Luka 11:1-54
11 Ekwaha emoha, Yesu aari nipuro nikina avekelaka nave aamalinheiye, mmoha a oohuserya awe, aalocano ariki: “Pwiya, munihusihe mukhalelo wa ovekela, hiiha ntoko Yohani aahusinheiye oohuserya awe.”
2 Mwawiihiiha, owo aahi: “Mwaavekelaka, mweereke ha: ‘Tiithi, nsina nanyu neelihiwe.* Omwene anyu orwe.
3 Munivahe yoolya ahu ya nihiku, mwawiiwanana ni soothowa sahu sa nihiku nnihiku.
4 Mukhurumuwele soocheka sahu, woona wi hiyo tho ninnaakhurumuwela yaale arino evaale ni hiyaano; nave muhinihiye mu weehiwani.’”
5 Voocharela, owo aahi wa yaawo: “Nloce wi mmoha a nyuwo ookhalano nthamwene, nave onnaya wa yoowo ohiyu eriyari, alocano ariki: ‘Nthamwene, okipoleye ipaau raru,
6 tiwi nthamwene aka yoowo aari vamukwahani, oophiya nave nkaano echu ya omvaha.’
7 Nto owo onnaakhula ari mpa ii: ‘Ohikuukhule. Nsele koowala, miyo ni anamwane aka nookona. Nkinawerya ovinya wi koovahe echu.’
8 Kinnooleelaani wi owo onahaala ovinya wi amvahe soothene onachuneiye, ohiya nthowa na okhala nthamwene awe, nyenya nthowa na otitelela wawe.
9 Mwawiihiiha, kinnooleelaani: Titelelani oveka, nave munarwa mvahiwa; titelelani waavya, nave munarwa mphwanya; titelelani omana nsele, nave munarwa muhuleliwa.
10 Tiwi yoole onaveka onnaakhela, yoole onaavya onnaphwanya, nave yoole onamana nsele, onamuhuleliwa.
11 Vano, tiithi taani mwa nyuwo, wakhala wi mwanawe oomveka ehopa, oni amvahe enowa ohiya ehopa?
12 Naari, wakhala wi ovenke nooce, oni amvahe walisi?*
13 Mwawiihiiha, naamwi nyuwo muri oonanara murima, munasuwela waavaha aniinyu ichu saphaama, apwanne Atiithi anyu a wirimu, hiyaavaha munepa waweela yaale anaaveka?”
14 Voocharela, owo aahiikara nsololo noohiloca. Nsololo nimanle okhumamo, mulopwana oohiloca, aapacerya oloca nave muloko* wa achu waatikhiniheya.
15 Nto mmoha a yaawo aaloca: “Ola oniikara masololo moorweela wa Pelsepu,* mutokweene a masololo.”
16 Nave akina, echunaka omweeha, yaapacerya oomveka eneneeryo ya wirimu.
17 Asuwelaka muupuwelo aya, Yesu aahi wa yaawo: “Omwene woothene oniikawanya mukhataaya onnathatuwa milepe, nave echoko eniikawanya mukhataaya ennamwareya.
18 Moolikana, wakhala wi Satana onniikawanya tho mukhateiye, vano omwene awe oni wiithipele hai? Tiwi nyuwaano munaloca wi kiniikara masololo moorweela wa Pelsepu.
19 Wakhala wi kiniikara masololo moorweela wa Pelsepu, vano anamwane anyu aniikara masololo ni ikuru sawani? Ti nthowa nene awo anahaalaaya woothorihaani.
20 Nyenya, waakhanle wi kiniikara masololo moorweela wa ekatha ya* Muluku, chiryene Omwene wa Muluku wohoophwanyaani.
21 Wakhala wi muchu awuupa, iireherenrye ni mavaka awe, onnawehererya empa awe, muhakhu awe honatannyiwa.
22 Nyenya, vaavaa muchu mukina akuru ompwaha owo onarweiye, amuroxa ni omvootha, muchu yoola onnamwaakha mavaka awe oothene aaroromeleiye, nave onnakawa muhakhu omwaankheiye.
23 Yoowo ohiri mmakupa aka, mwiicani aka, nave yoowo ohinathukumanya ni miyo, onammwaramwaxa.
24 “Munepa woonanara wakhuma mwa muchu, onneeceeca elapo yawuuma waavyaka nipuro nawiichuuwavo, nto waahiphwanya, onnaloca: ‘Kinamukookela empa aka yeeyo kithaammaakawo.’
25 Nave waphiya, onaphwanya empa eveliwe ni ereheryiwe.
26 Voocharela onnaya owopa minepa mikina mithanu napiili soonanaraxa opwaha yoowo, simanle ovolowa sinnakhala mummo. Hiihaa, makuchuwelo a muchu owo annatepa onanara opwaha woopaceryani.”
27 Yesu alocaka ichu seiha, muthiyana mmoha aari veeri va muloko wa achu, aalocano moovuwa ariki: “Oohakalala muthiyana yoowo ookhapelenle mmirimani mwawe ni owaamwinhe!”
28 Nto Yesu aahaakhula: “Hooye, ohiya yeeyo, oohakalala ti yaale aniiwa masu a Muluku nave enachariha!”
29 Vaavaa muloko wa achu waathukumanaaya vamoha, Yesu aapacerya oloca ariki: “Muyareriwo ola, ori muyareriwo woonanara; owo onnaavya eneneeryo, nyenya hevahiwa eneneeryo emoharu mano, voohikhala yeele ya Yona.
30 Hiihaa ntoko Yona aareiye eneneeryo wa achu o Ninevi, Mwaana a muchu tho onamukhala eneneeryo wa muyareriwo yoola.
31 Nihiku na othoriha, mwene amwaamuthiyana a weiwo onakhumawo echeku ya murupi, onamvinya wi aweerele onamoona achu a muyareriwo yoola ni waasomela, vawi aakhuma weiwo elapo ekotenlaayawo wi awiriyane miruku sa Solomoni. Nto vaava, ookhalavo mutokweene ompwaha Solomoni.
32 Nihiku na othoriha, achu o Ninevi anamvinya wi yeerele onamoona sa muyareriwo yoola ni waasomela, vawi awo yaacharuwa nthowa na olaleerya wa Yona. Nto vaava, ookhalavo mutokweene ompwaha Yona.
33 Muchu apariha epanthi, hanakuha vanipuro nawiipitheya naari okhuneela ni mucanka,* nyenya onakuha vanipuroni nawooneya wi yaale anavolowa yooneke ekamaama.
34 Niitho, onyaari wa mwiili. Niitho naa nakhala nawaarya,* mwiili aa woothene onamwaaryaka* tho, nyenya niitho naa nakhala na nrima,* mwiili aa onamukhala tho epiiphi.
35 Mwawiihiiha, wiivareryeleke wi omwaleela ori mwa weyo, ohikhale tho epiiphi.
36 Hiihaa, wakhala wi mwiili aa woothene onnamwaleela, ohaakanyeren’ye ni epiiphi, woothene oni okhale wawaarya ntoko muthiko onoomwaleela.”
37 Amanle oloca ichu seiha, Mfarisi mmoha aanwopa Yesu wi alyeno vamoha. Mwawiihiiha, owo aavolowa, ahaamela meesa.
38 Nto Mfarisi yoole aatikhina onneiye wi Yesu aapacerya olya ahinyanwe.*
39 Nto Apwiya yaaloca ni yoowo eriki: “Nyuwo Afarisi, munamurapiha koopho ni eparatho vaateru, nyenya mpuwa mwanyu osaren’ yemo oluluwa ni sootakhala.
40 Akhamiruku nyu! Apwanne hamunasuwela wi yoole opanke makupa a vaate, ti yoowo tho opanke mpuwa mwaya?
41 Nto vahani samahala sa ikharari* orweela mmurimani mwanyu. Wakhala wi moheerano yeela munarwa mukhala ooreerihiwa mwawaakhwanela.
42 Nyenya ootakhaliwa ti nyuwo Afarisi, ntakhara munavaha yaneekhumi ya mmacani ntoko hortela, aruuta* ni makukhu makina a wunkhela, nto hamunapwacha ekhaikhai ni osivela wa Muluku! Ti seiha mwaaphwanelaanyu weeraka, muhihin’ye ichu ikina.
43 Ootakhaliwa ti nyuwo Afarisi, ntakhara wi munnasiveliwa okiraathi mmipaco soopacerya* mu nipuro na malapelo,* ni oloceliwa mmapuro awaaciwamo!
44 Ootakhaliwa ti nyuwo, woona wi muri ntoko mahiye* ahinooneya,* yaawo achu ananyikalaaya ehisuwelaka!”
45 Mmoha aalipa oohusiha Malamulo aamwaakhula Yesu ariki: “Muhusiha, mwaalocaka ichu seiha, munnanruwana tho hiyo.”
46 Voocharela owo aahaakhula: “Ootakhaliwa tho ti nyuwo alipa oohusiha Malamulo, woona wi munnawiireiha achu maphuta oolimela, nto nyuwo hamunaphara naari mano otannya ni ekatha emoha!
47 “Ootakhaliwa ti nyuwo, ntakhara munnateka mahiye* aalipa miririmu yaawo makholo anyu awiiphalaaya!
48 Chiryene, mwa anamoona a ichu soothene makholo anyu apankaaya, nave munnaakhulela miteko saya, woona wi awo aawiipha alipa a miririmu, nto nyuwo munateka mahiye aya.
49 Ti nthowa nene miruku sa Muluku inalocaaya iriki: ‘Kinamwaarumihela alipa a miririmu ni arummwa, nave awo ananwiipha ni owiikara akina a yaawo,’
50 wi muyareriwo yoola okhaleno nthowa na nikhami na alipa a miririmu nenlo niyeehiwe ovinyerya opatuxiwa wa elapo,
51 ovinyerya nikhami na Apele, ophiyerya nikhami na Sakariya, yoowo iiphiwe veeri va altari ni empa ya Muluku. Aa, kinnooleelaani wi muyareriwo ola onamukhalano nthowa na nikhami naya.
52 “Ootakhaliwa ti nyuwo alipa oohusiha Malamulo, woona wi mookuxa exaavi ya masuwelelo. Nyeenyu ene hamunavolowamo, nave munneererya waahiiha yaale anachuna ovolowamo!”
53 Mwawiihiiha, vaavaa Yesu aakhumeiye vaavale, alipa oorepa ni Afarisi yaapacerya omvaanyiha vancipale ni ompakela makoho oohiyanahiyana,
54 yaanamureya miraakho wi emphare mwa echu aahaaleiye oloca.
Inoota
^ Naari: “weeriwa naweela; okhalihiwa mwaweela.”
^ Naari: “wenye.”
^ Naari: “mucici.”
^ Nsina nla oniichaneliwa Satana.
^ Naari: “ikuru sa.”
^ Naari: “mucanka woophimano.”
^ Mu Ekriki, “noonanara; nootakhala.”
^ Naari: “onamusareya omwaleela.”
^ Naari: “naphaama.” Mu Ekriki, “niitho na omoha.”
^ Afarisi ni Ayuta akina yaanyawa echarihaka mihapo saya sa wiiseeliha.
^ Naari: “mwaavahe oohaawa.” Moone Masu Atharihiwe.
^ Hortela ni aruuta, ichu inaphariheliwa wi sinkheliheke yoolya.
^ Naari: “mapuro oocicimiheya.”
^ Mu Ekriki, “mu sinakooka.”
^ Naari: “mahiye anuupuweliwa.”
^ Naari: “yaale ahiheliwe eneneeryo.”
^ Naari: “mahiye anuupuweliwa.”
