2 Petru 1:1-21
1 Miyaano Simoni Petru, kapuro ni murummwa a Yesu Kristu, wa yaale aphwannye nroromelo nasisapo ntoko nawihu* moorweela wa wookolola wa Muluku ahu ni mvuluxa Yesu Kristu:
2 Mahala matokweene ni murecele saaceereryeye wa nyuwo moorweela wa masuwelelo awaakhwanela a Muluku ni a Yesu Apwiya ahu,
3 woona wi owerya wawe woomuluku woonivaha* ichu soothene inanikhaviherya okhala nimucicimihaka Muluku moorweela wa masuwelelo awaakhwanela a Yoole oniichanne mu ncicimiho nawe ni makhalelo aphaama.
4 Moorweela wa ichu seiha, owo oonivaha* soororomeliha sasisapo ni itokotokoxa, wi moorweela wa seiha, nyuwaano muukeno makhalelo oomuluku, mooponwe mu wuuca wa elapo onatannyiwa moorweela wa soochuna* soonanara.
5 Wa nthowa nenla, mpake wiilipixerya woothene wi mwaaceererye nroromelo nanyu mwa makhalelo aphaama; makhalelo anyu aphaama, wa masuwelelo;
6 wa masuwelelo anyu, wiihiiha; wiihiiha wanyu, ovilela; ovilela wanyu, omulapa Muluku;
7 omulapa wanyu Muluku, osivela woonna; osivela wanyu woonna, waasivela oothene.
8 Woona wi ichu seiha sakhala mwa nyuwo nave saaca, inanweerihaani ohikhala achu ooceecheya omunepani naari oohivaha sawiima* vooloca sa masuwelelo awaakhwanela a Apwiya ahu Yesu Kristu.
9 Woona wi yoole ohirino ichu seiha teevaasi, onnawala miitho awe wa omwaleela,* nave oocuwala weelihiwa wa soocheka sawe sakhalai.
10 Mwawiihiiha anna, mukhale amvaixa mu okhapelela wiichaniwa wanyu ni othanliwa, woona wi mwatitelela weerano ichu seiha, nyuwo hamurwa muhesa.
11 Mweeparipari, mmukhalelo yoola nyuwo munarwa mvahiwa ovolowa woocicimiheya* mu Omwene woohimala wa Apwiya ahu ni Mvuluxa Yesu Kristu.
12 Wa nthowa nenla, kinnachuna mahiku oothene owuupuxeryaani ichu seiha, naamwi nyuwaano musuwenle nave muri ootikitheryeya phaama mu eparipari eri mwa nyuwo.
13 Nlelo kiryaaka mmuxakalani* yoola, kihoona okhala yoophwanelela wooviihaani moorweela wa sawuupuxerya,
14 kisuwelaka wi moohilekela muxakala aka onahaala oviihiwavo, hiiha ntoko Apwiya ahu Yesu Kristu akileenlaaya mookwakwaleya.
15 Mahiku oothene kinahaala wiilipiseryaka wi kimanle ocimula, nyuwo aneene muweryeke wuupuwelela* ichu seiha.
16 Hooye, hiwaari wa nthowa na ochara miyaha satheru inarwa wa achu, noosuwelinhaahuuni owerya ni orwa wa Apwiya ahu Yesu Kristu; nto moohiyana, hiyo noheerela onamoona wa ncicimiho nawe.*
17 Woona wi owo ohaakhela ncicimiho ni ovuwa orweela wa Muluku, Atiithi, vaavaa masu ntoko yaala yaalociwaaya wa yoowo moorweela wa ovuwa wa ncicimiho: “Ola ti Mwanaka, oosiveliwa aka, yoowo* miyo mwaneene kinamweemereryaaka.”
18 Aa, naahiiwa masu yaala erwaaka wirimu vaavaa naaryaahu vamoha ni yoowo o mwaako waweela.
19 Mwawiihiiha, nookhalano masu a miririmu oororomeleyaxa, nave nyuwaano munneerano phaama othokororya yaala, ntoko omwaleela onaarya mmapuro eepiiphi (ophiyerya oxilevo nave evinnye etheneeri ya wooxiixelo*) mmurimani mwanyu.
20 Tiwi, opwaha soothene, nyuwaano moosuwela wi haavo masu a miririmu a mu Soorempwa anarweela mmiruku sa achu.
21 Woona wi masu a miririmu hantonko orwa mu okhwela wa muchu, nto achu alonce masu oorweela wa Muluku, ehooleliwaka* ni munepa waweela.
Inoota
^ aari: “nroromelo nenlo nnooniwa okhala ekari ntoko nawihu.”
^ Naari: “woonivaha mahaleene.”
^ Naari: “oonivaha mahaleene.”
^ Naari: “minkhela.”
^ Naari: “oohiphuriha echu.”
^ Naari akhweya: “onoona pahiru yeeyo eri vakhiviru.”
^ Naari: “onarwa waaceereryiwa mwawaaca ovolowa wanyu.”
^ Naari: “mu tapernakulu,” ela tiwi, mmwiili awe wa veelaponi.
^ Naari: “olocaka.”
^ Naari: “ovuwa wawe; otokweene awe.”
^ Mu Ekriki, “nsu ntoko nenla naalociwaaya wa yoowo.”
^ Naari: “nave nivinye nivoroxo.”
^ Mu Ekriki, “eceenyeriwaka; yuupuwelihiwaka.”
