Salmu 72:1-20
Vooloca sa Solomoni.
72 Khwoo Muluku, mumvahe mathorihelo anyu mwene,Nave mwaana a mwene wookololowa wanyu.
2 Aakiheke mulacu wa achu anyu mwawookololowa;Ni wa achu anyu oohaawa, mweekhaikhai.
3 Miyaako siruuheke murecele wa achu,Nave miyaako mikhaani siruuheke wookololowa.
4 Owo awaakiheke* oohaawa variyari va achu,Aavuluxeke anamwane a achu oothoiwaNave aanyaanye yaale anaalyela.*
5 Awo ananwoovakaani ilukuluku soothene vaavaa nsuwa nnaaryaayaNi elukuluku mweeri oryaaya wirimu,Wa muyareriwo ti muyareriwo.
6 Owo oni akhale ntoko epula yeeyo enarupela emaca ehaciwe,Ntoko epula yawaaca yeeyo ennaaniha echaya.
7 Mmahiku awe, awookololowa murima onamwaaluwa,*Nave onamukhalavo murecele wawaaca ophiyerya ohikhalavo tho mweeri.
8 Owo onahaala okhalano anamurala* ovinyerya weiwo ephareya epacenryaayawo ophiyerya weiwo ekotenlaayawo.
Nave ovinyerya o muhiceni* ophiyerya weiwo elapo ekotenlaayawo.
9 Achu yaawo anakhala mutakhwani anamukokhora vamiithoni vawe,Nave amwiicani awe anamulata nchupi.
10 Mamwene o Tarsu ni a mu ivilivili anamuliva musokho.
Mamwene o Sapa ni o Sepa anamuruuha samahala.
11 Mamwene oothene anamukokhora vamiithoni vawe,Nave maloko oothene anammurumeela.
12 Tiwi owo onammoopola oohaawaYoowo onakhuwela ntakhara nikhaviheryo.
Nave tho oothoiwa ni oothene yoole ohirino oomukhaviherya.
13 Owo onamwaamorelaka ikharari oothoiwa ni oohaawa,Nave onamvuluxa okumi wa oohaawa.
14 Owo onanwoopola* wa ohooxiwa ni nlala,Nave nikhami naya nnamukhala nasisapo vamiithoni vawe.
15 Ekumi ya mwene elekele nave amwaakhele ooru o Sapa.
Avekeleliweke moohihiyererya;Owo areelihiweke nihiku noothene.
16 Enamukhalavo yoolya yincipale veelaponi yavathi;Nave vasulu va miyaako inamusareyavo soolya.
Sawiima sa mwene inamwinnuwa ntoko so Lipanu,Nave mmapooma, achu anamphuwela ntoko munyepu wa veelaponi.
17 Nsina nawe ntitelele okhala wookhala,Ovuwa wawe olekele ntoko nsuwa.
Achu ekhaleno mareeliho moorweela wa mwene;Maloko oothene emweere oohakalala
18 Yehova Muluku acicimihiwe, Muluku a Isarayeli,Mmoharu yoowo onapaka ichu sootikhiniha.
19 Nsina nawe noocicimiheya nivuwihiwe okhala wookhala,Nave ocicimiheya wawe osareye veelaponi yoothene.
Aamen ni Aamen!
20 Mavekelo a Tavite, mwaana a Yese, anamalela vaavaa.
Inoota
^ Mu Ehepiri, “aathoriheke.”
^ Naari: “anawiiyerya.”
^ Mu Ehepiri, “onamphuwela.”
^ Naari: “onamulamulela.”
^ Ela tiwi, muhice Eufrate.
^ Naari: “Owo onamoopola okumi aya.”
