2 Akorintu 5:1-21
5 Tiwi, hiyaano noosuwela wi wakhala wi empa ahu ya veelaponi yavathi, mmuxakala yoola, yoomwaryiwa,* Muluku onahaala onivaha empa yoohimala wirimu yeeyo ehitekiwe ni matata a achu.
2 Woona wi chiryene ninnuupulela mu empa yeela, ninlelaka moochunaxa owara yeeyo eri yawihu* wirimu,*
3 mwawiihiiha, nawara yeeyo hiniphwanyiwa nri epwitikiri ene.
4 Mweeparipari, yeehu nnakhala mmuxakala yoola, ninnuupulela vaavaa nnahooxiwaahu, woona wi hinnachuna orula yeela, nyenya nnachuna owara ekina, wi yeeyo enakhwa emiryiwe ni okumi.
5 Vano yoowo onireheryenle yeela ti Muluku, yoowo onivanhe munepa ntoko mweemeseryo wa yeeyo enoorwa.*
6 Mwawiihiiha, mahiku oothene ninnaroromela nave noosuwela wi vaavaa nikhanlaahuno empa ahu mwa mwiili, nri ocai wa Apwiya,
7 tiwi nneeca moorweela wa nroromelo, ohiya moorweela wa ichu sawooneya.
8 Nyenya ninnaroromela nave noolakelela okhala ocai wa mwiili nave noopaka empa ahu vamoha ni Apwiya.
9 Mwawiihiiha, moohipwacha naamanke ni yoowo, naari nri ocai wa yoowo, nookhalano yoolakelela ya omuhakalaliha yoowo.
10 Vawi oothene hiyo nnarwa niphwanyeya* va nipuro noothoriha na Kristu, wi mmoha ti mmoha aakhele nlivelo mwawiiwanana ni ichu opankeiye ari mmwiilini, moohipwacha saari saphaama naari soonanara.*
11 Mwawiihiiha, woona wi noosuwela echu enataphulela owoova Apwiya, ninnatitelela waaleeliha* achu, nyenya noosuweliwa* phaama ni Muluku. Nto, kinnaweherya wi nyuwo moosuweliwa* tho phaama wa nthowa na yawuupuxerya-ya-murima anyu.
12 Tahi wi nnamwiiseemererya wanaawiili wa nyuwo, nto nnamooceenyeryaani wi mwiirumiheke wa nthowa na hiyo, wi nweryeke owaakhula yaawo aniirumiha mu sawooneya, ohiya wa yeeyo eri mmurimani.
13 Tiwi, waakhanle wi naanaanepa, eyo yaari ntakhara Muluku; waakhanle wi ninniisuwela, eyo eri ntakhara nyuwo.
14 Tiwi osivela wa Kristu onnanicucha* murima, woona wi ninnaphiyerya makuchuwelo ala: Mulopwana mmoha ookhwa ntakhara achu oothene; mweeparipari oothene yaakhwa.
15 Nave owo ookhwa ntakhara achu oothene wi yaale ari akumi ehikhale tho akumi wa yaawo aneene, nto wa yoowo aakhwenle nave aviihiwa mookhwani.
16 Mwawiihiiha, ovinyerya hiihaano oya muhoolo hinimusuwenle muchu mmoonelo woomwiilini. Naamwi khalai naamusuwenle Kristu mwawiiwanana ni mwiili, chiryene hinimusuwenle tho mmukhalelo yoola.
17 Mwawiihiiha, wakhala wi muchu ori mwawiiwanana ni Kristu, owo yoopatuxiwa evyaani; ichu sakhalai soovira. Onani! Ichu ivyaani sookhala.
18 Nyenya ichu soothene inarwa wa Muluku, yoowo onaataanyinhe wa yoowo mwaneene moorweela wa Kristu nave onivanhe muteko wa waataaniha,
19 ela tiwi, Muluku moorweela wa Kristu iisaataanyihe ni elapo wa yoowo mwaneene, ahaalakhanyeryaka soohesa saya; nave owo ooninnyererya muchaka wa waataaniha.
20 Mwawiihiiha, hiyo nri arummwa a Omwene oomuraceela Kristu, ntoko wi Muluku tonaloca moorweela wa hiyo. Ntoko araceeli a Kristu, ninnaveka: “Mwaataanyihiwe ni Muluku.”
21 Yoole ohisuwenle yoocheka, tokhanle yoocheka* wa hiyo, wi moorweela wa yoowo hiyaano nikhale wookololowa wa Muluku.
Inoota
^ Naari: “yookurumuliwa.”
^ Naari: “ninlelaka owara empa ahu eri.”
^ Naari: “empa ahu eri wirimu.”
^ Naari: “nlivelo (ikhorowa); yoororomeliha ya yeeyo enoorwa.”
^ Naari: “nnarwa nooneihiwa.”
^ Naari: “soothanyeya.”
^ Naari: “waalekecha.”
^ Naari: “nohooneihiwa.”
^ Naari: “mohoneihiwa.”
^ Naari: “onnanikuxa; onnanilya.”
^ Naari: “yoovaha ntakhara yoocheka.”
