Akolose 4:1-18
4 Nyuwo asaapwiya, mwaakhaliheke anamuteko anyu mwawookololowa ni moophwanelela, musuwelaka wi nyuwo tho mookhalano Pwiya wirimu.
2 Mutitelele mmavekelo, nave mweerakano yeela, mwiiweheryeke ni ovaha mathamalelo.
3 Mu elukuluku emohamoha, munivekeleleke tho hiyo, wi Muluku ahule mulako ntakhara masu wi niwerye olaleya yawiiphiini yaweela vooloca sa Kristu, wa yeeyo miyo kiphariwaaka,*
4 nave wi miyo kilaleye eyo mookwakwaleya ntoko kinaphwanelaaka.
5 Mutitelele weeca mwa miruku vamiithoni va achu a vaate, mpharihelaka phaama elukuluku anyu.*
6 Ilukuluku soothene masu anyu ekhaleke oosiva, aweeleeliwa ni maakha, wi nyuwo musuweleke mukhalelo wa omwaakhula muchu ti muchu.
7 Tikiku, munnaka oosiveliwa, namuteko oororomeleya ni kapuro mukhwaaka mwa Apwiya, onahaala wooleelaani michaka soothene vooloca sa miyo.
8 Kinnoorumihelaani yoowo wi nyuwo musuwele sa mukhalelo ahu nave wi ahakararye mirima sanyu.
9 Owo onarwa vamoha ni Onesimu, oororomeleya aka ni munna oosiveliwa, yoowo ori mmoha a nyuwo; awo anahaala wooleelaani ichu soothene ineereya wenno.
10 Aristarku, mukhwaaka a mukariposo, onnoovonyeryaani mooni awe, nave tho Marku, pirimu a Parnape (vooloca sa Marku, mohaakhela sooleeliherya wi mmwaakhele phaama arwa wooxekuryaani),
11 ni Yesu yoowo oniichaniwa Yustu. Ala ta nikhuuru na oothikiliwa. Pahiru yaala tari anamuteko akhwaaka ntakhara Omwene wa Muluku, nave awo tari ehime ya nihakararyo* ntokweene wa miyo.
12 Epafra, kapuro a Yesu Kristu, yoowo ori mmoha a nyuwo, onnoovonyeryaani mooni awe. Ilukuluku soothene owo onnavekela ntakhara nyuwo, wi vookuchulani mukhale awaakhwanela ni ootikitheryeya mu okhwela woothene wa Muluku.
13 Miyaano kinnamweerela onamoona wi owo onnalapa mwakuru ntakhara nyuwo, ntakhara yaale o Lawotikeya ni o Hiyerapoli.
14 Luka, meetiku* ahu, oosiveliwa, onnoovonyeryaani mooni awe, nave tho Tema.
15 Mveleele mooni aka wa anna o Lawotikeya, wa murokora Ninfa vamoha ni muloko onathukumana vaate vawe.
16 Nave vaavaa ekaarata ela eneeraaya yaalakhanyiwe variyari vanyu, mpake marehereryo wi yaalakhanyiwe tho mmuloko wo Lawotikeya, nave nyuwo tho mwaalakhanye ekaarata kirumihenlaaka o Lawotikeya.
17 Nave tho, mmuleele Arikipu: “Othokororyeke phaama muteko yoowo waakhenlaawe wa Apwiya, wi okhwaaniherye.”
18 Miyo Paulo, kinnoorepelaani mooni aka. Mutitelele wuupuwela sa ophariwa waka.* Mahala matokweene ekhale ni nyuwo.
Inoota
^ Naari: “kimakiwaaka ni mithipo.”
^ Mu Ekriki, “muthumaka elukuluku yoolakeleliwa.”
^ Naari: “nikhaviheryo noolipa.”
^ Naari: “mulipa a murece.”
^ Naari: “omakiwa waka ni mithipo.”
