2 Akorintu 11:1-33
11 Miyaano kaahaala osiveliwa mwaakivilenle ohikhalano waka miruku vakhaani. Nto mweeparipari, munnakivilela!
2 Tiwi, kinnookhalelaani ehace, ehace yoolikana ni ya Muluku,* woona wi yoomi ene koowaakamelihaani ni mulopwana mmoha, ori Kristu, wi kooperekheeni wa yoowo ntoko asimwali aweela murima ahintonko okonihiwa.
3 Nto kinnoova wi hiiha ntoko enowa yaanwokaaya Eva mu ovyaka waya, muupuwelo anyu ohuwelihiwe woorakamelihakaani wa eparipari ni weela murima yoowo onamphwanela Kristu.
4 Tiwi, chiri wakhala wi oophiya muchu nave anamulaleerya Yesu oohiyana ni yoowo nimulalenryaahu, naari wakhala wi munaakhela munepa woohiyana ni yoowo mwaakhenlaanyu, naari michaka saphaama soohiyana ni seiho mweemerenryaanyu, nyuwo munnavilelano muchu yoowo mookhweya.
5 Miyo nkiniisoona okhala mukhaanixa mu echu vyakala moolikana ni arummwa anyu oocicimiheya.
6 Nyenya naamwi kihirino mavyakelo a oloca, chiryene kookhalano masuwelelo; mweeparipari, noowooniheryaani yeela mookwakwaleya mmikhalelo soothene ni mu ichu soothene.
7 Naari apwanne koopaka yoocheka wa nthowa na wiiyeviha wi nyuwo munnuwihiwe, koolaleeryakaani okhwela waphaama wa michaka saphaama sa Muluku mahaleene?
8 Miloko mikina kohiiyerya moorweela wa waakhela soovaha* saya wi koorumeeleeni nyuwo.
9 Nto vaavaa kaaryaaka ni nyuwo nave kaakhalaaka oothoiwa, nkaantonko okhala murici woohokola wa mmoha a nyuwo, woona wi anna yaarwiile o Maketoniya yaakikhaviherya mwawaacaxa mu soothene saakithowa. Aa, mu soothene katitelela wiikhapelela wi kihikhale murici woohokola wa nyuwo, nave kinahaala otitelela weerano yeela.
10 Chiryene ntoko eparipari ya Kristu eri mwa miyo, nkihiya oloca yeela mwawiirumiha mmapuro o Akaya.
11 Ni nthowa taani? Nthowa nawi nkinoosivelaani? Muluku oosuwela wi kinnoosivelaani.
12 Nyenya yeeyo kineeraaka, kinamutitelela weerano, wi kiviihevo mathowa a yaale anachuna wooniwaka ntoko hiyo mu ichu* seiho awo aniirumihaayano.
13 Woona wi alopwana si yaala ari arummwa oowoka, anamalapa awootha, awiiseera arummwa a Kristu.
14 Nave eyo tahi yootikhiniha, woona wi Satana mwaneene onniiseera* ntoko munkeelo a omwaleela.
15 Mwawiihiiha, tahi echu yootikhiniha wi anamuteko awe tho anniiseera* anamuteko awookololowa. Nto makuchuwelo aya eni ekhale mwawiiwanana ni miteko saya.
16 Kinnuuluula oloca: Ahikhale ani uupuwele wi kamuchu oohisuwela. Nto waakhanle wi ti hiihaa, mukeemererye ntoko muchu oohisuwela, wi miyo tho kiirumihe vakhaani.
17 Kinaloca vano, ohiya kicharihaka yootakiherya ya Apwiya, nyenya ntoko muchu oohisuwela, ni wiirumiha wa wiiroromela.
18 Woona wi ancipale anniirumiha mwawiiwanana ni mwiili,* miyo tho kinahaala wiirumiha.
19 Nyuwo muri “oosuwela,” moohakalala munnaavilela oohisuwela.
20 Mweeparipari, nyuwo munnamvilela yoole onaweeraani akapuro, yoole onoolyelaani sookhalano sanyu, yoole onakuxa yeeyo muryaanyuno, yoole oniisinnuwiha variyari vanyu, ni yoole onoomanaani wiithoni.
21 Onakhala munyemu wa hiyo oloca yeela, woona wi eni enakhala wi neenreno mooceecheya.
Nto wakhala wi akina anneerano ichu mwa wiirumiha, kinaloca ntoko muchu oohisuwela, mi tho kinneerano ichu mwa wiirumiha.
22 Apwanne awo Aheepiri? Miyaano tho. Apwanne awo Aisarayeli? Miyaano tho. Apwanne awo anamwane* a Aparahamu? Miyaano tho.
23 Apwanne awo anamuteko a Kristu? Kinnaakhula ntoko naanepa, miyo kiri awaapwaha yaawo: Koophara miteko mincipale, koowaleliwa ikwaha sincipale, koomaniwa ikwaha soohaalakhanyeya nave ikwaha sincipale kaahala vakhaani okhwa.
24 Ikwaha thanu kohaakhela wa Ayuta miripicho makhumi maxexe oviihavo mmoha,
25 ikwaha raru koomaniwa ni ikopo, ekwaha emoha koovonyiwa maluku, ikwaha raru koomiryiwa ni maahi pophoro anyaanyen’ye, ohiyu omoha ni othana omoha kaavirinhe kiri mphareya.
26 Koheeca mikwaha mincipale: Sawoopiha mmihiceni, sawoopiha sa ampava, sawoopiha sa achu a nloko naka, sawoopiha sa maloko, sawoopiha mpooma, sawoopiha mutakhwani, sawoopiha mphareya, sawoopiha variyari va anna oowoka.
27 Kaanalapa mwakuru ni otothowa, ohiyu wawaaca kihikonne, kivoliwaka etala ni nthanana, wiiliwiili kihirino yoolya, kiriiryiwaka nave kihirino echu yoowara.*
28 Opwaha ichu soothene iha sawooneya, yookhala echu enakiipiha murima* nihiku nnihiku: Wuukhuwa ntakhara miloko soothene.
29 Taani ori ooceecheya nave miyo kihikhala ooceecheya? Taani okwaculiwe, nave miyo kihikhala oonyeenyeya?
30 Wakhala wi kinnaphwanela wiirumiha, kinahaala wiirumiha mu ichu seiho inooniherya oceecheya waka.
31 Muluku, ni Tiithi a Apwiya ahu Yesu Kristu, yoowo onaphwanela ocicimihiwa okhala wookhala, oosuwela wi nkinamootha.
32 O Tamasku, mulamuleli aathanliwe ni mwene Areta aahaakuha alipeleli mu epooma ya achu o Tamasku wi kiphariwe,
33 nyenya kaakuruxeliwa vathi kiheliwe mmucankani,* kivirihiwa vaxanelani yaari vaxiri ya epooma, nave kikophola mmatani mwawe.
Inoota
^ Mu Ekriki, “mvai wa Muluku.”
^ Naari: “sookhaviherya.”
^ Naari: “wooniwaka mmirici.”
^ aari: “onniitatuxa.”
^ Naari: “anniitatuxa.”
^ Ela tiwi, mathowa oomuchu.
^ Naari: “muyareriwo.” Mu Ekriki, “mmiso.”
^ Mu Ekriki, “nave kiri eepwitikiri ene.”
^ Naari: “enakinyaparerya.”
^ Naari: “vanikhankalani.”
