Luka 3:1-38
3 Mu eyaakha ya neekhumi nathanu ya olamulelo wa Tiperiyu Kaisara, vaavaa Pontiyu Pilatu aareiye mulamuleli o Yuteya, Heroti* alamulelaka muceche wo Kalileya, munnawe awiichaniwa Filipi alamulelaka miceche so Itureya ni Trakonite, nave Lisaniyu alamulelaka muceche wo Apileni,
2 mmahiku yaawo Anaxi ni Kayafa yaaryaaya ahooleli a alipa a mukucho, masu a Muluku yaarwa wa Yohani mwaana a Sakariya otakhwani.
3 Hiihaa, Yohani aaheeceeca makupa oothene a muhice Yortano, alaleeryaka sa opatiso ntoko yawooniherya ya orukunuxa murima wi ileveleliwe soocheka,
4 hiihaa ntoko erempwaaya mu liivuru a masu a mulipa a miririmu Yesaya: “Ninniiweya nsu na muchu nikhuwelaka otakhwani nriki: ‘Murehererye ephiro ya Yehova! Nwookolole arampha awe.
5 Mikoti soothene inaphwanela wuuheeliwa, nave miyaako ni icucuwa soothene inaphwanela opwexiwa; miphiro sookhoromana inaphwanela wookololiwa nave matikilikwa anaphwanela weereryanyiwa;
6 nave ikumi* soothene inarwa soona ovuluxa wa Muluku.’”*
7 Mwawiihiiha, Yohani aanaloca ni muloko wa achu waarwa wi opatisiwe, ariki: “Muyareriwo wa ivili nyu, taani oolenleeni wi muchawe esara enoorwa?
8 Mwawiihiiha, mphareke miteko sinooniherya orukunuxa wanyu murima. Muhipacerye oloca meekhiinyu muriki: ‘Apapa ahu ti Aparahamu.’ Chiri miyo kinnooleelaani wi Muluku onanwerya omvaha Aparahamu anamwane moorweela wa maluku ala.
9 Hiihaa, epaso yookuheryiwa mitathaari sa miri. Nave miri soothene sihinavaha sawiima saphaama sinahaala wuuhiwa ni ovonyeriwa vamooroni.”
10 Muloko wa achu waanamukoha: “Vano, tiheeni nnaphwanelaahu weera?”
11 Owo aanawaakhula ariki: “Muchu yoowo orino soowara* piili, emoha amvahe yoole ohirino, nave yoole orino yoolya eereno emohamoha.”
12 Ophiyerya tho alipa a muxokho yaanarwa wi epatisiwe, nave yaamukoha eriki: “Muhusiha, tiheeni nnaphwanelaahu weera?”
13 Owo aawaakhula: “Muhaaliviheke* achu opwaha mummo muleeliwaanyu.”
14 Nave tho anakhoco yaanamukoha: “Tiheeni nnaphwanelaahu weera?” Owo aanaaleela: “Muhimwiiyereke* naari omootherya muchu, nto mukhwaaneliweke ni yeeyo munaakhelaanyu.”*
15 Vano, woona wi achu yaananwehererya Kristu, oothene yaanuupuwela mmurimani mwaya vooloca sa Yohani eriki: “Apwanne Kristu ti yoola?”
16 Yohani aawaakhula oothene: “Miyo kinnoopatisaani ni maahi, nto yoowo onarwa tori ooweryaxa okipwaha miyo, nave nkaano ophwanelela wa otaphula mikoi sa asantaalya* awe. Owo onarwa oopatisaani ni munepa waweela vamoha ni mooro.
17 Mmatani mwawe ookhalano echu yoomveerano tiriku nave onahaala orehererya nipuro noomwiipichavo; onammukhapelela tiriku munikhupini mwawe, nto makate* ene onahaala weeyela ni mooro ohinawerya oxipihiwa.”
18 Yohani tho aahaaceenyerya mu ichu ikina sincipale nave aatitelela olaleerya michaka saphaama wa achu.
19 Nto Heroti mulamuleli o Kalileya, aalopoliwa ni Yohani wanthowa na omuthela Herotiya, mwaara a munnawe nave tho aalopoliwa wanthowa na sootakhala sikina sincipale seiho eenreiyeno,
20 owo aahaaceererya saweera seiha soonanara moorweela wa ela: Onwalela Yohani mukariposo.
21 Vano, vaavaa achu oothene yaapatisiwaaya, Yesu tho aapatisiwa. Avekelaka, wirimu waahuleyawo,
22 nave munepa waweela ntoko ekakaiya waamukhuruwela yoowo, voocharela, naahiiweya nsu noorweela wirimu, nriki: “Weyo wa Mwanaka, oosiveliwa; miyo kinnaweemererya weyo.”
23 Yesu aapacenrye muteko awe arino iyaakha makhumi mararu. Ntoko achu yuupuwelaaya, owo aari mwaana aYosefe,mwaana a Eli,
24 mwaana a Matati,mwaana a Levi,mwaana a Melki,mwaana a Yanayi,mwaana a Yosefe,
25 mwaana a Matatiya,mwaana a Amosi,mwaana a Nahumi,mwaana a Esili,mwaana a Nakayi,
26 mwaana a Mati,mwaana a Matatiya,mwaana a Semeyi,mwaana a Yoseki,mwaana a Yota,
27 mwaana a Yowanani,mwaana a Resa,mwaana a Soropapeli,mwaana a Saltiyel,mwaana a Neri,
28 mwaana a Melki,mwaana a Ati,mwaana a Kosamu,mwaana a Elimatama,mwaana a Ere,
29 mwaana a Yesu,mwaana a Eliyeseri,mwaana a Yorimu,mwaana a Matati,mwaana a Levi,
30 mwaana a Simeyoni,mwaana a Yutasi,mwaana a Yosefe,mwaana a Yonamu,mwaana a Eliyakimi,
31 mwaana a Meleya,mwaana a Mena,mwaana a Matata,mwaana a Natani,mwaana a Tavite,
32 mwaana a Yese,mwaana a Opeti,mwaana a Powasi,mwaana a Salmoni,mwaana a Naxoni,
33 mwaana a Aminatapi,mwaana a Arni,mwaana a Esironi,mwaana a Peresi,mwaana a Yuta,
34 mwaana a Yakopo,mwaana a Isaki,mwaana a Aparahamu,mwaana a Tera,mwaana a Nahore,
35 mwaana a Seruki,mwaana a Rewu,mwaana a Peleke,mwaana a Eperi,mwaana a Sela,
36 mwaana a Kayinani,mwaana a Arpaxati,mwaana a Semi,mwaana a Nowa,mwaana a Lameki,
37 mwaana a Matusalemu,mwaana a Enoki,mwaana a Yareti,mwaana a Mahalaleyeli,mwaana a Kayinani
38 mwaana a Enosi,mwaana a Seti,mwaana a Atamu,mwaana a Muluku.
Inoota
^ Ela tiwi, Heroti Antipa. Moone Masu Atharihiwe.
^ Naari: “achu oothene enarwa yoona.”
^ Naari: “ephiro ya Muluku ya ovuluxa.”
^ Naari: “yoowara ekina.”
^ Naari: “Muhaavekeke.”
^ Naari: “Muhiwaakheke ikhorowa.”
^ Naari: “eri yoolivela anyu.”
^ Naari: “atamanku.”
^ Naari: “makhapa.”
