Aefesu 1:1-23
1 Miyaano Paulo, murummwa a Kristu Yesu moorweela wa okhwela wa Muluku, wa aweela murima ari o Efesu nave ari oororomeleya mwawiiwanana ni Kristu Yesu:
2 Mahala matokweene ni murecele wa Muluku, Atiithi ahu, vamoha ni a Apwiya Yesu Kristu ekhale ni nyuwaano.
3 Acicimihiwe Muluku ni Tiithi a Apwiya ahu Yesu Kristu, woona wi oonireeliha ni mareeliho oothene oomunepani oorweela wiirimurimu mwawiiwanana ni Kristu.
4 Owo oonithanla wi nikhale mwawiiwanana ni yoowo* ehaakumve opatuxiwa elapo, wi neeriwe aweela murima ni oohikhalano nthepa* vamiithoni vawe mu osivela.
5 Tiwi, owo aalakelela khalai wi neeriwe anamwane awe moorweela wa Yesu Kristu, mwawiiwanana ni yoochuna awe ni yookhwela awe,
6 wi achu emucicimihe Muluku woona wi owo oompharihela Mwanawe oosiveliwa wi ooniherye mahala awe matokweene wa hiyo.
7 Mwa yoowo nookhalano otaphuliwa ni woopola moorweela wa nikhami nawe, aa, oleveleliwa wa soohesa sahu, mwawiiwanana ni waaca wa mahala awe matokweene.
8 Mahala yaala matokweene, owo oonivaha mwawaacaxa mwa miruku soothene ni wiiwexexa*
9 moorweela wa onisuweliha yoovitheya yaweela ya okhwela wawe. Mwawiiwanana ni ochuna wawe, owo aalakelela mwaneene
10 wi atikitherye ohoolela* vaavaa seeraaya saakhwanele ilukuluku saalakeleliwe, wi athukumanyerye mwa Kristu ichu soothene, ichu sa wirimu ni ichu sa veelaponi yavathi. Aa, mwa yoowo
11 nikhanlaahu vamoha mwawiiwanana nave neeriwaahu mikelampa, amanle olakelela khalai mwawiiwanana ni yookhwela ya yoole oneerano ichu soothene, ntoko owo aalakelenleiye mwawiiwanana ni yookhwela awe,
12 wi yeehu ene nipacenrye omuwehererya Kristu, nrumeele ntakhara ovuwa wa ncicimiho nawe.
13 Nto nyuwo tho mwaanamuwehererya yoowo mmanle wiiwa masu a eparipari, michaka saphaama vooloca sa ovuluxiwa wanyu. Mmanle weemererya, Muluku ooweeyeryaani eseelu* moorweela wa yoowo ni munepa waweela waaroromelihiwe,
14 yoowo ori mweemexeryo wa* yoohiyeryiwa ahu ni yoolakelela ya waataphula achu awe moorweela wa woopola, ntakhara ncicimiho na ovuwa wawe.
15 Ti nthowa nene miyo tho, ovinyerya vaavaa kiiwalaaka sa nroromelo muryaanyuno mwa Apwiya Yesu ni osivela munooniheryaanyu wa aweela murima oothene,
16 nkimaanle othamalela ntakhara nyuwo. Kinnatitelela wooromolaani nyuwo mmavekelo aka,
17 wi Muluku a Apwiya ahu Yesu Kristu, Tiithi a ncicimiho, oovaheeni munepa wa miruku ni wa wuupulula sa masuwelelo awaakhwanela vooloca sa yoowo.
18 Owo oomwaleela miitho a murima anyu, wi nyuwaano musuwele ewehereryo taani owo owiichanenleiyeeni, muhakhu taani woocicimiheya owo okunheiye ntoko yoohiyeryiwa wa aweela murima,
19 ni mukhalelo oryaaya wootikhiniha owerya wawe otokweene mwa hiyo, alipa oororomela. Otokweene owo onnooniheryiwa mu owerya wawe wakuru,
20 yoowo owo aapharihenleiye mwa Yesu vaavaa aamviihaleiye mwa alipa ookhwa, nave amukiraathiha omoono awe woolopwana wiirimurimu,
21 osuluxa opwaha omwene woothene, olamulelo, owerya, otokweene nave opwaha masina oothene anaromoliwa, ohiya pahiru mmukhalelo yoola wa ichu* nyenya tho yoowo onoorwa.
22 Owo tho oomvahererya ichu soothene vathi va inaani sawe nave amweera muru wa ichu soothene vooloca sa muloko,
23 yoowo ori mwiili awe, onaakhwaniha mwa yoowo onasareiha soothene mwa ichu soothene.
Inoota
^ Ela tiwi, ni Kristu.
^ Naari: “nipapa.”
^ Naari: “osuwela.”
^ Naari: “ohoolela ichu.”
^ Naari: “nyuwaano moheeyeryiwa eseelu.”
^ Naari: “eneneeryo ya.”
^ Naari: “elukuluku yeela.” Moone Masu Atharihiwe.
