa awe waweela. Ovekela wa Yehova onanwerya omukhaviherya muchu waakhela munepa waweela. (Luka 11:9, 10, 13) Yoohulela yookhweleya wi muchu aakhele munepa waweela ori waalakhanya Masu ooveereliwa a Muluku. Voocharela nnaphwanela wuupuwelela yeeyo naalakhannyaahu ni weererya opharihela yeeyo nihusenryaahu. Munepa waweela wa Yehova onanwerya ovolowela okumi ahu onikhaviheryaka okhalano nroromelo nenlo nnamuhakalaliha.