Luka 16:1-31
16 Voocharela, Yesu aaloca tho wa ohuserya awe ariki: “Mulopwana mmoha ooreela aakhalano namuteko* awe. Namuteko ola, aalokohiwa wi onnamaliha muhakhu wa pwiyawe.
2 Mwawiihiiha, owo aamwiichana alocano: ‘Tiheeni yeela kiniiwaaka vooloca sa weyo? Okileele vooloca sa muteko aa, woona wi honaphwanela otitelela okhala namuteko aka.’
3 Namuteko yoole aahuupuwela ariki: ‘Vano keere xeeni, woona wi pwiyaka onamukiikara muteko? Olima nkinawerya, oveka onnakuuliha muru.
4 Eyaa! Koosuwela echu kinaphwanelaaka weera, wi kiikariwa muteko achu ekaakhele mmavaate mwaya.’
5 Nave aamwiichana mmoha ti mmoha a yaale yaarino evaale ni pwiyawe, aloca ni oopacerya ariki: ‘Waamusiyanre kavi pwiyaka?’
6 Owo aahaakhula: ‘Miphimo* nsana sa makhurwa.’ Namuteko aahi: ‘Okuxe ekaarata yeele, okiraathi nave orepevo mwawaakuveya, makhumi mathanu.’
7 Voocharela, owo aamukoha mukina: ‘Vano weyaano, waamusiyanre kavi pwiyaka?’ Owo aahaakhula: ‘Miphimo* mitokweene sa tiriku sawaakhwana nsana.’ Owo aahi wa yoowo: ‘Okuxe ekaarata yeele nave orepevo, makhumi mathanu namararu.*
8 Nave Pwiya aamuthamalela namuteko awe naamwi aari oohiroromeleya, woona wi aahooniherya miruku soophara muteko.* Tiwi anamwane a mukhalelo yoola wa ichu* annooniherya miruku soophara muteko mmukhalelo anakhalihaaya muyareriwo aya, waapwaha anamwane a omwaleela.
9 “Kinnooleelaani tho: Mwaapake asinthamwene moorweela wa muhakhu woohookololowa, wi wamala, awo ewaakheleeni mu ipa soohimala.
10 Muchu yoowo ori oororomeleya mu ichu ikhaani, toororomeleya tho mu ichu itokotoko, nave yoowo ori oohookololowa mu ichu ikhaani, toohookololowa tho mu ichu itokotoko.
11 Mwawiihiiha, wakhala wi himoonihenrye okhala oororomeleya ni muhakhu woohookololowa, taani oni oororomeleeni ni muhakhu weeparipari?
12 Nave tho wakhala wi himoonihenrye okhala oororomeleya ni ichu sa muchu mukina, taani oni oovaheeni yeeyo eni ekhale yawinyu?
13 Haavo kapuro onawerya waalapa asipwiya eeli, vawi onammwiica mmoha ni omusivela mukina, naari onammucicimiha mmoha ni omuthanya mukina. Nyuwo hamunawerya okhala akapuro a Muluku ni a Muhakhu.”
14 Afarisi, yaawo yaasiveliwa ni ikhorowa, yaanawiriyana ichu soothene seiha, nave epacerya omuroha.
15 Mwawiihiiha, Yesu aahi wa yaawo: “Nyuwaano munniiseera okhala eekhaikhai vamiithoni va achu, nyenya Muluku onnasuwela murima anyu. Ntakhara yeeyo eri yoocicimiheya vamiithoni va achu, ti yoothanyeya vamiithoni va Muluku.
16 “Malamulo ni Alipa a Miririmu aalaleeryiwa ophiyerya wa Yohani. Ovinyerya elukuluku yeeyo, michaka saphaama sa Omwene wa Muluku sinnalaleeryiwa, nave achu a mukhalelo woothene anniilipixerya wi evolowemo.
17 Chiryene, ti wookhweya ovira erimu ni elapo, opwahana wi ohaakhwanele muceka mmoha wa nsu na Nlamulo.
18 “Oothene yoole onamwalana ni mwaariye, nave amuthela mukina onamuraruwa, nave yoole onamuthela muthiyana omwalanne ni iyawe onamuraruwa.
19 “Aakhalavo mulopwana ooreela, aawara soowara sooreeraxa ni soowalamela, nave mahiku oothene aanalya ni opuha.
20 Nto, mulipa oovekaveka mmoha, awiichaniwa Lasaro yoowo aasaren’ye makhwaca, aanakuhiwa vamulako wa mulopwana ole ooreela
21 nave aanakhwela wiipha etala ni ichu seiho saamora vameesa va mulipa ooreela. Ophiyerya wi anapwa yaanarwa, enalata makhwaca awe.
22 Moovira wa elukuluku, mulipa oovekaveka yoole aahikhwa nave aakuxiwa ti ankeelo emukeriha weiwo aariwo Aparahamu.*
“Mulipa ooreela tho aakhwa nave avithiwa.
23 Ari Mmahiyeni,* owo aaviiha miitho awe, ahooxeyaka, nave aamoona Aparahamu ocaicai vamoha ni Lasaro eemenle makupa awe.*
24 Mwawiihiiha, owo aahiichana ariki: ‘Tiithi Aparahamu, mukimorele ikharari, mmurume Lasaro wi anaanihe ethoka ya ekatha awe mmaahini wi ariiriheno nlumi naka, woona wi kinnahooxeya va nikalume nla noovihaxa.’
25 Nto Aparahamu aamwaakhula: ‘Mwanaka, wuupuwele wi waahaakhela ichu saphaama ori mukumi, nyenya Lasaro aanahooxeya vancipale. Vano, owo onamuhakararyiwa wenno, nave weyo onamuhooxeya.
26 Opwaha soothene, wookhalavo mukoti wawiixa veeri va hiyo ni nyuwo, wi yaale ari ni hiyo anakhwela olapuwela iwo ehiweryeke, naari tho yaale ari ni nyuwo anakhwela olapuwela nno, ehiweryeke.’
27 Voocharela owo aahi: ‘Yaari hiihaa, kinnoovekaani papa, wi mmurume Lasaro aye vaate va apapa aka,
28 woona wi kookhalano asinnaka athanu, aalopole wi ehirwe tho nipuro nenla na ekoi.’
29 Nto Aparahamu aahi: ‘Awo aakhalano Mose ni Alipa a Miririmu; yaawiriyaneke yaawo.’
30 Owo aahaakhula ii: ‘Hooye, tiithi Aparahamu, wakhala wi ooyawo mmoha a alipa ookhwa, awo anahaala ocharuwa.’
31 Aparahamu aamwaakhula: ‘Wakhala wi hananwiriyana Mose ni Alipa a Miririmu, herwa tho elekecheya naamwi ari muchu oviihiwe mookhwani.’”
Inoota
^ Naari: “mulipa oothokororya muhakhu wa vaate.”
^ Mu Ekriki, “patus.” Mphimo aya mmoha onaakhwana iliitru 22.
^ Mu Ekriki, “ikooru nsana.” Mphimo aya mmoha onaakhwana iliitru 220.
^ 80
^ Naari: “ovyaka.”
^ Naari: “elapo yeela yoonanara.” Moone Masu Atharihiwe.
^ Mu Ekriki, “va naakhoopeni va Aparahamu.”
^ Naari: “o Hati,” ela tiwi, nipuro achu oothene anavithiwaayawo. Moone Masu Atharihiwe.
^ Mu Ekriki, “va naakhoopeni vawe.”
