Mwiili Waphaama
Piipiliya tahi liivuru a oxipitale. Naamwi hiiha, owo onnavahererya miruku sinanikhaviherya okhalano ekumi yaphaama. Moone malakiheryo a Mpiipiliyani yaawo anawerya okhaviherya ekumi anyu.
MUKHAPELELE PHAAMA MWIILI ANYU
NLAKIHERYO NA MPIIPILIYANI: “Haavo muchu ontonko wiicanano mwiili awe, nto onnalyiha ni othokororya yoowo.”—Éfeso 5:29.
ELA ENATAPHULELA EHEENI: Nlakiheryo nla, ninnanceenyerya weera soothene nnaweryaahu wi nikhapelele ekumi ahu. Yoolokoha emoha yaahooniherya wi makacamiho mancipale a ekumi anarweela nthowa na soothanla sa muchu. Mwawiihiiha, opaka soothanla saphaama onnaruuha ekumi yaphaama.
TIHEENI MUNAPHWANELAANYU WEERA:
-
Malyelo. Muthokororyeke malyelo anyu moorweela wa olya yoolya yaphaama ni owurya maahi awaakhwanela.
-
Ovyakiha Mwiili. Ovyakiha mwiili anyu onanwerya orehererya ekumi anyu moohipwacha iyaakha sanyu, naari sookotakota ntoko ereca yoohilooleya. Naamwi oosiveliwa anyu naari asinthamwene ehaalaka wooceenyeryaani ovyakiha mwiili moohihiyererya, pahiru nyuwaano murino murici wa weerano yeeyo!
-
Mukoneke Mwawaakhwanela. Okona moopwahererya onnakumiherya ireca soohiyanahiyana. Opaka ichu sincipale tho ohiyu, onnaweeriha achu ancipale ohikona mwawaakhwanela. Mwawiihiiha, wakhala wi moothanla okona mwawaakhwanela, munahaala okhalano ekumi yaphaama.
MUSEPE SOOKHOVELELA SOONANARA
NLAKIHERYO NA MPIIPILIYANI: “Hankoni niivase wa soothanyeya soothene sa mwiili ni sa munepa.”—2 Korinto 7:1.
ELA ENATAPHULELA EHEENI: Nnahaala okhalano ekumi yaphaama wakhala wi ninnathanla ohipharihela soopahula mwiili, ntoko soona, naari mirece seiho isuweliwe wi sinnaruuha ireca naari wiipha.
TIHEENI MUNAPHWANELAANYU WEERA: Muthanle nihiku munayaanyu ohiya opharihela soopahula mwiili nave mweereno ntoko mulakelenlaanyu. Ovinyerya nihiku nenlo, murihe soothene munapharihelaanyu, muhiwaacameleke naari weecano yaale anamulya soona. Musepe mapuro yaawo anakhalawo achu anapharihela soopahula mwiili. Mwaaleele asinthamwene anyu wi munachuna omuhiya omulya soona wi yookhaviheryeeni weerano yeeyo.
MALAKIHERYO MAKINA A MPIIPILIYANI
Nyuwaano munanwerya omveka mmoha a Anamoona a Yehova wi ookhaviheryeeni okhalano Piipiliya mu elocelo anyu
OPAKA ICHU MOOKHAPELELEYA.
“Waatekaka empa yahihano, ekhala ya osulu, oshireke nipithela naya wi, muchu uuwela vathi, ohikhaleno nthowa weyo nari emusi aa.”—MALAMULO 22:8.
NVARERYELEKE ESARA ANYU.
“Muchu oopixa murima, toosuwelasha; nto ookhummwa murima oncicimiherya ololo awe.”—MASIPOSIPO 14:29.
MUSEPE OLYAXA.
“Ohikhaleke vamoha ni achu . . . ookhuurasha emece.”—MASIPOSIPO 23:20.
