Achu oowetha toororomeleya. Vaavaa munamvekaanyu muchu ori oowetha opaka echu vyakala, nyuwo munnasuwela wi owo onahaala weerano phaama nave mweelukuluku aya.

Naamwi arino mavyakelo ookotakota, mwaana onanwerya opacerya okhala oowetha naamwi ayemve. Liivuru Parenting Without Borders oriye: “Vaavaa anamwane anakhalaayano eyaakha emoha ni nyeeri miraru, awo anahaala opaka echu asitiithi aya anaarumaaya. Nave tho vaavaa anakhalaayano eyaakha emoha ni emeya, awo annachuna opaka echu vyakala asitiithi aya anaarumaaya. Mu sookhovelela sincipale, vaavaa anamwane anakhalaayano variyari va iyaakha thanu ni thanu napiili, alipa ooyara annapacerya waahusiha mukhalelo eneeraaya eweryeke okhaviherya miteko sa vaate. Naamwi eyemve, anamwane ari ookhwaanela opaka miteko mincipale.”

Mmapuro makina, amiravo ni asimwali anneererya omwareya vaate enakhala meekhaaya nto hanawerya, voocharela annachikela wa makholo aya. Ela yoheereya wa amiravo akina ni asimwali nthowa nawi makholo aya hatonko waahusiha mukhalelo wa opharihela ikhorowa mwa miruku, okhapelela vaate naari mukhalelo wa okhala oowetha mu okumi aya wa nihiku nnihiku.

Ni mathowa yaala, ti yaphaama waahusiha anamwane anyu mukhalelo wa okhala oowetha hiihaano wi yaakhaviherye osuwela echu ya opaka wakhala wi ahunnuwa. Liivuru Como Criar um Adulto oriye: “Nyuwo hamunachuna wi anamwane anyu ekhaleke ni nyuwo yakhalano iyaakha khumi nathanu nararu.”

Mwaakaweleke miteko.

NLAKIHERYO NA MPIIPILIYA: “Muteko woothene woowalamela tonaphuriha echu.”—Masiposipo 14:23.

Anamwane ilukuluku soothene annachuna waakhaviherya makholo aya wa echu vyakala anapakaaya. Nyuwo munnawerya ophuravo echu moorweela wa waavaha anamwane anyu miteko sa vaate.

Alipa ooyara akina analoca wi hanaavaha anamwane miteko sa vaate nthowa nawi anamwane aya annakhalano miteko mincipale oxikola.

Nto, anamwane anapaka miteko sa vaate anahaala okhumelela phaama oxikola nthowa nawi awo apacenrye  ohuserya opaka ni okwaaxa muteko owaani. Moone yeeyo liivuru Parenting Without Borders onaloceiye: “Wakhala wi hinnaweemererya anamwane ahu onikhaviherya vaavaa aryaaya akhaani, awo anampacerya wuupuwela wi waakhaviherya akina tahi echu yoochuneya . . . Awo tho anamuupuwela wi ichu inahaala wiimoona weereyaka wa yaawo.”

Ntoko elociwaaya, vaavaa anamwane anapakaaya miteko sa vaate moohihiyererya awo annahuserya mukhalelo wa waakhaviherya akina ohiya okhala anrima. Vaavaa anapakaaya miteko sa vaate, anamwane anahaala woonaka wi awo toochuneya veemusini ni wiiwexexa wi eyo echu anaphwanelaaya opaka.

Mwaakhaviherye anamwane anyu osuwela sookhumelela wa soohesa saya.

NLAKIHERYO NA MPIIPILIYA: “Owiriyane olopoliwa, weemererya olakiwa, wi okhale amiruku mahiku aa amuhoolo.”—Masiposipo 19:20.

Vaavaa anamwane anyu anahesaaya—ntoko yootakiherya wakhala wi mwaninyu amwaamulopwana naari amwaamuthiyana oopwesa echu ya muchu mukina—muhivithe yoohesa eyo. Mwaana onanwerya weemererya yoohesa awe—mmukhalelo yoowo, mveke nikhurumuwelo nave waweryeya mmukookiherye mwaneene.

Vaavaa anamwane aneemereryaaya soohesa saya awo anahaala okhaviheryeya . . . 

• okhala oororomeleya ni weemererya soohesa saya

• osepa waakhupanya akina

• osepa wiikuphelela

• oveka nikhurumuwelo